Gbẹtọvi lẹpo wẹ tindo oyín de. Be e ma yin nuhe sọgbe wẹ e yin dọ Jiwheyẹwhe lọsu ni tindo oyín de ya? Na haṣinṣan họntọnjiji tọn nido vivi ganji, gbẹtọvi lẹ nọ saba ylọ oyín ode awetọ tọn. Be e ma yin nudopolọ wẹ e dona yin na nuhe dù họntọnjiji mítọn hẹ Jiwheyẹwhe ya?

 Dile etlẹ yindọ Jiwheyẹwhe tindo tẹnmẹ-yinkọ susu lẹ to Biblu mẹ taidi “Jiwheyẹwhe Ganhunupotọ,” “Oklunọ Nupojipetọ” po “Mẹdatọ” po, ewọ nọ doyẹyigona sinsẹ̀n-basitọ etọn lẹ, na e nọ jlo dọ yé ni nọ yí oyín emitọn titi zan nado dọhona emi.​—Gẹnẹsisi 17:1; Owalọ lẹ 4:24; 1 Pita 4:19.

 To lẹdogbedevomẹ Biblu tọn susu lẹ mẹ, yinkọ Jiwheyẹwhe tọn tin to Eksọdusi 6:3 mẹ. Wefọ enẹ dọmọ: “Yẹn sọawuhia hlan Ablaham, hlan Isaki, podọ hlan Jakọbu, di Jiwheyẹwhe Ganhunupotọ, ṣigba gbọn oyín ṣie Jehova dali wẹ yẹn ma yin mẹyinyọnẹn hlan yé gba.”

 To Gungbe mẹ, Jehovah wẹ lẹdogbedevomẹ yinkọ Jiwheyẹwhe tọn he ko to yinyin yiyizan sọn owhe susu lẹ die. Dile etlẹ yindọ “Yahweh” wẹ weyọnẹntọ susu nọ yiwanna nado yizan, Jehovah wẹ yin wunmẹ yinkọ lọ tọn he yin yinyọnẹn hugan. Adà tintan Biblu tọn ma yin kinkan do Gungbe mẹ gba ṣigba do Heblugbe mẹ, yèdọ ogbè de he yè nọ hia sọn adusi yì amiyọn mẹ. To Heblugbe mẹ, oyín Jiwheyẹwhe tọn sọawuhia taidi wekun asu ẹnẹ יהוה. Wekun asu ẹnẹ enẹlẹ​—he nọ yin lilẹdo YHWH​—yin yinyọnẹn taidi Tetlaglamu.