CAGILI 3
I moamoani po, u labaaliŋamu tie U Tienu yua bi?
1. Ŋme n diani bibili yeni?
Yaa labaaliŋamu n waani ke, bi niba ba ti kali ki tinga po yogunu kuli yeni, ye Bibili nni. (Matiyu 5:5) Bibili yeni pia tila 66. U Tienu gandi jaba 40 ke bi diani o. Hal bina 3500 leni dinla, ke Musa diani a tipkiala bona mu yeni. O tondo Jan mo diani mi juodima tili yeni bina 1900 leni dinla. Ŋme yaa maama n ye o ni nni? Leni o fuoma ŋanmo todima U Tienu waani bi niba, ban baa diani yaala. (Samueli Tilieli 23:2) Bi diani U Tienu yantiana laa tie bi yaala ka ba. Lani n cedi ke Bibili yeni tie U Tienu tili.—Cogi mani Timote Tilieli 3:16; Pieli Tilieli 1:20, 21.
2. Be n wangi ke Bibili yeni tie U Tienu tili?
Bibili yeni tie U Tienu tili, kelima wani den togidi yaala saala po yeni kua cain. O ninsaalo mo kan fidi tieni lani ba. (Josue 23:14) U Tienu bebe o paaciamu kuli daano n bani saala po.—Cogi mani Isayi 42:9; 46:10.
Yaa tili n ña U Tienu kani ki pia lie. Bibili tie yeni. Bi ñani o milliard 2, mabuoli 450 nni. Leni wani n tie tikpeli yeni baa cogi o a cogidiena nni ba. Ama o yaa maadi ki tinga leni U Tienu n tagi yaala kuli maama, o maama tie moamoani cain. Leni jaba 40 n diani o yeni, o maama tuugi leni yaaba. Bibili yeni n go maadi mi buama maama maanma yeni, wangi ke o tie U Tienu tili. O go ba fidi todi bi niba ban ŋanbi bi yema. Lani kuli n cedi ke bi neba boncianla bani cain ke Bibili yeni tie U Tienu tili.—Cogi mani Tesalonika Tikpiali 2:13.
3. Bibili maadi bee maama?
Bibili n maadi yaa labaaliŋamu maama ki cie, tie yua n maadi ke U Tienu bua bi ninsaaliba, ke O ba ti ŋanbi bi yema saala po. O waani mi cilima Adama leni Awa n den cedi ke bi ninsaaliba luo ŋalijani maanma, leni ke ti tinga n ba gua tua ŋalijani.—Cogi mani Mi Doagidima 21:4, 5.
A ñoabona leni i tundi n ye Bibili nni. O go pia labaali yaaba n waani U Tienu n den kubi bi niba maanma yaa yogunu n pendi. Laa labaali todi-ti tin bandi U Tienu n tie yaa nilo buolu. Lanwani Bibili ba fidi todi-ti tin ŋanbi ki bandi U Tienu. O waani-ti tin ba fidi tieni yaala ki tua o danli.—Cogi mani Pisoma 19:8, 12; Jaka 2:23; 4:8.
4. Lede ke yi ba gbadi Bibili maama fuuli?
Yaa tili n tie nne ba todi-yi yin gbadi Bibili maama fuuli. Jesu n den wangi Bibili maana fuuli, o den tuuni leni velise boncianla. Yaa tili n tie nne moko ŋoa yeni.—Cogi mani Luka 24:27, 45.
Labaaliŋamu yua n ñani U Tienu kani yeni n puuni yaa pamanli ki pia lie. Bi niba tieni bi baga leni laa labaalo. Bi tianba mo yaa cengi O bi yen biendi bi pala. Yi ya bua yaa miali n kan gbeni, li tie ti ladi yin ŋanbi bandi U Tienu.—Cogi mani Jan 17:3.
