pehala raja 11:1-43
11 magar raja sulaiman ne firaun ki beti ke alava+ doosre deshon ki bahot-si aurton se pyar kiya.+ usne moabee,+ ammoni,+ edomi, seedoni+ aur hitti+ aurton se pyar kiya.
2 ye aurtein unhin deshon se thi jinke baare mein yahova ne israeliyon se kaha tha, “tum unke beech na jaana* aur woh tumhare beech na aayen kyonki woh zaroor tumhare dilon ko apne devtaon ki taraf behka deinge.”+ fir bhi sulaiman ne unse gehra lagav rakha aur unse pyar kiya.
3 sulaiman ki 700 patniyaan thi, jo shaahi gharane ki thi aur uski 300 up-patniyaan thi. uski patniyon ne dheere-dheere uska dil behka diya.*
4 sulaiman ke budhape mein+ uski patniyon ne uske dil ko doosre devtaon ki taraf behka* diya.+ uska dil apne parmeshvar yahova par poori tarah na laga raha. woh apne pita daavid ki tarah nahin bana raha, jiska dil parmeshvar par poori tarah laga tha.
5 sulaiman ne seedoniyon ki devi ashtoret+ aur ammoniyon ke ghinaune devta milkom ki pooja ki.+
6 usne yahova ki nazar mein bure kaam kiye aur poore dil se yahova ke peechhe nahin chala jaise uska pita daavid chalta tha.+
7 unhin dinon sulaiman ne moab ke ghinaune devta kamosh ke liye yarooshalem ke saamnevale pahad par unchi jagah banayi+ aur usne ammoniyon ke ghinaune devta molek+ ke liye bhi unchi jagah banayi.+
8 usne apni un sabhi patniyon ke liye aisa kiya, jo doosre deshon se thi aur apne devtaon ke liye balidan chadhati thi taaki unka dhuaan uthe.
9 yahova ko sulaiman par bahot krodh aaya kyonki uska dil israel ke parmeshvar yahova se bahakkar door chala gaya tha,+ jisne do baar use darshan diya tha+
10 aur use saaf chetavni di thi ki woh doosre devtaon ke peechhe na jaaye.+ magar usne yahova ki aagya nahin maani.
11 isliye yahova ne sulaiman se kaha, “toone jo aisa kaam kiya hai aur mainne jis karar ko maanne aur jin vidhiyon par chalne ki aagya di, unhein toone nahin maana, isliye main tujhse tera raaj chheen loonga aur tere ek sevak ko de doonga.+
12 lekin tere pita daavid ki khaatir main yah kaam tere jeete-ji nahin karoonga. main tere bete ke haath se raaj chheen loonga.+
13 magar main usse poora raaj nahin chheenoonga.+ main apne sevak daavid ki khaatir aur apne chune huye shehar yarooshalem ki khaatir+ ek gotra tere bete ko doonga.”+
14 fir yahova ne sulaiman ka ek virodhi khada kiya+ jiska naam hadad tha. hadad edomi tha aur edom ke shaahi gharane se tha.+
15 jab daavid ne edom ko haraya tha+ aur uska senapati yoab maare gaye logon ko dafnane gaya tha, tab yoab ne edom ke har aadmi aur ladke ko maar daalne ki koshish ki thi.
16 (yoab aur sabhi israeli sainik chhe maheene tak edom mein rahe jab tak ki unhonne vahaan ke har aadmi aur ladke ko maar* na daala.)
17 magar hadad apne pita ke kuch edomi sevkon ke saath misra ki taraf bhaag gaya. us vakt hadad ek chhota ladka tha.
18 jab woh midyan se nikle the to raaste mein woh paaran gaye aur vahaan ke kuch aadmiyon ko unhonne saath liya+ aur misra pahunche. vahaan woh misra ke raja firaun se mile. firaun ne hadad ko rehne ke liye ek ghar diya aur uski khaane-peene ki zaroortein poori kin aur use zameen bhi di thi.
19 hadad se firaun itna khush tha ki usne apni raani* tahapnes ki behen ki shaadi usse karayi thi.
20 kuch samay baad tahapnes ki behen ne hadad ke bete ko janm diya, jiska naam ganoobat tha. tahapnes ne firaun ke raajmahal mein ganoobat ki parvarish ki thi.* is tarah ganoobat firaun ke raajmahal mein hi uske beton ke saath pala-badha tha.
21 misra mein jab hadad ko khabar mili ki daavid ki maut ho gayi hai*+ aur uska senapati yoab bhi mar gaya hai,+ to usne firaun se kaha, “mujhe apne desh laut jaane de.”
22 magar firaun ne usse kaha, “mere yahaan tujhe kis cheez ki kami hai, jo tu apne desh laut jaana chahta hai?” hadad ne kaha, “koi kami nahin, fir bhi mujhe jaane ki ijazat de.”
23 parmeshvar ne sulaiman ka ek aur virodhi khada kiya.+ woh elyada ka beta rajon tha, jo apne maalik soba ke raja hadad-ejer+ ke yahaan se bhaag gaya tha.
24 jab daavid ne soba ke aadmiyon ko haraya,*+ tab rajon ne kuch aadmi ikattha karke ek lutera-dal banaya tha aur woh us dal ka sardar ban gaya tha. rajon aur uske aadmi damishk+ jaakaar bas gaye aur vahaan raaj karne lage the.
25 rajon, sulaiman ki saari zindagi israel ka virodhi bana raha. israel par hadad ne pehale hi jo mushkilein khadi ki thi, unhein ab rajon ne aur badha di. seeriya par apne raaj ke dauran, rajon israel se nafrat karta raha.
26 yaarobam+ naam ka ek aadmi bhi raja sulaiman se bagavat karne laga.+ woh sulaiman ka hi ek sevak tha.+ woh sareda ka rehnevala epraimi tha aur uske pita ka naam nabat tha. yaarobam ki maa sarooah ek vidhva thi.
27 yaarobam ne raja se is vajah se bagavat ki thi: sulaiman ne teela* banaya tha+ aur apne pita ke shehar daavidpur+ ki sheharpanah ki darar bhari thi.
28 yaarobam ek kaabil javan tha. jab sulaiman ne dekha ki woh bahot mehantee hai, to usne use yoosuf ke gharane ke un sabhi aadmiyon ki nigrani karne ki zimmedari saunpi+ jinhein jabran mazdoori par lagaya gaya tha.
29 unhin dinon yaarobam yarooshalem se baahar gaya tha. jab woh raaste mein tha to sheelo ka rehnevala bhavishyavakta ahiyah+ aakaar usse mila. us vakt maidan mein un donon ke siva aur koi na tha. ahiyah ek naya baaga pehne huye tha.
30 usne apna baaga liya aur use faadkar uske 12 tukde kar diye.
31 fir usne yaarobam se kaha,
“ye das tukde tere liye hain kyonki israel ke parmeshvar yahova ne kaha hai, ‘main sulaiman ke haath se raaj chheen loonga aur uske das gotra tujhe de doonga.+
32 magar main apne sevak daavid ki khaatir+ aur yarooshalem ki khaatir, jise mainne israel ke sabhi gotron mein se chuna hai,+ ek gotra sulaiman ka hi rehne doonga.+
33 main uska raaj isliye chheen loonga kyonki unhonne mujhe chhod diya hai+ aur woh seedoniyon ki devi ashtoret aur moab ke devta kamosh aur ammoniyon ke devta milkom ko dandvat kar rahe hain. woh aise kaam nahin karte jo meri nazar mein sahi hain aur woh meri vidhiyon aur mere nyay-siddhaanton ka paalan nahin karte. is tarah unhonne meri raahon par chalna chhod diya hai, jaise sulaiman ka pita daavid chalta tha.
34 magar main sulaiman ke haath se poora raaj nahin chheenoonga. woh jab tak zinda rahega main use pradhan bane rehne doonga. aisa main apne sevak daavid ki khaatir karoonga jise mainne chuna tha+ kyonki woh meri aagyayen aur vidhiyaan maanta tha.
35 magar main sulaiman ke bete ke haath se raaj chheen loonga aur tujhe das gotra de doonga.+
36 uske bete ko main ek gotra doonga taaki mere sevak daavid ka deeya mere saamne yarooshalem mein hamesha jalta rahe,+ us shehar mein jise mainne isliye chuna hai ki mera naam usse juda rahe.
37 main tujhe chunoonga aur tu israel ka raja banega aur main tujhe woh saara ilaka doonga jo tu chahta hai.
38 agar tu woh sab kare jiski main tujhe aagya doonga aur mere sevak daavid ki tarah+ meri raahon par chale aur meri vidhiyon aur aagyaon ka paalan karke aisa kaam kare jo meri nazar mein sahi hai, to main tere saath bhi rahoonga. main tera raaj-gharana sada ke liye kaayam karoonga, theek jaise mainne daavid ka raaj-gharana kaayam kiya tha+ aur main israel ka raaj tujhe de doonga.
39 daavid ki santan ne jo kiya hai uski vajah se main unhein neecha dikhaunga,+ magar main aisa sada tak nahin karoonga.’”+
40 isliye sulaiman ne yaarobam ko maar daalne ki koshish ki, magar yaarobam misra bhaag gaya aur vahaan ke raja sheeshak+ ke paas chala gaya.+ woh sulaiman ki maut tak misra mein hi raha.
41 sulaiman ki zindagi ki baaki kahani, uske sabhi kaamon ka byaura aur uski buddhi ki baatein sulaiman ke itihas ki kitab mein likhi hain.+
42 sulaiman ne yarooshalem mein rehkar poore israel par 40 saal raaj kiya.
43 fir uski maut ho gayi* aur use uske pita daavid ke shehar daavidpur mein dafnaya gaya. uski jagah uska beta rahoobiyam+ raja bana.
kai footnote
^ ya “un jaatiyon ke logon se shaadi mat karna.”
^ ya “us par zabardast asar kiya.”
^ ya “fer.”
^ shaa., “kaat.”
^ raaj karnevali raani nahin.
^ ya shaayad, “ka doodh chhudaya tha.”
^ shaa., “apne purkhon ke saath so gaya hai.”
^ shaa., “ghaat kiya.”
^ ya “millo.” is ibrani shabd ka matlab “bharna” hai.
^ shaa., “woh apne purkhon ke saath so gaya.”
