doosra shamooel 19:1-43
19 yoab ko bataya gaya ki abshalom ke liye raja bahot ro raha hai aur maatam mana raha hai.+
2 jab logon ne suna ki raja shok mana raha hai to woh bhi jeet* ka jashna manane ke bajay maatam manane lage.
3 us din woh sab chupchap shehar+ mein aise laut gaye jaise yuddh se bhaage huye sainik maare sharm ke chale jaate hain.
4 raja apna munh dhaanpe, zor-zor se rote huye keh raha tha, “haay, mere bete abshalom, mere bete! haay, mere bete abshalom!”+
5 tab yoab raja se milne ghar par gaya. usne raja se kaha, “aaj toone apne sabhi sevkon ko sharminda kiya hai jinhonne aaj ke din teri, tere bete-betiyonn ki,+ teri patniyon aur up-patniyon ki jaan bachayi hai.+
6 tu un logon se pyar karta hai jo tujhse nafrat karte hain aur un logon se nafrat karta hai jo tujhse pyar karte hain. aaj toone dikha diya ki tere senapati aur sevak teri nazron mein kuch bhi nahin hain. ab main jaan gaya hoon ki aaj agar hum sab-ke-sab mar jaate aur sirf abshalom zinda rehta to tu khush hota.
7 ab uth aur apne sevkon ke paas jaa aur unki himmat bandha kyonki main yahova ki shapath khaakaar kehta hoon, agar tu unke paas nahin gaya to aaj raat tere saath ek bhi aadmi nahin rahega. aur tere liye yah dukh un saare dukhon se kahin zyada hoga jo toone bachpan se lekar aaj tak jhele hain.”
8 tab raja utha aur jaakaar shehar ke faatak par baitha. sab logon ko khabar di gayi ki raja faatak par baitha hai. tab woh sab raja ke saamne aaye.
magar jo israeli yuddh mein haar gaye the, woh apne-apne ghar bhaag gaye.+
9 israel ke sabhi gotron ke logon mein behas chhid gayi aur woh ek-doosre se kehne lage, “raja ne hamein dushmanon se bachaya tha+ aur palishtiyon ke haathon se chhudaya tha, magar ab use abshalom ki vajah se desh chhodna pada.+
10 hamne abshalom ka abhishek karke use apna raja thehraya tha,+ magar woh yuddh mein maara gaya hai.+ isliye ab tum kuch karte kyon nahin? jaakaar raja ko vaapas kyon nahin laate?”
11 raja daavid ne yaajak saadok+ aur yaajak abiyatar+ ke paas yah sandesh bheja: “yahooda ke mukhiyaon se baat karo+ aur unse kaho, ‘israel ke baaki sabhi gotron ke yahaan se raja ke paas sandesh pahuncha hai ki raja ko vaapas mahal laaya jaaye. magar tum log use laane mein peechhe kyon reh gaye ho?
12 tum to mere bhaai ho. tumhare saath mera khoon ka rishta hai.* tumhein to raja ko vaapas le jaane ke liye sabse pehale aana chahiye tha. fir tum log kyon peechhe reh gaye ho?’
13 aur amasa+ se tum kehna, ‘tere saath mera khoon ka rishta hai. isliye ab se yoab ke badle tu mera senapati hoga. agar mainne tujhe apna senapati nahin thehraya to parmeshvar mujhe kadi-se-kadi saza de.’”+
14 is tarah daavid ne yahooda ke sabhi aadmiyon ka dil jeet liya aur unhonne ekmat hokar raja ko yah sandesh bheja: “tu apne sabhi sevkon ko lekar vaapas aa jaa.”
15 raja vaapas jaane ke liye nikaal pada. jab woh yardan nadi pahuncha to yahooda ke log gilgal aaye+ taaki raja se milein aur use sahi-salamat yardan paar kara sakein.
16 raja se milne ke liye unke saath gera ka beta shimi+ bhi jaldi-jaldi aaya. shimi binyameen gotra ka tha aur bahooreem ka rehnevala tha.
17 uske saath binyameen gotra ke 1,000 aadmi aaye the. in sabke alava shaaool ke gharane ka sevak seeba+ bhi aaya. woh hadbadata hua raja se pehale hi yardan ke paas pahunch gaya tha. seeba apne 15 beton aur 20 daason ko saath lekar aaya tha.
18 woh* ghaat utaarkar nadi ke us paar gaya taaki raja ke gharane ko nadi paar kara sake aur raja usse jo bhi kahe woh kare. jab raja yardan paar karne hi vaala tha to gera ke bete shimi ne uske saamne girkar
19 kaha, “mere maalik, mera gunah maaf kar de. jis din tu yarooshalem chhodkar jaa raha tha us din mainne tere saath jo kiya use bhula de.+ us baat ko dil par mat le.
20 tere daas ko ehsas ho gaya hai ki usne kitna bada paap kiya hai. tabhi aaj main yoosuf ke poore gharane mein se sabse pehale apne maalik raja se milne aaya hoon.”
21 sarooyah ke bete abeeshai+ ne fauran daavid se kaha, “shimi ko to maar daalna chahiye kyonki usne yahova ke abhishikt jan ko shaap diya tha!”+
22 magar daavid ne kaha, “sarooyah ke beto, is maamle se tumhara kya lena-dena?+ tum kyon meri marzee ke khilaf kaam karna chahte ho? aaj main poore israel ka raja hoon, isliye kya aaj ke din israel mein kisi ko maar daalna sahi hoga?”
23 fir raja ne shimi se kaha, “tu maara nahin jaayega.” aur raja ne usse shapath khaayi.+
24 shaaool ka pota mapeeboshet+ bhi raja se milne aaya. jis din raja shehar chhodkar gaya tha tab se lekar uske sahi-salamat lautne tak mapeeboshet ne na apne pair dhoye,* na apni moonchhein kaatin aur na hi kapde dhoye the.
25 jab woh yarooshalem mein* raja se milne gaya to raja ne usse poochha, “mapeeboshet, tu mere saath kyon nahin aaya tha?”
26 usne kaha, “mere maalik raja, mere sevak+ ne mujhe dhokha diya. tu jaanta hai ki main pairon se laachar hoon+ isliye mainne kaha, ‘main apne gadhe par kaathi kasta hoon taaki us par savaar hokar raja ke saath-saath jaaun.’
27 magar usne mere baare mein maalik se jhooth bolkar mujhe badnam kar diya.+ lekin mere maalik raja, tu sachche parmeshvar ke ek swargdoot jaisa hai, isliye tujhe jo sahi lage woh kar.
28 tu chahta to mere pita ke poore gharane ko mita sakta tha. lekin toone aisa nahin kiya balki apne is daas ko apni mez se khaane ka samman diya.+ isliye mera kya hak banta hai ki main raja ki aur duhai doon?”
29 lekin raja ne usse kaha, “bas, ab mujhe aur kuch nahin sunnaa. mainne faisla kar liya hai, teri zameen par tera aur seeba, donon ka barbar ka hissa hoga.”+
30 mapeeboshet ne raja se kaha, “woh chahe to poori zameen le le. mera maalik raja sahi-salamat mahal laut aaya hai, mere liye yahi bahot hai.”
31 gilad ka rehnevala barjillai+ bhi raja ko yardan paar karane rogleem se aaya.
32 barjillai bahot boodha tha, uski umra 80 saal thi. woh ek ameer aadmi tha isliye jab raja mahnaim mein thehra hua tha tab barjillai ne uski khaane-peene ki zaroortein poori kin.+
33 isliye raja ne barjillai se kaha, “tu yardan paar karke mere saath yarooshalem chal. tu mere saath bhojan kiya karna.”+
34 magar barjillai ne raja se kaha, “meri zindagi ke din hi kitne reh gaye hain ki main raja ke saath yarooshalem jaaun?
35 tera yah daas 80 saal ka ho gaya hai.+ kya ab main achhe-bure mein fark kar sakta hoon? kya main khaane-peene ka maza le sakta hoon? kya main gaayak-gaayikaon ke sureele geet sun sakta hoon?+ to fir main is umra mein apne maalik raja par kyon bojh banoon?
36 mujhe raja ko yardan tak laane ka jo samman mila hai, yahi mere liye bahot hai. badle mein raja mujhe itna bada inam kyon de?
37 ab meharbani karke apne sevak ko laut jaane ki ijazat de taaki meri maut mere apne shehar mein ho jahaan mere maa-baap ki kabraa hai.+ lekin main tere sevak kimham ko pesh karta hoon.+ mera maalik raja ise apne saath yardan paar le jaaye aur iske saath jo bhi bhala karna chahe kare.”
38 raja ne kaha, “theek hai, kimham mere saath nadi paar jaayega aur main uske liye vahi karoonga jo tu chahta hai. tu mujhse jo bhi kahe, main tere liye karoonga.”
39 iske baad sabhi log yardan paar karne lage. raja ne nadi paar karne se pehale barjillai ko chooma+ aur use aasheervad diya. fir barjillai apne ghar laut gaya.
40 jab raja us paar gilgal gaya+ to kimham bhi uske saath gaya. yahooda ke sabhi logon ne aur israel ke aadhe logon ne raja ko yardan paar karaya.+
41 fir israel ke sabhi aadmi raja ke paas aaye aur usse kehne lage, “hey raja, yahooda ke hamare bhaai kyon hamein bataye bina chori se tujhe aur tere gharane aur tere sabhi aadmiyon ko yardan paar le aaye?”+
42 javab mein yahooda ke sabhi aadmiyon ne kaha, “kyonki raja hamara rishtedar hai.+ tum kyon gussa ho rahe ho? kya hamne raja ka diya kuch khaaya hai ya hamein kuch tohfe diye gaye hain?”
43 magar israel ke logon ne yahooda ke logon se kaha, “is raajya ke das hisse hamare hain, isliye daavid par tumse zyada hamara hak banta hai. to fir tumne kyon hamein tuchh samjha? kya yah sahi nahin hota ki raja ko laane ke liye pehale hum jaate?” fir bhi, israel ke aadmi yahooda ke aadmiyon se behas jeet na sake.*
kai footnote
^ ya “uddhaar.”
^ shaa., “tum mera haad-maans ho.”
^ ya shaayad, “woh.”
^ yahaan istemal huye ibrani shabdon ka yah matlab bhi ho sakta hai ki usne pairon ke naakhoon nahin kaate the.
^ ya shaayad, “se.”
^ ya “yahooda ke aadmiyon ne israel ke aadmiyon se zyada kadi baatein kahin.”
