daaniyel 11:1-45
11 maadi daara ke raaj ke pehale saal,+ main uski himmat bandhane aur use mazboot karne ke liye* khada hua.
2 ab main tujhe ek sachchi baat batane jaa raha hoon:
dekh! faaras mein teen aur raja utheinge aur chautha raja baakiyon se zyada daulat ikatthi karega. aur jab woh apni daulat ke dam par taakatvar ho jaayega, to woh har kisi ko yoonan ke raajya+ ke khilaf bhadkayega.
3 fir ek taakatvar raja uthega aur ek bade ilake par raaj karega+ aur apni manmani karega.
4 magar uske uthne ke baad uske raajya ke tukde-tukde kar diye jaayenge aur chaar dishaon mein bikhra diye jaayenge.+ uska raajya uske vanshajon ko nahin diya jaayega aur jo uske baad aayenge unka ilaka uske ilake jitna nahin hoga, kyonki uska raajya jad se ukhaad diya jaayega aur doosron ka ho jaayega.
5 dakshin ka raja yaani uske haakimon mein se ek taakatvar ho jaayega. magar koi aur usse zyada taakatvar hoga aur ek bade ilake par raaj karega aur woh usse zyada adhikar paayega.
6 kuch saal baad woh ek sandhi kareinge. dakshin ke raja ki beti uttar ke raja ke paas aayegi taaki unke beech ek samjhauta ho. magar us beti ki taakat mit jaayegi aur na raja tikega, na hi uski taakat rahegi aur beti doosre ke havale kar di jaayegi. beti aur use laanevale aur uska pita aur woh jisne un dinon use taakatvar banaya tha, sab doosron ke havale kar diye jaayenge.
7 us beti ki jadon mein se ek ankur nikaalkar apne pita ki jagah lega. woh sena ke paas aayega aur uttar ke raja ke kile par hamla karega aur unke khilaf kadam uthakar unhein jeet lega.
8 saath hi, woh unke devtaon, unki dhaatu ki moorton* aur unke sone-chaandi ki manbhavni* cheezon ko lekar aur unke logon ko bandi banakar misra laut aayega. woh kuch saal tak uttar ke raja par hamla nahin karega.
9 magar uttar ka raja dakshin ke raja ke raajya par hamla karega, lekin fir woh apne desh laut jaayega.
10 uske bete yuddh ki taiyari kareinge aur ek badi, vishal sena ikatthi kareinge. woh zaroor aage badhega aur ek baadh ki tarah sabkuch baha le jaayega. magar fir woh vaapas chala jaayega aur yuddh karta hua apne kile mein laut jaayega.
11 dakshin ka raja kadvahat se bhar jaayega aur nikaal padega aur usse yaani uttar ke raja se yuddh karega. woh ek badi bheed ikatthi karega, magar bheed uske havale kar di jaayegi.
12 us bheed ko le jaaya jaayega. uska man ghamand se fool jaayega aur woh laakhon logon ko girayega, fir bhi woh apni taakat ka faayda nahin uthayega.
13 uttar ka raja laut aayega aur pehale se bhi badi bheed ikatthi karega. us daur ke khatm hone par, yaani kuch saal baad woh ek vishal sena ke saath zaroor aayega, jo hathiyaron se poori tarah lais hogi.
14 us samay dakshin ke raja ke khilaf bahot-se log uth khade honge.
tere logon mein se jo khoonkhar* hain woh behkave mein aakaar darshan ko poora karne ki koshish kareinge, magar woh thokar khaakaar gir jaayenge.
15 uttar ka raja aayega aur ek kileband shehar ke chaaron taraf gherabandi ki dhalan khadi karega aur us par kabza kar lega. dakshin ki senayen aur unke bade-bade soorma nahin tik paayenge. unke paas mukabla karne ki taakat nahin hogi.
16 dakshin ke raja ke khilaf aanevala apni manmani karega aur uske saamne koi nahin tik paayega. woh sundar desh*+ mein jaakaar khada hoga aur uske paas naash karne ki taakat hogi.
17 woh apne raajya ki poori taakat ko lekar pakke irade ke saath aayega, magar fir woh us raja ke saath samjhauta karega aur kadam uthayega. use aurton ki beti ko naash karne ka adhikar diya jaayega. woh beti nahin tikegi, na hi uski bani rahegi.
18 woh fir se samundar kinare ke ilakon ki taraf munh karke bahot-si jagahon par kabza kar lega. isne doosre ke haathon jo beizzati sahi hai, use ek senapati aakaar door kar dega. woh aur beizzat na hoga, kyonki woh beizzati karnevale ko hi beizzat kar dega.
19 fir raja apne desh ke kile ki taraf munh karega. woh ladkhadakar gir jaayega aur uska pata bhi na chalega.
20 uski jagah ek aur raja aayega jo vaibhavshali raajya ke poore ilake mein kar-vasoolnevale* ko bhejega, lekin woh raja kuch hi dinon mein mita diya jaayega, magar na krodh se na hi yuddh se.
21 uski jagah ek tuchh* aadmi uthega aur woh raajya ka pratap uske haath mein nahin deinge. woh aman-chain ke daur mein* aayega aur chikni-chupdi* baatein karke raajya par adhikar kar lega.
22 woh baadh jaisi senaon ko hara dega aur woh kuchal di jaayengi aur karar+ ka aguva+ bhi kuchal diya jaayega.
23 unhonne uske saath jo sandhi ki hogi uski vajah se woh chhal karega aur uthega aur ek chhote raashtra ke dam par shaktishali ban jaayega.
24 woh aman-chain ke ek daur mein* praant* ki sabse badhiya jagahon mein aayega aur aisa kaam karega jo uske purkhon ne nahin kiya tha. woh loot ka saara maal unmein baant dega aur kileband jagahon ko lene ki saazishein rachega, magar sirf kuch samay ke liye.
25 woh taakat aur himmat* jutayega aur ek vishal sena lekar dakshin ke raja par hamla karne aayega. dakshin ka raja ek bahot badi aur taakatvar sena ke saath yuddh ki taiyari karega. woh khada nahin reh paayega kyonki woh uske khilaf saazishein racheinge.
26 uske saath shaahi khaana khaanevale hi use gira deinge.
jahaan tak uski sena ki baat hai, uska safaya kar diya jaayega* aur bahot-se log maar daale jaayenge.
27 in donon raajaon ka man burai ki taraf jhuka rahega. woh ek hi mez par baithkar ek-doosre se jhooth boleinge. magar unhein kisi bhi baat mein kaamyabi nahin milegi kyonki ant bhavishya mein tay samay par hoga.+
28 woh khoob saara maal lekar apne desh laut jaayega aur uska man pavitra karar ke khilaf hoga. woh kaarravai karega aur apne desh laut jaayega.
29 woh tay samay par laut aayega aur dakshin par hamla karega. magar is baar haalaat pehale jaise nahin honge,
30 kyonki kitteem+ ke jahaz us par hamla kareinge aur use neecha kiya jaayega.
woh laut jaayega aur pavitra karar par apna gussa nikaalega+ aur kadam uthayega. woh laut jaayega aur pavitra karar chhodnevalon par dhyan dega.
31 uski senayen khadi hongi aur pavitra-sthan aur kile ko dooshit kar deingi+ aur niyamit baliyaan band kar deingi.+
aur woh ujaadnevali ghinauni cheez khadi kareinge.+
32 jo log karar ke khilaf dusht kaam karte hain unhein woh chikni-chupdi baaton se* bagavat ki raah par le jaayega. magar jo log apne parmeshvar ko jaante hain woh usse bhi mazboot saabit honge aur kadam uthayenge.
33 logon mein se jinke paas androoni samajh hai+ woh bahoton ko samajh deinge. unhein kuch dinon tak talvar, aag ki jvala, bandhuai aur lootmar se giraya jaayega.
34 magar jab unhein giraya jaayega to unhein thodi madad di jaayegi. bahot-se log chikni-chupdi baatein kehkar* unse mil jaayenge.
35 aur androoni samajh rakhnevalon mein se kuch log gira diye jaayenge taaki unki vajah se shuddh karne ka kaam ho sake aur saaf karne aur ujla karne ka kaam+ ant ke samay tak chalta rahe kyonki yah sab bhavishya mein tay samay par poora hoga.
36 raja apni manmani karega. woh har devta se khud ko oopar uthayega aur unse zyada khud ki badai karega. woh sab ishvaron se mahan ishvar+ ke khilaf chaunkanevali baatein kahega. woh tab tak kaamyab hota jaayega jab tak ki krodh poori tarah prakat nahin ho jaata kyonki jo tay kiya gaya hai woh hokar hi rahega.
37 woh apne pitaon ke ishvar ki koi kadar nahin karega, na hi aurton ki khvahish ki ya kisi aur devta ki parvah karega. woh khud ko sabse uncha uthayega.
38 iske bajay* woh kilon ke devta ki mahima karega, aise devta ko sona-chaandi, keemti ratna aur manbhavni* cheezen chadhayega jise uske pita nahin jaante the aur aisa karke uski mahima karega.
39 woh ek paraye devta ke saath milkar* mazboot-se-mazboot gadhon ke khilaf kadam uthayega. jo use maante hain unki* woh bahot badai karega aur unhein bahoton par raaj karne ka adhikar dega aur daam lekar unmein zameen baant dega.
40 ant ke samay mein dakshin ka raja usse bhidega* aur uttar ka raja rathon, ghudsavaaron aur bahot-se jahazon ke saath us par aandhi ki tarah toot padega. woh kai deshon mein ghus jaayega aur baadh ki tarah sabkuch baha le jaayega.
41 woh sundar desh* mein bhi ghus jaayega+ aur bahot-se desh hara diye jaayenge. magar jo uske haath se bach jaayenge, woh ye hain: edom, moab aur ammoniyon ka sabse khaas hissa.
42 woh kai deshon ki taraf apna haath badhata jaayega aur misra desh bhi nahin bachega.
43 woh misra ke chhipe khazane yaani sone-chaandi aur vahaan ki saari manbhavni* cheezon ka maalik ban jaayega. libiya aur ithiyopiya ke log uske kadmon mein honge.*
44 magar poorab aur uttar se milnevali khabron se woh bechain ho uthega aur badi jaljalahat mein aakaar bahoton ko naash karne aur mitane ke liye nikaal padega.
45 woh apne shaahi* tamboo vishal saagar aur sundar desh* ke pavitra pahad ke beech khade karega.+ aakhirkar uska ant ho jaayega aur uski madad karnevala koi na hoga.
kai footnote
^ ya “uske liye ek kile ki tarah banne.”
^ ya “dhali hui moorton.”
^ ya “anmol.”
^ ya “luteron ke bete.”
^ ya “sartaj.”
^ ya “kaam lenevale jallad.”
^ ya “neech.”
^ ya “saazishon ke baare mein.”
^ ya shaayad, “bina chetavni diye.”
^ ya shaayad, “bina chetavni diye.”
^ ya “zila adhikar-shetra.”
^ shaa., “apna dil.”
^ ya “use baadh se baha diya jaayega.”
^ ya “chaaploosi karke; dhokhe se.”
^ ya “chaaploosi karke; dhokhe se.”
^ ya “anmol.”
^ ya “uske badle.”
^ ya “ki madad se.”
^ ya shaayad, “jise bhi woh maanta hai uski.”
^ ya “usse sing ladayega.”
^ ya “sartaj.”
^ ya “anmol.”
^ ya “uske peechhe jaayenge.”
^ ya “aaleeshan.”
^ ya “sartaj.”
