matti ke mutabik khushkhabri 8:1-34
8 jab yeeshu us pahad se neeche utar aaya, to bheed-ki-bheed uske peechhe ho li.
2 aur dekho! ek kodhi uske paas aaya. usne jhukkar use pranam* kiya aur kaha, “prabhu, bas agar tu chahe, to mujhe shuddh kar sakta hai.”+
3 tab yeeshu ne apna haath badhakar use chhua aur kaha, “haan, main chahta hoon. shuddh ho jaa.”+ usi pal uska kodh door ho gaya aur woh shuddh ho gaya.+
4 fir yeeshu ne usse kaha, “dekh, kisi ko mat batana.+ magar jaakaar khud ko yaajak ko dikha+ aur moosa ne jo bheint chadhane ke liye kaha hai, woh chadha+ taaki unhein gavahi mile.”
5 jab yeeshu kafarnahoom aaya, to ek sena-afsar uske paas aakaar usse binti karne laga,+
6 “maalik, mera sevak ghar mein beemar pada hai, use lakva maar gaya hai aur uska bahot bura haal hai.”
7 yeeshu ne usse kaha, “jab main vahaan aaunga, to use theek karoonga.”
8 javab mein sena-afsar ne kaha, “maalik, main is laayak nahin ki tu meri chhat tale aaye. isliye bas tu apne munh se kah de aur mera sevak theek ho jaayega.
9 kyonki main bhi kisi adhikari ke neeche kaam karta hoon aur mere neeche bhi sipahi hain. jab main ek se kehta hoon, ‘jaa!’ to woh jaata hai aur doosre se kehta hoon, ‘aa!’ to woh aata hai aur apne daas se kehta hoon, ‘yah kar!’ to woh karta hai.”
10 yah sunkar yeeshu ko bahot taajjub hua aur usne apne peechhe aanevalon se kaha, “main tumse sach kehta hoon, mainne israel mein iske jaisa ek bhi insan nahin paaya jismein itna zabardast vishvas ho.+
11 magar main tumse kehta hoon ki poorab se aur pashchim se bahot-se log aayenge aur swarg ke raaj mein abraham, ishaak aur yakub ke saath mez se tek lagakar baitheinge,+
12 jabki raaj ke bete baahar andhere mein feink diye jaayenge. vahaan woh royenge aur daant peeseinge.”+
13 fir usne sena-afsar se kaha, “jaa. jaisa toone vishvas kiya hai, tere liye vaisa hi ho.”+ aur usi pal uska sevak theek ho gaya.+
14 yeeshu patras ke ghar aaya aur dekha ki patras ki saas+ beemar hai aur bukhar mein padi hai.+
15 tab yeeshu ne uska haath chhua+ aur uska bukhar utar gaya. woh uthi aur uski seva karne lagi.
16 jab shaam ho gayi, to log uske paas aise kai logon ko laane lage jinmein dusht swargdoot samaye the. usne in dusht swargdooton ko sirf bolkar hi nikaal diya aur un sab logon ko theek kar diya jo takaleef mein the
17 taaki woh vachan poora ho jo bhavishyavakta yashayah se kehalvaya gaya tha, “usne hamari beemari khud par le li aur hamare rog utha le gaya.”+
18 jab yeeshu ne apne chaaron taraf logon ki bheed dekhi, to usne chelon ko hukm diya ki naav ko us paar le jaayen.+
19 tab ek shaastri ne aakaar usse kaha, “guru, tu jahaan kahin jaayega, main tere saath chaloonga.”+
20 magar yeeshu ne usse kaha, “lomdiyon ki maandein aur aakash ke panchhiyon ke basere hote hain, magar insan ke bete ke paas kahin sir tikane ki bhi jagah nahin hai.”+
21 tab ek aur chele ne usse kaha, “prabhu, mujhe ijazat de ki main jaakaar pehale apne pita ko dafna doon.”+
22 yeeshu ne usse kaha, “mere peechhe chalta reh aur murdon ko apne murde dafnane de.”+
23 jab yeeshu ek naav par chadh gaya, to chele bhi uske saath ho liye.+
24 tab achanak jheel mein aisi zordar aandhi uthi ki lehrein naav ko dhakne lagin magar woh so raha tha.+
25 chele uske paas aaye aur yah kehkar use jagane lage, “prabhu, hamein bacha, hum naash honevale hain!”
26 magar yeeshu ne unse kaha, “are, kam vishvas rakhnevalo, tum kyon itna dar rahe ho?”*+ fir usne uthkar aandhi aur lehron ko daanta aur bada sannata chhaa gaya.+
27 yah dekhkar chele hairat mein pad gaye aur kehne lage, “aakhir yah aadmi kaun hai ki aandhi aur samundar tak iska hukm maante hain?”
28 iske baad, yeeshu us paar gadreniyon ke ilake mein pahuncha. vahaan do aadmi the jinmein dusht swargdoot samaye the. woh kabraon* ke beech se nikaalker yeeshu ke paas aaye.+ woh itne khoonkhar the ki koi bhi us raaste se guzarne ki himmat nahin karta tha.
29 aur dekho! woh chillakar kehne lage, “hey parmeshvar ke bete, hamara tujhse kya lena-dena?+ kya tu tay kiye gaye vakt se pehale hamein tadpane aaya hai?”+
30 unse kaafi doori par sooaron ka ek bada jhund char raha tha.+
31 isliye dusht swargdoot yeeshu se binti karne lage, “agar tu hamein nikaal raha hai, to hamein sooaron ke us jhund mein bhej de.”+
32 tab yeeshu ne unse kaha, “jaao!” aur woh un aadmiyon mein se baahar nikaal gaye aur sooaron mein sama gaye. aur dekho! sooaron ka poora jhund badi tezee se dauda aur pahad ki kagar se neeche jheel mein jaa gira aur saare sooar mar gaye.
33 magar unhein charanevale vahaan se bhaag gaye aur unhonne shehar mein jaakaar saara kissa kah sunaya aur un aadmiyon ke baare mein bhi bataya, jinmein dusht swargdoot samaye the.
34 tab dekho! saara shehar nikaalker yeeshu ko dekhne aaya. jab unhonne use dekha, to usse baar-baar kehne lage ki woh unke ilake se chala jaaye.+
