utpatti 9:1-29
9 parmeshvar ne nooh aur uske beton ko aasheesh di aur unse kaha, “foolo-falo, ginti mein badh jaao aur dharti ko aabad karo.+
2 tumhara dar dharti ke sabhi jaanvaron mein bana rahega. zameen par chalne-firnevale sabhi jeev-jantuon, aasman mein udnevale sabhi panchhiyon aur samundar ki sabhi machhliyon mein tumhara khauf bana rahega. main in sabko tumhare haath mein saunpta hoon.*+
3 tum har chalte-firte jaanvar ko jo zinda hai, maarkar khaa sakte ho.+ main ye sab tumhein khaane ke liye deta hoon, theek jaise mainne tumhein saag-paat diya tha.+
4 lekin tum maans ke saath khoon mat khaana+ kyonki khoon jeevan* hai.+
5 aur agar koi tumhara khoon bahaye, jo ki tumhara jeevan* hai, to main usse tumhare khoon ka hisab maangoonga. agar koi jaanvar tumhari jaan le to use maar daala jaayega. aur agar koi insan aisa kare, to main usse tumhari jaan ka hisab loonga. use apni jaan ganvani hogi kyonki usne apne bhaai ki jaan li hai.+
6 jo kisi insan ka khoon bahayega uska khoon bhi insan ke haathon bahaya jaayega,+ kyonki parmeshvar ne insan ko apni chhavi mein banaya hai.+
7 aur tum foolo-falo, ginti mein badhte jaao aur dharti ko apni santan se aabad karo.”+
8 fir parmeshvar ne nooh aur uske beton se kaha,
9 “ab main tumhare saath aur tumhari aanevali santanon ke saath ek karar karta hoon.+
10 yah karar main un sab jeev-jantuon ke saath karta hoon jo tumhare saath hain, panchhiyon, jaanvaron aur dharti ke sab jeevit praniyon ke saath jo jahaz se baahar nikaal aaye hain aur tumhare saath hain. main dharti ke har jeevit prani+ ke saath yah karar karta hoon.
11 haan, main tumhare saath yah karar karta hoon ki main fir kabhi jalpralay laakaar sabhi insanon aur jaanvaron* ka naash nahin karoonga aur na hi kabhi poori dharti ko paani se tabah karoonga.”+
12 parmeshvar ne yah bhi kaha, “jo karar main tumhare saath aur sabhi insanon aur jeev-jantuon ke saath kar raha hoon, woh peedhi-peedhi tak bana rahega. uski ek nishani main tumhein de raha hoon.
13 main baadlon mein apna megh-dhanush dikhaunga. yah is karar ki nishani thehrega jo mainne dharti ke saath kiya hai.
14 jab bhi main dharti ke oopar baadal laaunga, to baadlon mein megh-dhanush zaroor dikhayi dega.
15 aur main apna yah karar zaroor yaad karoonga jo mainne tumhare aur sabhi insanon aur har jaati ke jeev-jantu ke saath kiya hai ki main fir kabhi jalpralay laakaar sabhi insanon aur jaanvaron ka naash nahin karoonga.+
16 aur jab bhi baadlon mein megh-dhanush dikhayi dega, to main use dekhkar zaroor yaad karoonga ki mainne dharti ke sab insanon aur har jaati ke jeev-jantu ke saath sada ka karar kiya hai.”
17 parmeshvar ne ek baar fir nooh se kaha, “megh-dhanush mere us karar ki nishani hai jo mainne dharti ke sab insanon aur jaanvaron ke saath kiya hai.”+
18 nooh ke saath uske bete shem, haam aur yepet+ jahaz se baahar nikle. baad mein haam ka ek beta hua jiska naam kanaan tha.+
19 ye teenon nooh ke bete the aur inhin se poori dharti par aabadi faili.+
20 nooh ne zameen jotne ka kaam shuroo kiya aur angooron ka ek baag lagaya.
21 ek din usne angooron se bani madira pi aur use itna nasha ho gaya ki woh apne tamboo mein kapde utaarkar nanga pada raha.
22 jab haam ne, jo kanaan ka pita tha, apne pita nooh ko nanga dekha, to usne baahar jaakaar apne donon bhaaiyon ko bataya.
23 tab shem aur yepet ne apne kandhon par ek bada kapda rakha aur woh nooh ki taraf peeth kiye huye uske paas gaye aur doosri taraf munh kiye huye use kapda odha diya. unhonne apne pita ka nangapan nahin dekha.
24 jab nooh ka nasha utra, woh nind se jaaga aur use pata chala ki uske chhote bete ne uske saath kya kiya
25 to usne kaha,
“kanaan+ par shaap pade.
woh apne bhaaiyon ke daason ka daas bane.”+
26 usne yah bhi kaha:
“shem ke parmeshvar yahova ki taareef hoaur kanaan shem ka daas bane.+
27 parmeshvar yepet ko ek bada ilaka de,yepet ka nivas shem ke tambuon mein ho.
kanaan yepet ka bhi daas bane.”
28 jalpralay ke baad nooh 350 saal aur jeeya.+
29 is tarah nooh kul milakar 950 saal jeeya. iske baad woh mar gaya.
