vyavasthavivran 20:1-20
20 jab tum apne dushmanon se yuddh karne jaaoge aur dekhoge ki unke paas ghode aur rath hain aur unke sainik tumse zyada hain, to tum unse dar mat jaana kyonki tumhara parmeshvar yahova tumhare saath hai, jo tumhein misra se baahar laaya hai.+
2 jab tumhari sena yuddh ke liye taiyar khadi ho, tab yaajak ko sena ke saamne aakaar usse baat karni chahiye.+
3 use sainikon se yah kehna chahiye, ‘hey israeliyo, suno. tum jo apne dushmanon se yuddh karne jaa rahe ho, tum apna dil kamzor na hone dena. tum dushmanon se bilkul na darna, na hi unse khauf khaana ya unse thar-thar kaanpna
4 kyonki tumhara parmeshvar yahova tumhare saath-saath chal raha hai aur woh tumhari taraf se dushmanon se ladega aur tumhein bachayega.’+
5 aur sena-adhikari bhi sainikon se kahein, ‘kya tummein aisa koi aadmi hai jisne naya ghar banaya aur usmein rehna shuroo nahin kiya? agar hai to woh apne ghar laut jaaye. kahin aisa na ho ki woh ladai mein maara jaaye aur koi doosra aadmi jaakaar uske ghar mein rehne lage.
6 kya tummein aisa koi hai jisne angooron ka baag lagaya aur ab tak uska fal nahin khaaya? agar hai to woh apne ghar laut jaaye. kahin aisa na ho ki woh ladai mein maara jaaye aur koi doosra aadmi uske baag ke fal khaaye.
7 kya tummein aisa koi aadmi hai jiski sagai ho chuki hai magar ab tak shaadi nahin hui? agar hai to woh apne ghar laut jaaye.+ kahin aisa na ho ki woh ladai mein maara jaaye aur koi doosra aadmi uski mangetar se shaadi kar le.’
8 sena-adhikari sainikon se yah bhi poochhein, ‘kya tummein koi darpok aur buzdil hai?+ agar hai to woh apne ghar laut jaaye. kahin aisa na ho ki woh apne doosre bhaaiyon ka bhi man kachcha kar de.’+
9 yah sab kehne ke baad sena-adhikariyon ko sena ki aguvai ke liye senapati thehrane chahiye.
10 jab tum kisi shehar se yuddh karne uske paas jaate ho, to pehale uske saamne shaanti ka prastav rakhna aur use apni sulah ki shartein batana.+
11 agar woh shehar tumhari shartein maankar tumse sulah ke liye raazee ho jaata hai aur tumhare liye apne faatak khol deta hai, to us shehar ke sabhi log tumhare liye jabran mazdoori karnevale ban jaayenge aur tumhari seva kareinge.+
12 lekin agar woh shehar tumhare saath sulah karne se inkar kar deta hai aur tumse yuddh karne nikaal padta hai to tum us shehar ko gher lena.
13 tumhara parmeshvar yahova zaroor us shehar ko tumhare haath mein kar dega aur tum vahaan ke har aadmi ko talvar se maar daalna.
14 magar aurton, bachchon aur maveshiyon ko aur shehar ki har cheez tum loot mein le lena.+ tum apne dushmanon ka loot ka maal apne liye le lena kyonki tumhare parmeshvar yahova ne tumhein yah sab de diya hai.+
15 aisa tum un sabhi shehron ke saath karna jo tumse bahot door hain, jo yahaan ki aas-paas ki jaatiyon ke nahin hain.
16 magar jo shehar tumhare aas-paas ki jaatiyon ke hain aur tumhara parmeshvar yahova tumhein virasat mein de raha hai, vahaan tum kisi ko bhi zinda mat chhodna.+
17 tum vahaan rehnevale hittiyon, emoriyon, kanaaniyon, parijjiyon, hivviyon aur yaboosiyon ko poori tarah naash kar dena,+ theek jaise tumhare parmeshvar yahova ne tumhein aagya di hai
18 taaki ye jaatiyaan tumhein aise ghinaune kaam na sikhayen jo woh apne devtaon ke liye karti hain aur tumhare parmeshvar yahova ke khilaf tumse paap na karvayen.+
19 jab tum kisi shehar par gherabandi karte ho aur kai dinon tak usse yuddh karte ho to vahaan ke pedon par kulhadi chalakar unhein naash mat karna. tum un pedon ke fal khaa sakte ho, magar unhein kaatna mat.+ kya maidan ke ped insan hain ki tum un par hamla karke unhein naash kar do?
20 tum sirf aise pedon ko kaat sakte ho jinke baare mein tum jaante ho ki woh faldar ped nahin hain. tum unhein kaatkar shehar ki gherabandi ke liye istemal kar sakte ho, jab tak ki tum shehar par kabza nahin kar lete.
