vyavasthavivran 24:1-22
24 agar ek aadmi kisi aurat se shaadi karta hai, magar baad mein woh usse khush nahin hai kyonki woh usmein kuch burai paata hai, to use talaknama likhkar+ us aurat ke haath mein dena chahiye aur use apne ghar se nikaal dena chahiye.+
2 woh aurat uska ghar chhodne ke baad kisi aur aadmi se shaadi kar sakti hai.+
3 agar doosra aadmi bhi usse nafrat karta hai* aur talaknama likhkar uske haath mein deta hai aur use apne ghar se nikaal deta hai ya agar is doosre aadmi ki maut ho jaati hai,
4 to us aurat ka pehala pati, jisne use apne ghar se nikaala tha, usse dobara shaadi nahin kar sakta kyonki woh aurat dooshit ho chuki hai. agar woh aisa karta hai to yah yahova ki nazar mein ghinauna kaam hoga. tumhara parmeshvar yahova tumhein jo desh virasat mein denevala hai usmein tum paap mat le aana.
5 agar ek aadmi ki nayi-nayi shaadi hui hai to woh sena mein kaam na kare, na hi use koi aur zimmedari di jaaye. use ek saal tak chhoot di jaaye taaki woh ghar par hi rahe aur apni patni ko khushiyaan de.+
6 jab koi kisi ko udhaar deta hai to woh girvi* ke roop mein uske haath ki chakki ya chakki ka oopri paat zabt na kare+ kyonki aisa karna uski rozee-roti chheen lena* hai.
7 agar koi apne kisi israeli bhaai ko agva kar leta hai aur uske saath bura salook karta hai aur use bech deta hai,+ to agva karnevale ko maar daala jaaye.+ tum apne beech se burai mita dena.+
8 agar tumhare yahaan kodh* nikaal aata hai to kodh ke baare mein levi yaajkon ki saari hidayton ka tum sakhti se paalan karna.+ tum theek vaisa hi karna jaisa mainne yaajkon ko aagya di hai.
9 yaad rakhna ki jab tum misra se nikaalne ke baad safar kar rahe the, tab tumhare parmeshvar yahova ne miryam ke saath kya kiya tha.+
10 agar tu apne padosi ko kuch udhaar deta hai+ to usne jo cheez girvi rakhne ka vaada kiya hai, use zabt karne ke liye tu uske ghar ke andar mat ghus jaana.
11 tujhe karzdar ke ghar ke baahar hi khade rehna hai aur woh apni girvi ki cheez baahar laakaar tujhe dega.
12 agar tera karzdar tangi mein hai to uski girvi ki cheez apne paas raat-bhar mat rakhna.+
13 sooraj dhalte hi uska girvi ka kapda use har haal mein lauta dena taaki woh use odhkar so sake.+ tab woh tujhe dua dega aur tera yah kaam tere parmeshvar yahova ki nazar mein neki maana jaayega.
14 tu kisi bhi dihadi ke mazdoor ke saath beimani na karna, fir chahe woh tera israeli bhaai ho ya tere shehron mein* rehnevala koi pardesi. tu aise zarooratmand aur gareeb ko thagna mat.+
15 tu har din ki mazdoori use sooraj dhalne se pehale usi din de dena+ kyonki woh zarooratmand hai aur uski mazdoori se hi uska guzara hota hai. agar tu uski mazdoori nahin dega to woh tere khilaf yahova ki duhai dega aur tu paap ka doshi thehrega.+
16 bachchon ke paap ke liye pitaon ko na maar daala jaaye aur na hi pitaon ke paap ke liye bachchon ko maar daala jaaye.+ jo paap karta hai usi ko maut ki saza di jaaye.+
17 tum apne yahaan rehnevale kisi pardesi ya anath* ke saath anyay mat karna.+ aur jab tum kisi vidhva ko udhaar dete ho to uska kapda zabt karke girvi* mat rakhna.+
18 mat bhoolna ki misra mein tum bhi gulam the aur tumhara parmeshvar yahova tumhein vahaan se chhuda laaya hai.+ iseeliye main tumhein aisa karne ki aagya de raha hoon.
19 jab tum apne khet mein katai karte ho aur fasal ikatthi karte ho, tab agar bhool se ek poola chhoot jaaye to use lene ke liye tum khet mein vaapas mat jaana. tum use apne yahaan rehnevale pardesiyon, anathon aur vidhvaon+ ke liye chhod dena taaki tumhara parmeshvar yahova tumhare har kaam par aasheesh de.+
20 jab tum apne jaitoon ki daaliyon ko maarkar unke fal ikatthe kar lete ho, to daaliyon ko dobara mat jhaadna. jo fal reh jaate hain unhein tum apne yahaan rehnevale pardesiyon, anathon aur vidhvaon ke liye chhod dena.+
21 jab tum apne angooron ke baag se angoor ikattha kar lete ho, to bache huye angoor ikattha karne ke liye vaapas mat jaana. unhein tum apne yahaan rehnevale pardesiyon, anathon aur vidhvaon ke liye chhod dena.
22 mat bhoolna ki misra mein tum bhi gulam the. iseeliye main tumhein aisa karne ki aagya de raha hoon.
kai footnote
^ ya “use thukra deta hai.”
^ ya “bandhak.”
^ ya “uski jaan lena.”
^ jis ibrani shabd ka anuvad “kodh” kiya gaya hai uske kai matlab hain. usmein tarah-tarah ke charmrog aur kuch aise sankraman bhi shaamil hain jo kapdon aur gharon mein paaye jaate hain.
^ shaa., “faatkon ke andar.”
^ ya “jiske pita ki maut ho gayi hai.”
^ ya “bandhak.”
