vyavasthavivran 4:1-49
4 ab hey israel, main tumhein jo kaayde-kaanoon aur nyay-siddhaant sikhata hoon unhein tum dhyan se sunnaa aur unka paalan karna taaki tum jeete raho+ aur us desh mein jaakaar use apne adhikar mein kar lo jo tumhare purkhon ka parmeshvar yahova tumhein dene jaa raha hai.
2 main tumhein jo aagyayen sunata hoon, unmein na to tum kuch jodna aur na hi unse kuch nikaalna+ taaki tum apne parmeshvar yahova ki sabhi aagyaon ka paalan karte raho.
3 tumne khud apni aankhon se dekha hai ki yahova ne por ke baal devta ke maamle mein kya kiya tha. tumhare parmeshvar yahova ne tumhare beech se aise har aadmi ko mita diya jisne por ke baal ki pooja ki thi.+
4 magar tum sab aaj isliye zinda ho kyonki tum apne parmeshvar yahova ko mazbooti se thaame huye ho.
5 dekho, jaise mere parmeshvar yahova ne mujhe aagya di hai, mainne tumhein uske saare kaayde-kaanoon aur nyay-siddhaant sikhaye hain+ taaki tum us desh mein unka paalan karo jise tum apne adhikar mein karnevale ho.
6 tum in sabhi kaayde-kaanoonon ko sakhti se maanna+ kyonki aisa karne se sabhi raashtron ke saamne tumhari buddhi+ aur samajh+ zahir hogi. aur woh in kaayde-kaanoonon ke baare mein sunkar kaheinge, ‘is bade raashtra ke log vaakai buddhiman aur samajhdar hain.’+
7 aisa kaun-saa bada raashtra hai jiske devta uske itne kareeb rehte hain jitna hamara parmeshvar yahova hamare kareeb rehta hai? hum jab bhi uski duhai dete hain, woh fauran hamari sunta hai.+
8 aisa kaun-saa bada raashtra hai jiske kaayde-kaanoon aur nyay-siddhaant itne sachche hain jitna ki yah poora kaanoon hai jo aaj main tumhein de raha hoon?+
9 saavdhan raho aur khud par kadi nazar rakho taaki jo kuch tumne apni aankhon se dekha hai, use kabhi bhool na jaao aur yah jeete-ji tumhare dil se utarne na paaye. tum ye saari baatein apne beton aur poton ko bhi batana.+
10 jis din tum horeb mein apne parmeshvar yahova ke saamne khade huye us din yahova ne mujhse kaha tha, ‘sab logon ko mere saamne ikattha kar taaki main unhein apni aagyayen sunaun+ jisse woh saari zindagi mera dar maanna seekhein+ aur apne beton ko bhi sikhayen.’+
11 tab tum sab pahad ke paas aaye aur uske neeche khade huye. woh pahad aag se dhadhakne laga aur uski jvala aasman tak uthne lagi. chaaron taraf ghor andhera aur kaale ghane baadal chhaa gaye.+
12 fir yahova ne aag mein se tumse baat karni shuroo ki.+ tumne sirf uski baatein sunin, magar koi roop nahin dekha.+ vahaan sirf ek aavaz sunayi de rahi thi.+
13 parmeshvar ne tumhein apna karar+ yaani das aagyayen*+ sunayin aur tumhein aadesh diya ki tum unka paalan karna. iske baad usne patthar ki do patiyaon par woh aagyayen likhkar di.+
14 us vakt yahova ne mujhe aagya di ki main tumhein uske kaayde-kaanoon aur nyay-siddhaant sikhaun taaki tum us desh mein unka paalan karo jise tum apne adhikar mein karnevale ho.
15 horeb mein jab yahova ne tumse aag ke beech se baat ki, to us vakt tumne uska koi roop nahin dekha tha. isliye tum khud par kadi nazar rakho
16 ki tum pooja ke liye koi moorat banakar bhrasht na ho jaao. tum kisi ke bhi roop ki moorat nahin banaoge, na aadmi ki na aurat ki,+
17 na dharti ke kisi jaanvar ki, na aasman mein udnevale kisi panchhi ki,+
18 na zameen par reingnevale kisi jeev ki aur na hi dharti ke paani mein rehnevali kisi machhli ki.+
19 jab tum aankhein uthakar aasman ki taraf dekhoge aur tumhein sooraj, chaand aur taare nazar aayenge, to tum aakash ki saari sena ke aage dandvat karne ke liye, uski pooja karne ke liye bahak mat jaana.+ tumhare parmeshvar yahova ne yah sab aakash ke neeche rehnevale sabhi logon ke liye diya hai.
20 tum hi woh log ho jinhein yahova ne loha pighlanevale bhatthe se, misra se baahar nikaala hai taaki tum uski jaageer* bano,+ jaisa ki aaj tum ho.
21 tum logon ki vajah se yahova mujh par bhadak gaya+ aur usne shapath khaakaar kaha ki woh mujhe yardan paar karne nahin dega aur us badhiya desh mein nahin jaane dega jo tumhara parmeshvar yahova tumhein virasat mein denevala hai.+
22 ab isi desh mein meri maut ho jaayegi. main yardan paar nahin karoonga,+ magar tum log yardan paar karoge aur us badhiya desh ko apne adhikar mein kar loge.
23 tum is baat ka poora dhyan rakhna ki tum us karar ko kabhi nahin bhoologe jo tumhare parmeshvar yahova ne tumhare saath kiya hai+ aur pooja ke liye koi bhi moorat nahin tarashoge, kisi ke bhi roop ki pratima nahin banaoge jaisa ki tumhare parmeshvar yahova ne tumhein mana kiya hai.+
24 kyonki tumhara parmeshvar yahova bhasm karnevali aag hai.+ woh aisa parmeshvar hai jo maang karta hai ki sirf usi ki bhakti ki jaaye.+
25 jab tumhare bachche aur naati-pote honge aur tumhein us desh mein rehte bahot samay beet jaayega, tab agar tum dusht kaam karoge aur kisi tarah ki moorat tarashoge+ aur is tarah apne parmeshvar yahova ki nazar mein bura kaam karke uska gussa bhadkaoge,+
26 to yah tay hai ki tum us desh se fauran mit jaaoge jise tum yardan paar karke apne adhikar mein karnevale ho. aaj main aakash aur dharti ko gavah thehrakar tumse yah baat keh raha hoon. tum us desh mein zyada din nahin reh paaoge balki poori tarah tabah ho jaaoge.+
27 yahova tumhein doosre deshon mein bikhra dega.+ jin raashtron mein yahova tumhein bhagayega vahaan tummein se mutthi-bhar log hi zinda bacheinge.+
28 vahaan tumhein insan ke haath ke banaye lakdi aur patthar ke devtaon ki seva karni hogi,+ jo na dekh sakte hain, na sun sakte hain, na khaa sakte hain aur na hi soongh sakte hain.
29 agar tum vahaan rehte apne parmeshvar yahova ki khoj karoge aur poore dil aur poori jaan se use dhoondhoge+ to use zaroor paaoge.+
30 bhavishya mein jab tum par ye saari museebatein toot padeingi aur tum bade sankat mein hoge, tab tum apne parmeshvar yahova ke paas laut aaoge aur uski baat maanoge.+
31 tumhara parmeshvar yahova ek dayalu parmeshvar hai.+ woh tumhein kabhi nahin tyagega, na hi tumhein mitne dega. usne shapath khaakaar tumhare purkhon ke saath jo karar kiya tha, use woh hargiz nahin bhoolega.+
32 ab zara guzra zamana yaad karo. jis din parmeshvar ne dharti par insan ki srishti ki thi tab se lekar tumhare vajood mein aane se pehale ka samay yaad karo. aasman ke ek chhor se doosre chhor tak pata lagao. kya pehale kabhi aisi mahan ghatna hui ya kisi ne aisi ghatna ke baare mein suna hai?+
33 kya kisi aur raashtra ke logon ne kabhi aag mein se parmeshvar ko bolte huye suna fir bhi zinda bache, jaise tum uski aavaz sunkar bhi zinda ho?+
34 tumne khud apni aankhon se dekha ki tumhare parmeshvar yahova ne tumhein misra se nikaalkar apni praja banane ke liye kya-kya kiya. usne misra par ek-ke-baad-ek kehar dhaaye, vahaan chinh aur chamatkar kiye,+ yuddh kiya,+ dil dehlanevale kaam kiye+ aur apna shaktishali haath+ badhakar tumhein vahaan se baahar nikaala. kya usne isse pehale kabhi kisi raashtra mein se doosre raashtra ko nikaalne ke liye aisa kiya?
35 yah sab tumhein isliye dikhaya gaya taaki tum jaan lo ki yahova hi sachcha parmeshvar hai.+ uske siva aur koi parmeshvar nahin.+
36 usne tumhein sudhaarne ke liye swarg se tumse baat ki. aur dharti par tumhein apni badi aag dikhayi aur tumne use aag mein se baat karte suna.+
37 parmeshvar tumhare purkhon se bahot pyar karta tha aur usne unke baad unke vansh ko chuna.+ iseeliye usne tumhare saath rehkar apni mahashakti se tumhein misra se baahar nikaala.
38 usne tumhare saamne se aise raashtron ko khadeda jo tumse kahin zyada bade aur taakatvar the taaki tumhein unke desh mein le jaaye aur unki zameen tumhein virasat mein de, jaisa ki aaj ho raha hai.+
39 isliye aaj yah baat jaan lo aur apne dil mein bitha lo ki oopar aasman mein aur neeche dharti par sirf yahova hi sachcha parmeshvar hai.+ uske siva aur koi parmeshvar nahin.+
40 aur aaj main tumhein jo kaayde-kaanoon aur aagyayen deta hoon unka tum zaroor paalan kiya karna taaki tumhara aur tumhare baad tumhare bachchon ka bhala ho aur tum us desh mein lambee zindagi jeeo jo tumhara parmeshvar yahova tumhein denevala hai.”+
41 us vakt moosa ne yardan ke poorab mein teen shehar alag thehraye.+
42 agar koi aadmi anjane mein, na ki nafrat ki vajah se, kisi ka khoon kar deta hai+ to use inmein se kisi shehar mein bhaag jaana chahiye aur vahin rehna chahiye.+
43 ye teen shehar hain, pathari ilake ke veerane ka beser,+ jo roobeniyon ke liye hai, gilad ka raamot+ jo gaadiyon ke liye hai aur baashaan ka golan+ jo manashshe ke vanshajon ke liye hai.+
44 yah woh kaanoon hai+ jo moosa ne israel ke logon ko diya.
45 jab israeli misra se nikle to uske baad moosa ne unhein ye kaayde-kaanoon, nyay-siddhaant aur yaad dilane ke liye hidaytein di.+
46 moosa ne logon ko yah sab us vakt bataya jab woh yardan ke paas betpor ke saamnevali ghaati mein the.+ betpor, heshbon mein rehnevale emoriyon ke raja seehon ke desh mein hai.+ moosa aur israeliyon ne misra se nikaalne ke baad is raja ko haraya tha.+
47 unhonne uska desh aur baashaan ke raja og ka desh apne kabze mein kar liya.+ ye donon emori raja yardan ke poorab ke praant mein rehte the.
48 israeliyon ne arnon ghaati ke paas aroer+ se lekar seeon yaani hermon pahad tak ka poora ilaka+ aur
49 yardan ke poorab mein poora arba aur door pisga ki dhalanon ke neeche arba ke saagar* tak ka ilaka le liya.+
