yahejkel 33:1-33
33 yahova ka yah sandesh mere paas pahuncha:
2 “insan ke bete, tu apne logon ko mera yah sandesh suna:+
‘agar main kisi desh par talvar laaun+ aur us desh ke log ek aadmi ko chunkar use apna pehredar thehrayen
3 aur pehredar dekhe ki desh par talvar chalnevali hai aur woh narsinga foonkkar logon ko khabardar kare,+
4 to jo koi narsinge ki aavaz sunkar bhi chetavni ko ansuna karta hai,+ woh talvar se maar daala jaayega. woh apni maut ka zimmedar khud hoga.+
5 usne narsinge ki aavaz sunkar bhi chetavni ko ansuna kiya. woh apni maut ka zimmedar khud hoga. agar usne chetavni suni hoti to uski jaan bach jaati.
6 lekin agar pehredar yah dekhkar bhi ki desh par talvar chalnevali hai, narsinga na foonke+ aur isliye logon ko koi chetavni na mile to desh mein se jo koi talvar se maar daala jaayega, woh apne gunah ki vajah se khud marega, magar uske khoon ka hisab main pehredar se maangoonga.’*+
7 insan ke bete, mainne tujhe israel ke gharane ke liye pehredar thehraya hai. jab tu mere munh se koi sandesh sunta hai, to jaakaar meri taraf se logon ko chetavni dena.+
8 jab main kisi dusht se kahoon, ‘hey dusht, tu zaroor mar jaayega!’+ magar tu jaakaar use chetavni na de ki woh apne taur-tareeke badle, to woh dusht apne gunah ki vajah se mar jaayega,+ magar uske khoon ka hisab main tujhse maangoonga.
9 lekin agar tu ek dusht ko chetavni deta hai ki woh apne dusht kaamon se fir jaaye, magar woh apne taur-tareeke badalne se inkar kar deta hai, to woh apne gunah ki vajah se marega,+ lekin tu apni jaan bachayega.+
10 insan ke bete, israel ke gharane se kehna, ‘tum logon ne kaha hai, “hum apni bagavat aur apne paapon ke bhaari bojh se dabe huye hain, unki vajah se hum galte jaa rahe hain,+ ab hum kaise bach sakte hain?”’+
11 magar tu unse kehna, ‘saare jahan ka maalik yahova ailan karta hai, “main apne jeevan ki shapath khaakaar kehta hoon ki mujhe kisi dusht ke marne se khushi nahin hoti.+ iske bajay, mujhe isse khushi milti hai ki dusht apne taur-tareeke badle+ aur jeeta rahe.+ israel ke gharane, mere paas laut aa, apne bure raaste se palatkar laut aa.+ tu kyon apni jaan ganvana chahta hai?”’+
12 insan ke bete, tu apne logon se kehna, ‘agar ek nek insan bagavat karne lage to usne pehale jo nek kaam kiye the woh use bacha nahin sakeinge.+ agar ek dusht aadmi dusht kaam karna chhod deta hai to woh un dusht kaamon ki vajah se naash nahin hoga jo usne pehale kiye the.+ ek nek insan jis din paap karta hai, us din uske woh nek kaam use bacha nahin paayenge jo usne pehale kiye the.+
13 agar main ek nek insan se kahoon, “tu zaroor jeeta rahega” aur woh yah sochkar bure kaam* karne lage ki usne pehale jo nek kaam kiye the unki vajah se use koi saza nahin milegi,+ to woh naash kiya jaayega. uska ek bhi nek kaam nahin gina jaayega. iske bajay, usne jo bure kaam kiye hain unki vajah se woh mar jaayega.+
14 agar main ek dusht se kahoon, “tu zaroor mar jaayega” aur woh paap karna chhodkar nyay karne lage,+
15 girvi ki cheez lauta de,+ looti hui cheez vaapas kar de+ aur galat kaam chhodkar woh saari vidhiyaan maanne lage jin par chalne se hi insan zinda rahega, to woh beshak jeeta rahega.+ woh nahin marega.
16 uske kisi bhi paap ke liye usse hisab nahin liya jaayega*+ balki nyay karne ki vajah se woh jeeta rahega.’+
17 magar tere logon ne kaha hai, ‘yahova ke kaam karne ka tareeka sahi nahin hai,’ jabki unhin ke taur-tareeke galat hain.
18 jab ek nek insan neki ki raah chhodkar galat kaam karne lagta hai, to woh apne in kaamon ki vajah se zaroor marega.+
19 lekin agar ek dusht apne dusht kaam chhodkar nyay karne lage to woh zinda rahega.+
20 magar tum logon ne kaha hai, ‘yahova ke kaam karne ka tareeka sahi nahin hai.’+ israel ke gharane ke logo, main tummein se harek ka nyay uske chaalchalan ke hisab se karoonga.”
21 hamari bandhuai ke 12vein saal ke dasvein maheene ke paanchvein din, ek aadmi mere paas aaya jo yarooshalem se bhaag aaya tha.+ usne mujhe yah khabar di, “shehar par kabza kar liya gaya hai!”+
22 jis din subah woh aadmi mere paas aaya tha, usse pehalevali shaam yahova ka haath mujh par aaya aur usne mera munh khol diya. tab meri zaban khul gayi aur main goonga na raha.+
23 fir yahova ka yah sandesh mere paas pahuncha:
24 “insan ke bete, in khandharon mein rehnevale+ israel desh ke baare mein keh rahe hain, ‘jab ek akele abraham ko is desh ka adhikari banaya jaa sakta hai,+ to hamein kyon nahin? hum to bahot-se log hain. zaroor yah desh hamare adhikar mein kar diya gaya hai.’
25 isliye tu unse kehna, ‘saare jahan ka maalik yahova kehta hai, “yah desh tumhare adhikar mein kaise kiya jaa sakta hai? tum log khoon samet maans khaate ho,+ ghinauni moorton* ki or taakte ho aur khoon ki nadiyaan bahate ho.+
26 tum apni talvar ka sahara lete ho,+ ghinaune kaam karte ho aur tummein se harek apne padosi ki patni ko dooshit karta hai.+ to fir yah desh tumhare adhikar mein kaise kiya jaa sakta hai?”’+
27 tu unse kehna, ‘saare jahan ka maalik yahova kehta hai, “main apne jeevan ki shapath khaakaar kehta hoon, jo khandharon mein rehte hain woh talvar se maare jaayenge, jo khule maidan mein rehte hain unhein main jangli jaanvaron ka nivala bana doonga aur jo mazboot gadhon aur gufaon mein rehte hain woh beemari se maare jaayenge.+
28 main is desh ko ujaadkar bilkul veeran bana doonga,+ uski taakat ka guroor tod diya jaayega aur main israel ke pahadon ko aisa ujaad doonga+ ki vahaan se koi nahin guzar paayega.
29 jab main unke ghinaune kaamon+ ki vajah se desh ko ujaadkar bilkul veeran bana doonga+ to unhein jaanna hoga ki main yahova hoon.”’
30 insan ke bete, tere log deevaron ki aad mein aur apne ghar ki dehleez par tere baare mein aapas mein baatein karte hain.+ har koi apne bhaai se kehta hai, ‘chalo, chalkar sunte hain ki yahova ne kya sandesh diya hai.’
31 hamesha ki tarah unki bheed tere paas aayegi aur woh tere saamne baithkar teri baatein suneinge, magar unke mutabik kaam nahin kareinge.+ woh munh se to badh-chadhkar teri taareef kareinge,* magar unka dil beimani ki kamai ke liye lalchata hai.
32 dekh! tu unke liye koi prem geet gaanevale jaisa hai, jo taaronvale baaje ki madhur dhun par sureeli aavaz mein geet gaata hai. woh sab tera sandesh suneinge, magar koi uske mutabik kaam nahin karega.
33 aur jab tere sandesh ki baatein sach nikleingi jo ki zaroor sach hongi, tab unhein jaanna hoga ki unke beech koi bhavishyavakta hua karta tha.”+
kai footnote
^ ya “ke liye main pehredar ko zimmedar thehraunga.”
^ ya “anyay.”
^ shaa., “ko yaad nahin kiya jaayega.”
^ inka ibrani shabd shaayad “mal” ke liye istemal honevale shabd se sambandh rakhta hai aur yah batane ke liye istemal hota hai ki kisi cheez se kitni ghin ki jaa rahi hai.
^ ya “to kaam-vaasna se bhari baatein kareinge.”
