yahoshoo 7:1-26
7 israeliyon ne naash ke liye thehrayi cheezon ke baare mein parmeshvar ki aagya todkar vishvasghat kiya. aakan+ ne un cheezon mein se kuch cheezen le li thi.+ isliye yahova ka krodh israeliyon par bhadak utha.+ aakan yahooda gotra se tha, woh karmi ka beta tha, karmi jabdi ka aur jabdi jerah ka.
2 yahoshoo ne yareeho se kuch aadmiyon ko ai naam ki jagah+ bheja, jo betel+ ke poorab mein bet-aaven ke paas thi. usne unse kaha, “jaao, jaakaar us jagah ki jaasoosi karo.” tab unhonne jaakaar ai shehar ki jaasoosi ki.
3 vaapas aane par unhonne yahoshoo se kaha, “ai par hamla bolne ke liye hamari poori sena ko jaane ki zaroorat nahin. us ilake mein bahot kam log rehte hain, unhein harane ke liye hamare do-teen hazar sainik kaafi honge. achha hoga ki hum apne sabhi sainikon ko vahaan le jaakaar na thakayen.”
4 isliye kareeb 3,000 israeli sainik vahaan gaye, lekin unhein ai ke logon se haarkar bhaagna pada.+
5 ai ke aadmiyon ne shehar ke faatak se unka peechha karte huye, unhein pahadi ke neeche shabareem* tak khadeda. unhonne raaste mein 36 israeli sainikon ko maar giraya. isse israeliyon ka dil kaanp utha aur unki himmat toot gayi.*
6 jab yahoshoo ne is baare mein suna to maare dukh ke usne apne kapde faade aur woh yahova ke sandook ke saamne zameen par munh ke bal gir gaya. yahoshoo aur israel ke mukhiya shaam tak isi tarah shok manate rahe aur apne sir par dhool daalte rahe.
7 yahoshoo ne parmeshvar se kaha, “hey saare jahan ke maalik yahova, tu kyon hamein itni door yardan ke paar laaya? kya sirf isliye ki tu hamein emoriyon ke havale kar de aur woh hamein maar daalein? isse to achha hota ki hum yardan ke us paar* hi reh jaate!
8 maaf karna yahova, magar jis tarah israeliyon ko apne dushmanon ke saamne se* bhaagna pada, use dekhkar main aur kya kahoon?
9 jab kanaaniyon aur desh ke baaki nivasiyon ko yah pata chalega, to woh hum par toot padeinge aur dharti se hamara naamo-nishan mita daaleinge. isse tere mahan naam par kitna bada kalank lagega!”+
10 yahova ne yahoshoo se kaha, “uth! tu kyon is tarah zameen par pada shok mana raha hai?
11 israel ne paap kiya hai. unhonne naash ke laayak thehrayi cheezon+ mein se kuch cheezen churayi hain+ aur apne saaman mein chhipa li hain.+ unhonne mera karar tod diya+ jise maanne ki mainne aagya di thi.
12 isliye israeli apne dushmanon ke aage tik nahin paayenge. woh unhein peeth dikhakar bhaag jaayenge kyonki ab woh naash ke laayak thehraye gaye hain. main tab tak tumhara saath nahin doonga, jab tak tum apne beech mein se use nahin mita dete jo naash ke laayak thehraya gaya hai.+
13 ab uth aur logon ko taiyar* kar.+ unse kehna, ‘kal ke liye taiyar ho jaao kyonki israel ke parmeshvar yahova ne kaha hai, “hey israel ke logo, tumhare beech koi hai jo naash ke laayak thehraya gaya hai. jab tak tum use apne beech se mita nahin dete, tab tak tum apne dushmanon ke aage tik nahin paaoge.
14 kal subah tum sab apne-apne gotra ke hisab se ikattha hona. un gotron mein se yahova jis gotra ko alag karega woh aage aaye.+ fir us gotra mein se yahova jis gharane ko alag karega woh aage aaye. us gharane mein se jis parivar ko yahova alag karega woh aage aaye. aur us parivar ke sabhi aadmi ek-ek karke aage aayen.
15 unmein se jo aadmi naash ke laayak thehrayi cheez lene ka doshi paaya jaayega, use aur jo kuch uska hai, sab khatm kar diya jaayega aur jala diya jaayega.+ kyonki us aadmi ne yahova ka karar toda hai+ aur israel mein sharmnak kaam kiya hai.”’”
16 agle din yahoshoo subah-subah utha aur usne sabhi israeliyon ko unke gotron ke hisab se ikattha kiya. tab sab gotron mein se yahooda gotra alag kiya gaya.
17 yahoshoo ne yahooda ke sabhi gharanon ko aage aane ke liye kaha aur unmein se jerah ka gharana+ alag kiya gaya. fir usne jerah ke gharane ke sabhi aadmiyon ko ek-ek karke aage aane ke liye kaha aur unmein se jabdi ko alag kiya gaya.
18 aakhir mein usne jabdi ke parivar ke sabhi aadmiyon ko ek-ek karke aage aane ke liye kaha. aur aakan ko alag kiya gaya.+ yahooda gotra ka aakan karmi ka beta tha, karmi jabdi ka aur jabdi jerah ka.
19 tab yahoshoo ne aakan se kaha, “mere bete, israel ke parmeshvar yahova ke saamne apna paap kabool kar aur uska aadar kar. sach-sach bata ki toone kya kiya hai. mujhse kuch mat chhipa.”
20 aakan ne yahoshoo se kaha, “haan, main hi woh aadmi hoon jisne israel ke parmeshvar yahova ke khilaf paap kiya hai.
21 jab main loot ka maal ikattha kar raha tha, tab meri nazar shinar+ ki ek sundar aur mahangi poshak par padi. mainne 200 shekel* chaandi aur sone ki ek int bhi dekhi jiska vazan 50 shekel tha. mera man lalchane laga aur main unhein apne tamboo mein le aaya. tujhe woh cheezen mere tamboo mein zameen mein gadi mileingi aur sona-chaandi sabse neeche rakha hoga.”
22 tab yahoshoo ne fauran apne aadmiyon ko bheja aur woh bhaagkar aakan ke tamboo mein gaye. poshak zameen mein gadi hui mili aur sona-chaandi sabse neeche rakha hua tha.
23 unhonne woh cheezen tamboo se lin aur unhein yahoshoo aur saare israeliyon ke paas le aaye aur yahova ke saamne rakha.
24 yahoshoo aur saare israeli, jerah ke bete aakan+ ko aur uski churayi chaandi, mahangi poshak, sone ki int,+ saath hi uske bete-betiyonn, bail, gadhon aur bhed-bakriyon aur uske tamboo ko aur jo kuch uska tha, sabkuch lekar aakor ghaati+ mein aaye.
25 yahoshoo ne aakan se kaha, “tu kyon hum par yah aafat* laaya?+ ab dekh yahova tujh par aafat laayega.” iske baad saare israeliyon ne unhein pattharon se maar daala+ aur aag mein jala diya.+ is tarah unhonne pattharon se unhein maut ke ghaat utar diya.
26 unhonne us par pattharon ka ek bada dher laga diya jo aaj bhi vahaan hai. tab yahova ka krodh shaant ho gaya.+ is ghatna ki vajah se aaj tak woh jagah aakor* ghaati ke naam se jaani jaati hai.
kai footnote
^ matlab “khadanein.”
^ shaa., “ka dil pighalkar paani jaisa ho gaya.”
^ yaani poorab mein.
^ ya “ko peeth dikhakar.”
^ ya “pavitra.”
^ ek shekel ka vazan 11.4 g. tha. ati. kha14 dekhein.
^ ya “ghor sankat.”
^ matlab “aafat; ghor sankat.”
