yuhanna ke mutabik khushkhabri 18:1-40
-
yahooda, yeeshu ke saath gaddari karta hai (1-9)
-
patras talvar chalata hai (10, 11)
-
yeeshu, hanna ke paas le jaaya gaya (12-14)
-
patras pehali baar inkar karta hai (15-18)
-
yeeshu, hanna ke saamne (19-24)
-
patras doosri aur teesri baar inkar karta hai (25-27)
-
yeeshu, peelatus ke saamne (28-40)
-
“mera raaj is duniya ka nahin hai” (36)
-
18 ye baatein kehne ke baad, yeeshu apne chelon ke saath kidron ghaati*+ paar karke us jagah gaya jahaan ek baag tha. woh aur uske chele baag ke andar gaye.+
2 uske saath gaddari karnevale yahooda ko bhi is jagah ka pata tha, kyonki yeeshu aksar apne chelon ke saath vahaan jaaya karta tha.
3 isliye yahooda apne saath sainikon ke dal ko aur pradhan yaajkon aur fareesiyon ke pehredaron ko lekar vahaan aaya. woh apne haath mein mashalein, deepak aur hathiyar liye huye the.+
4 yeeshu jaanta tha ki uske saath kya-kya honevala hai, isliye usne aage aakaar unse kaha, “tum kise dhoondh rahe ho?”
5 unhonne kaha, “yeeshu naasri ko.”+ yeeshu ne unse kaha, “main vahi hoon.” uske saath gaddari karnevala yahooda bhi unke saath khada tha.+
6 magar jab yeeshu ne kaha, “main vahi hoon,” to woh peechhe hat gaye aur zameen par gir pade.+
7 isliye yeeshu ne unse dobara poochha, “tum kise dhoondh rahe ho?” unhonne kaha, “yeeshu naasri ko.”
8 yeeshu ne kaha, “main tumse kah chuka hoon ki main vahi hoon. agar tum mujhe dhoondh rahe ho, to inhein jaane do.”
9 yah isliye hua taaki uski yah baat poori ho, “jinhein toone mujhe diya hai, unmein se mainne ek ko bhi nahin khoya.”+
10 shamaun patras ke paas talvar thi. usne talvar khinchkar mahayajak ke daas par vaar kiya jisse uska daayaan kaan kat gaya.+ us daas ka naam malkhus tha.
11 magar yeeshu ne patras se kaha, “talvar myan mein rakh le.+ pita ne jo pyala mujhe diya hai, kya woh mujhe nahin peena chahiye?”+
12 tab sainikon aur senapati ne aur yahoodiyon ke bheje huye pehredaron ne yeeshu ko pakad* liya aur use baandh diya.
13 woh use pehale hanna ke paas le gaye kyonki woh us saal ke mahayajak kaifa ka sasur tha.+
14 darasal kaifa ne hi yahoodiyon ko salah di thi ki yah unke faayde mein hai ki ek aadmi sab logon ki khaatir mare.+
15 shamaun patras aur ek aur chela yeeshu ka peechha karte huye gaye.+ yah chela mahayajak ki jaan-pehchan ka tha aur woh yeeshu ke saath mahayajak ke ghar ke aangan mein gaya.
16 magar patras baahar darvaze* par khada tha. isliye woh doosra chela, jo mahayajak ki jaan-pehchan ka tha, baahar gaya aur usne darban se baat ki, fir woh patras ko andar le aaya.
17 tab us naukrani ne jo darban thi, patras se kaha, “tu bhi is aadmi ka chela hai na?” usne kaha, “nahin, main nahin hoon.”+
18 vahaan daas aur pehredar khade the, jo thand ki vajah se lakdi jalakar aag taap rahe the. patras bhi unke saath khada aag taap raha tha.
19 tab pradhan yaajak ne yeeshu se uske chelon aur uski shikshaon ke baare mein kuch saval kiye.
20 yeeshu ne javab diya, “mainne poori duniya ke saamne baat ki hai. main hamesha sabha-ghar aur mandir mein sikhaya karta tha,+ jahaan sabhi yahoodi ikattha hote hain aur mainne kuch bhi chhipkar nahin kaha.
21 to fir tu mujhse kyon poochhta hai? jinhonne meri baatein suni hain unse poochh ki mainne unse kya-kya kaha tha. dekh! ye jaante hain ki mainne kya bataya tha.”
22 jab usne yah kaha, to vahaan khade pehredaron mein se ek ne yeeshu ke munh par thappad maara+ aur kaha, “kya pradhan yaajak ko javab dene ka yah tareeka hai?”
23 yeeshu ne use javab diya, “agar mainne kuch galat kaha, to mujhe bata. lekin agar mainne sahi kaha, to toone mujhe kyon maara?”
24 tab hanna ne use bandha hua, mahayajak kaifa ke paas bhej diya.+
25 shamaun patras vahaan khada aag taap raha tha. tab logon ne usse kaha, “kya tu bhi uska chela nahin?” usne inkar kiya aur kaha, “nahin, main nahin hoon.”+
26 vahaan mahayajak ka ek daas bhi khada tha, jo us aadmi ka rishtedar tha jiska kaan patras ne kaat diya tha.+ us daas ne kaha, “kya mainne tujhe uske saath baag mein nahin dekha tha?”
27 magar patras ne fir inkar kiya aur fauran ek murge ne baang di.+
28 tab woh yeeshu ko kaifa ke yahaan se raajyapal ke ghar le gaye.+ yah subah ka vakt tha. magar woh khud raajyapal ke ghar ke andar nahin gaye taaki woh dooshit na ho jaayen+ aur fasah ka khaana khaa sakein.
29 isliye peelatus baahar unke paas aaya aur usne kaha, “tum is aadmi ko kis ilzam mein mere paas laaye ho?”
30 unhonne kaha, “agar yah apradhi* na hota, to hum ise tere havale nahin karte.”
31 tab peelatus ne unse kaha, “tumhin ise le jaao aur apne kaanoon ke mutabik iska nyay karo.”+ yahoodiyon ne usse kaha, “kaanoon ke hisab se hamein kisi ko jaan se maarne ka adhikar nahin hai.”+
32 yah isliye hua taaki yeeshu ne jo kaha tha woh poora ho, usne pehale hi bata diya tha ki woh kaisi maut marnevala hai.+
33 tab peelatus fir se apne ghar mein gaya aur yeeshu ko bulakar usne poochha, “kya tu yahoodiyon ka raja hai?”+
34 yeeshu ne javab diya, “kya tu yah apni taraf se kah raha hai ya doosron ne tujhe mere baare mein bataya hai?”
35 peelatus ne javab diya, “kya main yahoodi hoon? tere apne logon ne aur pradhan yaajkon ne tujhe mere havale kiya hai. bata toone kya kiya hai?”
36 yeeshu ne javab diya,+ “mera raaj is duniya ka nahin hai.+ agar mera raaj is duniya ka hota to mere sevak ladte ki mujhe yahoodiyon ke havale na kiya jaaye.+ magar sach to yah hai ki mera raaj is duniya ka nahin.”
37 peelatus ne usse kaha, “to kya tu ek raja hai?” yeeshu ne javab diya, “tu khud kah raha hai ki main ek raja hoon.+ main iseeliye paida hua hoon aur is duniya mein aaya hoon ki sachchai ki gavahi doon.+ har koi jo sachchai ke paksh mein hai woh meri aavaz sunta hai.”
38 peelatus ne usse kaha, “sachchai kya hai?”
yah kehne ke baad peelatus fir se baahar yahoodiyon ke paas gaya aur unse kaha, “mujhe usmein koi dosh nazar nahin aata.+
39 tumhare dastoor ke mutabik mujhe fasah ke tyohar par ek aadmi ko kaid se riha karna chahiye.+ kya tum chahte ho ki main tumhare liye yahoodiyon ke is raja ko riha karoon?”
40 tab woh fir se chillaye, “nahin, is aadmi ko nahin, balki barabba ko riha kar!” darasal barabba ek daakoo tha.+
kai footnote
^ ya “sardiyon mein behnevali kidron nadi.”
^ ya “giraftar kar.”
^ ya “pravesh-dvar.”
^ ya “mujrim.”
