shastra kehta hai, “jeevte to itna jaante hain ki woh mareinge, parantu mare huye kuch bhi nahin jaante.” (sabhopdeshak 9:5; bhajan 146:4) isliye jab hum marte hain to hamara astitva mit jaata hai. jo mar chuke hain na to woh soch sakte hain, na koi kaam kar sakte hain aur na hi kuch mehsoos kar sakte hain.

“mitti hi mein fir mil jaayega”

parmeshvar jab pehle insan aadam se baat kar raha tha tab usne use bataya tha ki jab hum marte hain to kya hota hai. aadam ne parmeshvar ki aagya nahin maani isliye parmeshvar ne usse kaha, “tu mitti to hai aur mitti hi mein fir mil jaayega.” (utpatti 3:19) aadam to astitva mein tha hi nahin jab tak ki parmeshvar ne use “bhoomi ki mitti se racha” nahin tha. (utpatti 2:7) isliye jab aadam mar gaya to woh mitti mein mil gaya aur uska astitva mit gaya.

aaj jo log marte hain unke saath bhi yahi hota hai. insan aur jaanvar donon ke baare mein shastra mein likha hai, “sab mitti se bane hain, aur sab mitti mein fir mil jaate hain.”—sabhopdeshak 3:19, 20.

aisa nahin ki jo mar chuke hain, unke liye koi aasha nahin hai

shastra mein aksar maut ki tulna nind se ki gayi hai. (bhajan 13:3; yuhanna 11:11-14; preshiton 7:60) ek vyakti jo gehri nind mein hai use yah nahin pata hota ki uske aas-paas kya ho raha hai. theek usi tarah jo mar chuke hain woh kuch nahin jaante ya aas-paas ki cheezon se anjan hain. magar bible sikhati hai ki parmeshvar un logon ko fir se zinda karega jo mar chuke hain, theek jaise kisi ko nind se jagaya jaata hai. (ayyoob 14:13-15) jin logon ko parmeshvar dobara zinda karnevala hai, woh naa-ummeed nahin hain.