Halin sang Nobiembre 1, 2023, asta Enero 31, 2024, sobra 19,000 ka Saksi ni Jehova ang nakigbahin sa special preaching campaign sa Bolivia kag Colombia. Sa tion sang kampanya, ang mensahe sang paglaum nga mabasa sa Biblia ginbantala sa Spanish kag sa 18 pa ka lenguahe, lakip ang Bolivian kag Colombian sign language.

Nakibot ang isa ka brother nga nagahambal sang Spanish sa Guadalupe, Colombia, sang ginbuksan sang babayi ang puertahan sang ila balay kag ginsilingan sia nga “Ginahulat ka gid namon!” Ang babayi nagsiling nga sang nagligad nga inadlaw, gin-istoryahan nila sang iya bana kon bala maselebrar pa sila sang pila ka selebrasyon may labot sa relihion. Siling sang iya bana nga nakita niya ang aton mga utod nga naga-preaching malapit sa ila balay. Sigurado sia nga bisitahan sila sang mga Saksi kag sabton ang ila mga pamangkot. Nalipay gid ang aton mga utod nga buligan ang pamilya nga matun-an kon ano ang ginatudlo sang Biblia kag naghimo man sila sing kahimusan para padayon nga mabisitahan ang pamilya.

Samtang nagabantala sa banwa sang Cuatro Cañadas, Bolivia, gin-istorya sang duha ka sister ang isa ka babayi nga si Miguelina sa gua sang isa ka tiendahan. Sang nabal-an nila nga bag-o lang sia napatyan sang pinalangga, ginbasa sang mga sister ang Bugna 21:3, 4. Siling ni Miguelina nga gusto niya magtuon sing dugang parte sa Biblia. Pero, nagaistar sia sa malayo nga lugar kag wala sia sang telepono. Pagligad sang pila ka adlaw, ang duha ka sister nag-preaching sa isa ka pamatan-on nga babayi nga ang balay ara sa malayo nga bahin sang amo gihapon nga banwa. Gulpi lang nga naggua si Miguelina sa balay. Nakibot ang mga sister sang nabal-an nila nga ang pamatan-on nga babayi nga ila ginaistorya, bata gali ni Miguelina. Grabe gid ang ila kalipay! Gani, naghimo sila sing schedule para makasugod sa pag-Bible study ang bilog nga pamilya.

Nagasalig kita nga ginaapresyar gid ni Jehova ang mga panikasog sang aton mga kauturan nga nakigbahin sa sini nga kampanya kag padayon niya nga pakamaayuhon ang iya katawhan samtang ginabantala naton ang maayong balita “sa tanan nga tinuga sa idalom sang langit.”—Colosas 1:23.