Sang Abril 2023, ginsentensiahan nga guilty si Brother Rinat Kiramov. Napriso sia subong sa isa ka penal colony bangod sang iya pito ka tuig nga sentensia. Isa ka tuig sa tapos sia masentensiahan, sang Abril 18, 2024, gulpi lang ginsaylo si Rinat sang mga awtoridad halin sa penal colony pakadto sa isa ka malapit nga prisuhan diin ginabulong ang may masakit nga mga priso. Nagsiling ang mga awtoridad nga “ginsuspetsahan” nga may tuberculosis si Rinat. Duha ka adlaw sa tapos sia nakaabot, may grupo sang mga priso nga nag-interogar kay Rinat. Ginapilit nila sia nga maghatag sang impormasyon parte sa mga Saksi ni Jehova nga ara sa ila siudad sang Akhtubinsk. Sang indi manugid si Rinat, gin-torture nila sia. Sa sunod nga apat ka adlaw, naggamit sila sang sarisari nga paagi para i-torture sia, kag naggamit pa gani sila sang stun gun. Dugang pa, wala man nila ginpasugtan si Rinat nga magtulog, magpungko, ukon magpaligo. Ginasiguro nila nga indi sia matulugan kag ginapatindog lang sia sa bilog nga adlaw kag gab-i. Isa ka bes lang sia ginapakaon kada adlaw.

Pila ka adlaw halin sang nagsugod ang pag-torture sa iya, ang asawa ni Rinat nga si Galina nagbisita sa prisuhan. Nakibot gid ang iya asawa sang makita niya nga puno sang lagob ang guya ni Rinat, indi sia maayo makalakat, kag nagakurogkurog ang iya kamot. Ginsugid ni Rinat sa iya asawa ang natabo, gani nanugid si Galina sa abogado ni Rinat. Kag insigida nga nag-request ang abogado nga ipaeksamin sa doktor si Rinat bangod sang iya mga pilas kag imbestigahan ang natabo sa iya.

Sang nareport na ini sa opisina sang piskal, ginkadtuan nila si Rinat kag ginpaeksamin sia sa doktor. Sa tapos mabal-an sang doktor nga gin-torture si Rinat, ginsaylo ang iya kaso sa Ministry of Internal Affairs para marebyu ini. Dugang pa, napamatud-an man nga wala sing tuberculosis si Rinat, kag ginsaylo sia halin sa medical facility pabalik sa penal colony sang Mayo 17, 2024. Didto sia gihapon asta subong.

Ginsugid ni Rinat kay Galina kon ano ang nakabulig sa iya nga makabatas: “Ang mahimo ko lang gid amo ang pagpangamuyo kag ang pagdumdom sang mga bersikulo sa Biblia. Amo lang ini ang indi nila makuha sa akon. Maayo lang kay palatuon ako sa Biblia antes ini natabo, gani madamo ako sang nadumduman nga teksto.” Siling pa ni Rinat: “May mga tawo nga nag-antos sang mapintas nga pagmaltrato bangod sang ila ginapatihan pero wala sila ginabuligan sang balaan nga espiritu ni Jehova. Samtang ako ’ya ginapabakod sang wala limitasyon nga gahom ni Jehova. Siling ko: ‘Subong ko gid mapamatud-an ang akon pagpalangga kay Jehova. Magapabilin gid ako nga matutom sa iya.’”

Bisan pa nagalalain kita nga mabalitaan ang pag-torture nga gin-antos ni Rinat, makapaumpaw gid nga mabal-an nga si Jehova padayon nga nagahatag sang “gahom nga labaw sa kinaandan” para makabatas kita.—2 Corinto 4:7.