Sang Pebrero 11, 2024, ang 2024 Super Bowl, nga isa ka kilala nga event sa football sa America, ginhiwat sa Las Vegas, Nevada, U.S.A. Sina nga semana antes sang hampang, mga 300,000 ka tawo ang nagkadto sa sina nga lugar. May gin-display nga mga cart sa 50 ka lokasyon nga may madamo nga tawo sa Las Vegas Boulevard, nga isa sa pinakamasako nga dalan sa siudad. Ang base sa Biblia nga mga publikasyon available sa siam ka lenguahe. Mga 1,500 ka kauturan ang nagpartisipar sa sining espesyal nga kampanya. Ari ang pila sa madamo kag manami nga mga eksperiensia sang aton mga kauturan sa sina nga event.

May isa ka lalaki nga naglabay sa cart nga naga-display sang pamangkot nga “Makay-o Pa Bala ang Aton Planeta?” Nagbalikid sia dayon kag nagpalapit sa mga Saksi nga nagatindog sa tupad sang cart. Nabalaka gid sia sa mga nagakatabo sa kalibutan subong kag nanamian gid sia sang nabal-an niya ang promisa sang Biblia parte sa paghidait sa Jeremias 29:11. Sobra isa ka oras sia nagpakig-istorya sa mga utod sa cart. Antes sia naglakat, nagsiling sia nga gusto man niya mag-attend sa miting.

Sa isa pa ka lokasyon malapit sa stadium diin hiwaton ang Super Bowl, nakita sang isa ka security guard ang sign sa isa sa aton mga cart nga may pareho nga pamangkot, “Makay-o Pa Bala ang Aton Planeta?” Bangod naga-duty pa sia, ginsilingan niya ang aton mga utod nga mabalik sia pagkatapos sang iya obra. Wala madugay, nagbalik sia kag nagsiling nga ginsugdan niya sining karon lang ang pagbasa sang Biblia. Sang ginsugiran sia sang mga utod parte sa aton programa sa pag-Bible study, gusto niya makatuon sing dugang pa. May ginhimo nga kahimusan para may magkontak sa iya.

Isa ka adlaw antes sang Super Bowl, may isa ka babayi nga nabantalaan sa pagpamalaybalay nga ministeryo. Nagsiling sia nga nakita niya sa news sa TV ang parte sa aton mga cart. “Maayo gid ang ginahimo ninyo,” siling niya. “Sa sining mabudlay nga mga tion, kinahanglan gid naton sang paglaum.” Dayon, namangkot sia kon diin kag kon san-o nagatipon para magsimba ang mga Saksi ni Jehova sa iya lugar.

Nalipay kita nga padayon nga nagapamati ang mga tawo samtang ‘nagapanawag ang kaalam’ sa publiko nga mga lugar paagi sa sining espesyal nga pagpanaksi, para sa kadayawan sang aton Dios, nga si Jehova.—Hulubaton 1:20, 21.