Bugna 8:1-13
8 Sang ginhukas niya+ ang ikapito nga selyo,+ naglinong sa langit sa sulod sang mga tunga sa oras.
2 Kag nakita ko ang pito ka anghel+ nga nagatindog sa atubangan sang Dios, kag ginhatagan sila sing pito ka trumpeta.
3 Isa pa ka anghel nga may bulawan nga suludlan* sang incienso ang nag-abot kag nagtindog sa luyo sang halaran.+ Kag ginhatag sa iya ang madamo nga incienso+ agod ihalad ini sa bulawan nga halaran+ sa atubangan sang trono samtang nagapangamuyo ang tanan nga balaan.
4 Nagpaibabaw ang aso sang incienso halin sa kamot sang anghel kag ang mga pangamuyo+ sang mga balaan sa atubangan sang Dios.
5 Dayon ginkuha sang anghel ang suludlan sang incienso, kag ginpuno ini sing kalayo halin sa halaran kag ginhaboy ang kalayo sa duta. Dayon nagdaguob, nagpangilat,+ naglinog, kag nakabati ako sang mga tingog.
6 Kag ang pito ka anghel nga may pito ka trumpeta+ naghanda sa pagpatunog sang ila trumpeta.
7 Ginpatunog sang nahauna nga anghel ang iya trumpeta. Kag nag-ulan sa duta sang yelo kag kalayo nga nasimbugan sing dugo.+ Kag nasunog ang ikatlo nga bahin sang duta, ang ikatlo nga bahin sang mga kahoy, kag ang tanan nga berde nga tanom.+
8 Ginpatunog sang ikaduha nga anghel ang iya trumpeta. Kag gintagbong sa dagat ang kaangay sa isa ka daku nga bukid nga nagakalayo.+ Kag nangin dugo ang ikatlo nga bahin sang dagat;+
9 kag nagkalamatay ang ikatlo nga bahin sang buhi nga mga tinuga sa dagat,*+ kag nawasak ang ikatlo nga bahin sang mga barko.
10 Ginpatunog sang ikatlo nga anghel ang iya trumpeta. Kag nahulog halin sa langit ang daku nga bituon nga nagadabdab kaangay sang isa ka sulo, kag nagtupa ini sa ikatlo nga bahin sang mga suba kag sa mga tuburan sang tubig.+
11 Ang ngalan sang bituon Ajenjo.* Kag nangin mapait ang ikatlo nga bahin sang tubig, kag nagkalamatay ang madamo nga tawo bangod nagpait ang tubig.+
12 Ginpatunog sang ikap-at nga anghel ang iya trumpeta. Kag nagdulom+ ang ikatlo nga bahin sang adlaw,+ ang ikatlo nga bahin sang bulan, kag ang ikatlo nga bahin sang mga bituon. Gani, wala sing kapawa ang ikatlo nga bahin sang adlaw kag sang gab-i.
13 Kag nakita ko ang agila nga nagalupad sa tunga sang kalangitan. Nabatian ko ini nga nagasiling sing mabaskog: “Kailo, kailo, kailo+ ang mga nagaistar sa duta bangod sang tatlo pa ka trumpeta nga buot na patunugon sang tatlo ka anghel!”+
