Ester 1:1-22
1 Sang panahon ni Ahasuero,* naghari sia sa 127 ka probinsia*+ halin sa India tubtob sa Etiopia.*
2 Ang iya trono yara sa palasyo sang Susan.*+
3 Sang ikatlo nga tuig sang iya paghari, naghiwat sia sing sinalusalo para sa tanan niya nga mga prinsipe kag mga alagad. Ang kasuldadusan sang Persia+ kag Media,+ ang mga dungganon, kag ang mga gobernador sang mga probinsia* yara sa atubangan niya.
4 Kag ginpakita niya sa ila ang manggad kag ang katahom sang iya mahimayaon nga ginharian kag ang iya kadungganan kag ang iya kagamhanan sa sulod sang madamo nga adlaw, 180 ka adlaw.
5 Pagkatapos sini, naghiwat man ang hari sing sinalusalo sa sulod sang pito ka adlaw para sa tanan nga yara sa palasyo sang Susan,* halin sa pinakadungganon tubtob sa pinakakubos. Ginhiwat ini sa hardin sang palasyo sang hari.
6 May puti nga linen kag mahumok nga asul nga kurtina nga ginhigtan sang higot nga human sa maayo nga klase sang tela, purpura* nga de-lana nga ginpakabit sa mga sulusingsing nga pilak, marmol nga mga haligi, kag mga hiligdaan nga bulawan kag pilak nga nahamtang sa salog nga human sa porpiro,* marmol, perlas, kag itom nga marmol.
7 Nag-inom sila sing alak sa bulawan nga mga tagayan* nga may nagkalainlain nga mga desinyo, kag may bugana nga alak, suno sa masarangan sang hari.
8 Kag wala sila mag-inom suno sa ginapatuman sang kasuguan, kay nagsugo ang hari sa mga manugdumala sang iya panimalay nga pagustuhan lang sila.
9 Naghiwat man si Rayna Vasti+ sing sinalusalo para sa mga babayi sa balay* ni Hari Ahasuero.
10 Sang ikapito nga adlaw, sang malipayon ang hari bangod sa alak, ginsugo niya sanday Mehuman, Bizta, Harbona,+ Bigta, Abagta, Zetar, kag Carkas, ang pito ka opisyal sang palasyo nga nagaalagad sa atubangan ni Hari Ahasuero,
11 nga pakadtuon sa iya si Rayna Vasti nga nagasuksok sing harianon nga purongpurong,* agod ipakita sa mga tawo kag sa mga prinsipe ang iya katahom, kay tuman gid sia katahom.
12 Apang padayon nga nangindi si Rayna Vasti sa pagtuman sa sugo sang hari nga ginsiling sa iya sang mga opisyal sang palasyo. Bangod sini naakig gid ang hari.
13 Gani, nakighambal ang hari sa mga maalamon nga tawo nga nakahibalo sang kinabatasan sadto nga tion* (kay ang hari pirme nagapangayo sing laygay sa tanan nga sampaton sa kasuguan,
14 kag ang pinakamalapit nga mga manuglaygay sang hari amo sanday Carsena, Setar, Admata, Tarsis, Meres, Marsena, kag Memucan, pito ka prinsipe+ sang Persia kag Media kag mga pangulo sa ginharian).
15 Namangkot ang hari: “Suno sa kasuguan ano ang dapat himuon kay Rayna Vasti bangod wala sia magtuman sa akon sugo nga ginsiling ko sa mga opisyal sang palasyo?”
16 Nagsiling si Memucan sa hari kag sa mga prinsipe: “Indi lamang sa hari nakasala si Rayna Vasti,+ kundi sa tanan man nga prinsipe kag pumuluyo sang tanan nga probinsia* ni Hari Ahasuero.
17 Kay ang ginhimo sang rayna mahibaluan sang tanan nga asawa kag indi na nila pagtahuron ang ila mga bana, kag magasiling sila, ‘Wala gani magkadto si Rayna Vasti sang ginpatawag sia ni Hari Ahasuero.’
18 Halin subong amo man ina ang himuon sang mga asawa sang mga prinsipe sang Persia kag Media nga nakabati sang ginhimo sang rayna, indi na sila magtahod sa ila mga bana, kag magaresulta ini sa daku nga kaakig sang ila mga bana.
19 Kon buot sang hari, maghimo sia sing sugo, kag ini nga sugo ilakip sa mga kasuguan sang Persia kag Media, agod indi na ini mabag-o,+ nga si Vasti indi na gid makaatubang kay Hari Ahasuero; kag ang iya pagkarayna ihatag sang hari sa iban nga babayi nga mas maayo sangsa iya.
20 Kon ang sugo sang hari mabatian sang bug-os niya nga ginharian, tahuron sang tanan nga asawa ang ila mga bana, halin sa pinakadungganon tubtob sa pinakakubos.”
21 Nahamuot ang hari kag ang mga prinsipe sa sini nga laygay, kag ginhimo sang hari ang ginsiling ni Memucan.
22 Gani nagpadala sia sing sulat sa tanan nga probinsia sang iya ginharian,*+ sa tagsa ka probinsia* suno sa naandan sini nga paagi sang pagsulat* kag sa tagsa ka tawo suno sa ila kaugalingon nga hambal, agod ang tanan nga bana maggamit sang iya kaugalingon nga hambal subong manugdumala* sa iya panimalay.
Footnote
^ Ginhangop nga amo si Xerxes I, anak ni Dario nga Daku (Darius Hystaspis).
^ Ukon “sakop nga mga distrito.”
^ Ukon “Cus.”
^ Ukon “Susa.”
^ Ukon “sakop nga mga distrito.”
^ Ukon “Susa.”
^ Ang kolor nga purpura kombinasyon sang pula kag asul.
^ Isa ka sahi sang matig-a kag malahalon nga bato, sa masami pula ang kolor kag may pintokpintok nga puti.
^ Ukon “suludlan; kopa.”
^ Ukon “palasyo.”
^ Ukon “turbante.”
^ Ukon “sang mga pamaagi.” Sa literal, “sang mga tion.”
^ Ukon “sakop nga mga distrito.”
^ Sa literal, “sakop nga mga distrito sang hari.”
^ Ukon “sakop nga distrito.”
^ Ukon “estilo sang pagsulat.”
^ Ukon “prinsipe.”
