Levitico 8:1-36
-
Pag-orden sa pamilya ni Aaron bilang saserdote (1-36)
8 Nagsiling pa si Jehova kay Moises:
2 “Paupda si Aaron kag ang iya mga anak+ kag dalha ang mga panapton,+ ang inughaplas nga lana,+ ang baka nga dulot tungod sa sala, ang duha ka karnero nga lalaki, kag ang alat sang mga tinapay nga wala sing lebadura,+
3 kag tipuna ang bug-os nga katilingban sa puertahan sang tolda nga tilipunan.”*
4 Ginhimo ni Moises ang ginsugo ni Jehova sa iya, kag nagtipon ang katilingban sa puertahan sang tolda nga tilipunan.
5 Nagsiling si Moises sa katilingban: “Amo ini ang ginsugo ni Jehova nga himuon naton.”
6 Gani ginpapalapit ni Moises si Aaron kag ang iya mga anak kag ginpapaligo sila.+
7 Pagkatapos sini, ginpasuksok niya kay Aaron ang malaba nga bayo,+ ginwagkusan sia sing paha,+ ginpasuksok sa iya ang wala-pako nga bayo+ kag ang efod,+ kag ginwagkus niya sing maayo ang hinabol nga paha*+ para sa efod.
8 Dayon ginpasuksok niya sa iya ang tabon sa dughan+ kag ginbutang sa tabon sa dughan ang Urim kag ang Tumim.*+
9 Dayon ginbutang niya ang turbante+ sa iya ulo, kag gintakod niya sa atubangan sang turbante ang mahining nga pidaso nga bulawan, ang balaan nga tanda sang pagdedikar,*+ suno sa ginsugo ni Jehova kay Moises.
10 Dayon ginkuha ni Moises ang inughaplas nga lana kag ginhaplasan niya ang tabernakulo kag ang tanan nga yara sa sini+ kag ginpakabalaan ini.
11 Dayon ginwisikan man niya sini sing pito ka beses ang halaran kag ginhaplasan ang halaran kag ang tanan nga kagamitan sini kag ang labador kag ang tulungtungan sini agod mapakabalaan ini.
12 Pagkatapos sini, ginbubo niya ang iban nga inughaplas nga lana sa ulo ni Aaron kag ginhaplasan sia agod mapakabalaan sia.+
13 Dayon ginpapalapit ni Moises ang mga anak ni Aaron kag ginpasuksukan sila sing malaba nga mga bayo kag ginwagkusan sila sing mga paha kag ginpasuksukan* sing pandong ang ila ulo,+ suno sa ginsugo ni Jehova kay Moises.
14 Dayon gindala niya ang baka nga dulot tungod sa sala, kag gintungtong ni Aaron kag sang iya mga anak ang ila kamot sa ulo sang baka nga dulot tungod sa sala.+
15 Gin-ihaw ini ni Moises kag paagi sa iya tudlo nagkuha sia sing dugo+ kag ginpalhit ini sa tanan nga sungay sang halaran kag ginpaputli niya ang halaran,* apang ginbubo niya ang nabilin nga dugo sa tiilan sang halaran. Sa sini nga paagi ginpakabalaan niya kag gintinluan ini.
16 Pagkatapos sini, ginkuha niya ang tanan nga sapay sa tinai, ang sapay sa atay, ang duha ka batobato kag ang sapay sini, kag ginpaaso ini ni Moises sa halaran.+
17 Dayon ginpasunog niya sa gua sang kampo ang nabilin nga parte sang baka, ang panit, ang karne, kag ang ipot sini,+ suno sa ginsugo ni Jehova kay Moises.
18 Pagkatapos sini, gindala niya ang karnero nga lalaki nga dulot nga sinunog, kag gintungtong ni Aaron kag sang iya mga anak ang ila kamot sa ulo sang karnero nga lalaki.+
19 Dayon gin-ihaw ini ni Moises kag ginwisik ang dugo sini sa palibot sang halaran.
20 Ginhiwahiwa niya ang karnero nga lalaki, kag ginsunog ni Moises ang ulo, ang mga hiniwa, kag ang sapay.*
21 Ginhugasan niya ang tinai kag ang mga batiis. Dayon ginpaaso ni Moises sa halaran ang bug-os nga karnero nga lalaki. Isa ini ka dulot nga sinunog bilang makapahamuot* nga kahumot. Isa ini ka dulot nga sinunog sa kalayo para kay Jehova, suno sa ginsugo ni Jehova kay Moises.
22 Dayon gindala niya ang ikaduha nga karnero nga lalaki nga ihalad para sa pag-orden sa saserdote,+ kag gintungtong ni Aaron kag sang iya mga anak ang ila kamot sa ulo sang karnero nga lalaki.+
23 Gin-ihaw ini ni Moises kag ginkuha ang iban nga dugo sini kag ginpalhit ini sa labit sang tuo nga dulunggan ni Aaron kag sa kumalagko sang iya tuo nga kamot kag sa kumalagko sang iya tuo nga tiil.
24 Dayon ginpapalapit ni Moises ang mga anak ni Aaron kag ginpalhit ang iban nga dugo sa labit sang ila tuo nga dulunggan kag sa kumalagko sang ila tuo nga kamot kag sa kumalagko sang ila tuo nga tiil; apang ginwisik ni Moises ang nabilin nga dugo sa palibot sang halaran.+
25 Dayon ginkuha niya ang sapay, ang matambok nga ikog, ang tanan nga sapay sa tinai, ang sapay sang atay, ang duha ka batobato kag ang sapay sini, kag ang tuo nga batiis.+
26 Halin sa alat sang mga tinapay nga wala sing lebadura nga yara sa atubangan ni Jehova nagkuha sia sing isa ka korte-pulseras nga tinapay nga wala sing lebadura,+ sing isa ka korte-pulseras nga tinapay nga ginbutangan sing lana,+ kag sing isa ka manipis nga tinapay. Gintungtong niya ini sa mga sapay kag sa tuo nga batiis.
27 Dayon ginbutang niya ini tanan sa mga palad ni Aaron kag sa mga palad sang iya mga anak kag ginhaboghabog nila ini bilang dulot nga hinabog sa atubangan ni Jehova.
28 Dayon ginkuha ini ni Moises sa ila mga palad kag ginpaaso ini sa ibabaw sang dulot nga sinunog sa halaran. Isa ini ka halad para sa pag-orden sa saserdote bilang makapahamuot* nga kahumot. Isa ini ka dulot nga sinunog sa kalayo para kay Jehova.
29 Dayon ginkuha ni Moises ang dughan kag ginhaboghabog ini bilang dulot nga hinabog sa atubangan ni Jehova.+ Amo ini ang parte ni Moises halin sa karnero nga lalaki nga ginhalad para sa pag-orden sa saserdote, suno sa ginsugo ni Jehova kay Moises.+
30 Kag nagkuha si Moises sing inughaplas nga lana+ kag sing dugo nga yara sa halaran kag ginwisik ini kay Aaron kag sa iya mga panapton kag sa iya mga anak kag sa mga panapton sang iya mga anak nga kaupod niya. Sa sini nga paagi ginpakabalaan niya si Aaron kag ang iya mga panapton kag ang iya mga anak+ kag ang ila mga panapton.+
31 Dayon nagsiling si Moises kay Aaron kag sa iya mga anak: “Lagaa+ ninyo ang karne sa puertahan sang tolda nga tilipunan, kag kaunon ninyo ini didto kag ang tinapay sa alat nga ginagamit para sa pag-orden sa saserdote, suno sa ginsugo sa akon, ‘Si Aaron kag ang iya mga anak magakaon sini.’+
32 Sunugon ninyo ang mabilin nga karne kag tinapay.+
33 Indi kamo magpalayo sa puertahan sang tolda nga tilipunan sa sulod sang pito ka adlaw, tubtob sa adlaw nga matapos ang mga adlaw sang pag-orden sa inyo, kay magalawig sing pito ka adlaw ang pag-orden sa inyo subong mga saserdote.*+
34 Nagsugo si Jehova nga himuon namon ang ginhimo namon sa sini nga adlaw agod makahimo kami sing pagtumbas para sa inyo sala.+
35 Magpabilin kamo sa puertahan sang tolda nga tilipunan sa adlaw kag gab-i sa sulod sang pito ka adlaw,+ kag himuon ninyo ang ginapahimo sa inyo ni Jehova,+ agod indi kamo mapatay; kay amo ini ang ginsugo niya sa akon.”
36 Ginhimo ni Aaron kag sang iya mga anak ang tanan nga ginsugo ni Jehova paagi kay Moises.
Footnote
^ Ukon “wagkus sa hawak.”
^ Ukon “ang balaan nga diadema.”
^ Ukon “ginputos.”
^ Sa literal, “ginpaputli ang halaran gikan sa sala.”
^ Ukon “tambok sa palibot sang mga batobato.”
^ Ukon “makapauloulo; makapalugpay.” Sa literal, “makapakalma.”
^ Ukon “makapauloulo; makapalugpay.” Sa literal, “makapakalma.”
^ Sa literal, “ang pagpuno sang inyo kamot.”
