Numeros 35:1-34
35 Nagsiling si Jehova kay Moises sa desyerto nga kapatagan sang Moab malapit sa Jordan+ sa Jerico:
2 “Silinga ang mga Israelinhon nga halin sa ila palanublion hatagan nila ang mga Levinhon sing mga siudad nga istaran nila,+ kag hatagan nila ang mga Levinhon sing mga halalban sa palibot sang mga siudad.+
3 Magaistar sila sa mga siudad, kag ang mga halalban para sa ila kasapatan, sa ila mga pagkabutang para sa mga sapat, kag sa ila tanan iban pa nga kasapatan.
4 Ang mga halalban sa mga siudad nga ihatag ninyo sa mga Levinhon may distansia nga 1,000 ka maniko* halin sa pader sang siudad.
5 Magtakus kamo sing 2,000 ka maniko* sa tagsa ka kilid sang siudad: sa sidlangan, sa bagatnan, sa katundan, kag sa aminhan. Ang siudad yara sa tunga. Amo ini ang mangin halalban nila sa mga siudad.
6 “Hatagan ninyo ang mga Levinhon sing 6 ka siudad,+ nga mangin dalangpan sang tawo nga nakapatay,+ luwas pa sa 42 ka siudad nga ihatag man ninyo sa ila.
7 Gani, 48 tanan ka siudad ang ihatag ninyo sa mga Levinhon, lakip ang ila mga halalban.+
8 Ang mga siudad nga ihatag ninyo magahalin sa ginapanag-iyahan sang mga Israelinhon.+ Halin sa daku nga grupo magakuha kamo sing madamo kag halin sa gamay nga grupo magakuha kamo sing diutay lang.+ Ang tagsa ka tribo magahatag sing pila ka siudad sa mga Levinhon, suno sa palanublion nga ila mabaton.”
9 Nagsiling pa si Jehova kay Moises:
10 “Silinga ang mga Israelinhon, ‘Magatabok kamo sa Jordan pakadto sa duta sang Canaan.+
11 Magpili kamo sing mga siudad nga mahapos ninyo kadtuan kag himuon ini nga mga siudad nga dalangpan para sa tawo nga nakapatay* sing indi hungod.+
12 Ini nga mga siudad mangin dalangpan ninyo batok sa manugtimalos sang dugo,+ agod ang nakapatay sing tawo indi pagpatyon antes sia mahukman sa atubangan sang katilingban.+
13 Gamiton para sa sini ang anom ka siudad nga dalangpan nga ihatag ninyo.
14 Magahatag kamo sing tatlo ka siudad sa sini nga bahin sang Jordan+ kag tatlo ka siudad sa duta sang Canaan+ agod mangin mga siudad nga dalangpan.
15 Ining anom ka siudad mangin dalangpan para sa mga Israelinhon, para sa dumuluong nga pumuluyo,+ kag para sa pangayaw sa tunga ninyo, para kay bisan sin-o nga nakapatay* sing indi hungod.+
16 “‘Apang kon ginlampusan sang tawo ang isa ka tawo sing salsalon kag napatay sia, isa sia ka manugpatay. Ang isa nga nakapatay sing tawo dapat gid patyon.+
17 Kon ginlampusan niya ang isa ka tawo sing bato* kag napatay sia, isa sia ka manugpatay. Ang isa nga nakapatay sing tawo dapat gid patyon.
18 Kon ginlampusan niya ang isa ka tawo sing kahoy,* kag napatay niya sia, isa sia ka manugpatay. Ang isa nga nakapatay sing tawo dapat gid patyon.
19 “‘Ang manugtimalos sang dugo amo ang dapat magpatay sa tawo nga nakapatay. Patyon niya sia kon makita niya sia.
20 Kon tungod sang iya dumot nakapatay sia sing isa ka tawo paagi sa pagtikwang sa iya, ukon paghaboy sa iya sing bisan ano nga butang nga may malain nga tuyo,*+
21 ukon tungod sang iya dumot ginsumbag niya ang isa ka tawo kag napatay sia, dapat gid patyon ang naghimo sini. Isa sia ka manugpatay. Patyon sia sang manugtimalos sang dugo kon makita niya sia.
22 “‘Apang kon indi hungod kag indi tungod sa dumot nga natikwang niya ang isa ka tawo ukon nahaboy niya sa iya ang bisan ano nga butang nga wala sing malain nga tuyo,*+
23 ukon kon wala niya sia makita kag nahulugan niya sia sing bato kag indi sia kaaway ukon wala sia nagatinguha nga mahalitan sia, kag napatay ini nga tawo,
24 hukman sang katilingban ang tawo nga nakapatay sa iya kag ang manugtimalos sang dugo, suno sa sini nga mga pagsulundan.+
25 Luwason sang katilingban ang nakapatay sing tawo batok sa manugtimalos sang dugo, kag ibalik sia sang katilingban sa siudad nga dalangpan nga iya gindangpan, kag magaistar sia didto tubtob mapatay ang mataas nga saserdote nga ginhaplasan sing balaan nga lana.+
26 “‘Apang kon ang nakapatay sing tawo maggua sa dulunan sang siudad nga dalangpan
27 kag makita sia sang manugtimalos sang dugo sa gua sang dulunan sang siudad nga dalangpan kag ginpatay sia, wala sing kasal-anan sa dugo ang manugtimalos sang dugo.
28 Kay dapat sia mag-istar sa siudad nga dalangpan tubtob mapatay ang mataas nga saserdote. Makabalik lang ang nakapatay sing tawo sa iya duta nga ginapanag-iyahan kon mapatay na ang mataas nga saserdote.+
29 Amo ini ang mangin pagsulundan ninyo sa paghukom sa tanan ninyo nga kaliwatan bisan diin kamo mag-istar.
30 “‘Ang bisan sin-o nga makapatay sing tawo* dapat patyon bilang isa ka manugpatay+ kon may magpamatuod nga mga saksi;*+ apang wala sing bisan sin-o* ang patyon kon isa lang ang magpamatuod sa sini.
31 Indi kamo magbaton sing gawad para sa kabuhi* sang isa ka manugpatay nga nagakadapat mapatay, kay dapat gid sia patyon.+
32 Indi kamo magbaton sing gawad para sa tawo nga nagdangop sa siudad nga dalangpan agod makabalik sia sa pag-istar sa iya duta antes mapatay ang mataas nga saserdote.
33 “‘Indi ninyo paghigkuan ang duta nga inyo ginaistaran, kay ang dugo nagahigko sa duta,+ kag indi matumbasan ang dugo nga ginpaagay sa duta luwas lamang paagi sa dugo sang isa nga nagpaagay sini.+
34 Indi ninyo paghigkuan ang ginaistaran ninyo nga duta, nga akon ginapuy-an; kay ako, si Jehova, nagapuyo sa tunga sang katawhan sang Israel.’”+
Footnote
^ Ang isa ka maniko katumbas sang 44.5 ka sentimetro (17.5 ka pulgada). Tan-awa ang Apendise B14.
^ Ayhan halin sa isa ka punta tubtob sa pihak nga punta nga wala ginalakip ang kalabaon sang siudad.
^ Ukon “nakapatay sing kalag.”
^ Ukon “nakapatay sing kalag.”
^ Sa literal, “bato nga makapatay.”
^ Sa literal, “kahoy nga makapatay.”
^ Sa literal, “samtang nagapanglambat.”
^ Sa literal, “wala nagapanglambat.”
^ Ukon “kalag.”
^ Sa literal, “paagi sa baba sang mga saksi.”
^ Ukon “kalag.”
^ Ukon “kalag.”
