Salmo 69:1-36
Para sa pangulo sang musika; sa tono sang “Ang mga Liryo.” Salmo ni David.
69 Luwasa ako, O Dios ko, kay ang tubig nagbutang sa katalagman sang akon kabuhi.*+
2 Nagasalop ako sa madalom nga lunang kag wala ako sing matungtungan.+
Yara ako sa madalom nga tubig,Kag gin-anod ako sang masulog nga tubig.+
3 Ginlapyo ako sa pagpanawag sa imo;+Napaos na ako.
Nagpalangdulom ang akon mga mata samtang nagahulat ako sa akon Dios.+
4 Ang nagadumot sa akon nga wala sing kabangdanan+Mas madamo pa sa akon buhok.
Ang mga luyag magpatay sa akon,Ang akon traidor nga mga kaaway* nagdamo.
Ginapilit nila ako nga iuli ang mga butang nga wala ko ginkawat.
5 O Dios ko, nakahibalo ka sang akon kabuangan,Kag wala matago sa imo ang akon mga sala.
6 Kabay nga ang mga nagalaum sa imo indi mahuy-an bangod sa akon,O Soberanong Ginuong Jehova sang mga kasuldadusan.
Kabay nga indi mahuy-an ang mga nagapangita sa imo bangod sa akon,O Dios sang Israel.
7 Tungod sa imo ginatamay ako;+Nahuy-an gid ako.+
8 Napahilayo ako sa akon mga utod,Nangin dumuluong sa mga anak sang akon iloy.+
9 Ang kakugi sa imo balay nagadabdab sa sulod ko,+Kag ang mga pagtamay sang mga nagatamay sa imo nagtupa sa akon.+
10 Sang nagpaubos ako* paagi sa pagpuasa,*Ginyaguta ako tungod sini.
11 Sang nagsuksok ako sing sako,Gintamay* nila ako.
12 Ginalibak ako sang mga tawo nga nagapungko sa gawang sang siudad,Kag ginhimo ako nga topiko sang mga palahubog sa ila mga ambahanon.
13 Apang kabay nga ang akon pangamuyo makalab-ot sa imo,O Jehova, sa kalahamut-an nga tion.+
Sa imo bugana nga mainunungon nga gugma, O Dios ko,Sabta ako sang imo masaligan nga pagluwas.+
14 Luwasa ako sa lunang;Indi pagtuguti nga magsalop ako.
Luwasa ako sa mga nagadumot sa akonKag sa madalom nga mga tubig.+
15 Indi pagtuguti nga maanod ako sang masulog nga baha,+Ukon lamunon ako sang kadadalman,Ukon kiputon sang bubon* ang iya baba sa akon.+
16 Sabta ako, O Jehova, kay maayo ang imo mainunungon nga gugma.+
Talupangda ako suno sa imo daku nga kaluoy sa akon,+
17 Kag indi paglipdi ang imo nawong sa imo alagad.+
Sabta ako gilayon kay nabudlayan gid ako.+
18 Kari ka kag luwasa ako;*Tubsa ako sa akon mga kaaway.
19 Nakahibalo ka kon paano ako ginpasipalahan kag ginpakahuy-an kag ginpakanubo.+
Nakita mo ang tanan ko nga kaaway.
20 Ang pasipala nagpilas sang akon tagipusuon, kag ang pilas indi na mag-ayo.*
Nagpaabot ako nga kaluy-an apang wala gid sing naluoy sa akon,+Nagpaabot ako nga lugpayan apang wala gid sing naglugpay sa akon.+
21 Apang ginhatagan nila ako sing hilo* subong pagkaon,+Kag sing maaslom nga alak sang nauhaw ako.+
22 Kabay pa nga ang ila lamesa mangin tugalbong sa ila,Kag ang ila kabuganaan mangin siod sa ila.+
23 Kabay pa nga magdulom ang ila mga mata agod indi sila makakita,Kag magkurog pirme ang ila mga tiil.*
24 Ibubo sa ila ang imo kaalipungot,*Kag kabay nga malambot sila sang imo nagadabdab nga kaakig.+
25 Himua nga kamingawan ang ila ginaistaran;*Kabay nga indi na pag-istaran ang ila mga tolda.+
26 Kay ginahingabot nila ang imo ginsamad,Kag padayon sila nga nagahambal nahanungod sa mga pag-antos sang mga ginpilasan mo.
27 Dugangi sing kasaypanan ang ila kasaypanan,Kag kabay nga indi mo sila pagkabigon nga matarong.
28 Panasa ang ila ngalan sa libro sang mga buhi,*+Kag kabay nga ang ila ngalan indi masulat upod sa mga matarong.+
29 Apang nalisdan ako kag nasakitan.+
Kabay nga ang imo gahom sa pagluwas magaamlig sa akon, O Dios ko.
30 Magaamba ako sing mga pagdayaw sa ngalan sang Dios,Kag himayaon ko sia nga may pagpasalamat.
31 Magapahamuot ini kay Jehova labi pa sa toro nga baka,Labi pa sa torite nga baka nga may sungay kag mga kuko.+
32 Makita ini sang mahagop kag magakasadya sia.
Ikaw nga nagapangita sa Dios, kabay nga maglig-on ang imo tagipusuon.
33 Kay ginapamatian ni Jehova ang mga imol,+Kag indi niya pagtamayon ang iya nabihag nga katawhan.+
34 Dayawon sia sang langit kag duta,+Kag sang kadagatan kag sang tanan nga nagagiho sa sini.
35 Kay luwason sang Dios ang Sion+Kag patindugon niya liwat ang mga siudad sang Juda,Kag magaistar sila didto kag magapanag-iya sini.*
36 Ang mga kaliwat sang iya mga alagad magapanubli sini,+Kag ang mga nagahigugma sang iya ngalan+ magaistar sa sini.
Footnote
^ Ukon “nagalab-ot sa akon kalag.”
^ Ukon “mga kaaway nga wala sing rason.”
^ Sa literal, “ang akon kalag.”
^ Ukon mahimo, “Sang naghibi ako kag nagpuasa.”
^ Sa literal, “Nangin hulubaton.”
^ Ukon “buho.”
^ Ukon “Magpalapit ka sa akon kalag kag tubsa ini.”
^ Ukon “kag wala na ako sing paglaum.”
^ Ukon “makahililo nga tanom.”
^ Sa literal, “balikawang.”
^ Ukon “kasingkal.”
^ Ukon “napaderan nga kampo.”
^ Ukon “libro sang kabuhi.”
^ Ang duta.
