“NAGSUGOD ang bag-ong tuig nga may pag-ilinaway, kinagamo, kag pagpinatyanay,” siling sang Enero 1, 1917 nga The Watch Tower. Huo, ining Bug-os Kalibutan nga Inaway I nga ginatawag Daku nga Inaway, malapuyot gihapon sa Europe.

Wala nahangpan sing bug-os sang mga Estudyante sang Biblia kon ano ang nadalahig sa pagpabilin nga neutral, pero bisan pa sini, madamo sa ila ang nagpanikasog gid nga indi makasala sa dugo. Halimbawa, si Stanley Willis nga 19 anyos nga taga-England, determinado gid nga magpabilin nga neutral. Antes magkadto sa korte para pangapinan ang iya tindog, nagsulat sia: “Daku gid nga pribilehiyo nga makapanaksi sa sini nga paagi.  Sang sini nga aga, ginhambalan ako sang Koronel nga ipasuksok sa akon ang uniporme sang soldado, kag kon mangindi ako bistahon ako sa korte sang militar.”

Wala gid nagkompromiso si Stanley, gani ginpamatbatan sia nga magpangabudlay sa sulod sang prisuhan. Pero positibo gihapon sia. Pagligad sang duha ka bulan, nagsulat sia: “Paagi sa ‘espiritu sang gahom’ nga ginhatag sang Kamatuoran, mabatas sang isa . . . ang mga butang nga para sa iban mabudlay batason.” Gingamit niya sing maayo ang iya tion sa prisuhan, nagsiling sia: “Ang isa sa daku nga pagpakamaayo nga akon natigayon sa sini nga mga kabudlayan amo nga may madamo ako sing malinong nga tion para magpangamuyo, magpamalandong, kag magtuon.”

Sang ulihi, nag-entra ang United States sa inaway. Sang Abril 2, 1917, nagpamulongpulong si Presidente Woodrow Wilson sa United States Congress agod ipahibalo nga luyag niya magdeklarar sang inaway batok sa Germany sing pormal. Pagligad sang apat ka adlaw, nag-entra sa inaway ang United States. Wala madugay, ang mga Cristiano sa United States nag-atubang sa isyu sang neutralidad.

Kinahanglan gid sang United States ang madamo nga soldado, amo nga ginpatuman ang Selective Service Act sang Mayo. Ini nga kasuguan nagapahanugot sa gobierno sang United States nga magpatawag sang mga lalaki agod mangin soldado sa inaway. Pagligad sang isa ka bulan, ginpatuman naman ang Espionage Act, isa ka kasuguan nga nagapahanugot nga makasuhan ang mga magasupak sa Selective Service Act. Wala madugay, gingamit ini sang mga kaaway sang kamatuoran agod ‘magpahito sing kagamo paagi sa kasuguan’ sa mahidaiton nga mga sumilimba ni Jehova.—Sal. 94:20.

Wala gid nakibot ang mga Estudyante sang Biblia sa mga kinagamo sa kalibutan sa tion sang inaway. Dinekada na nila nga ginapatalupangod ang mga tagna sa Biblia parte sa sini nga hitabo. Pero, madamo ang nakibot sang nag-utwas sang ulihi ang kontrobersiya sa tunga sang mga alagad ni Jehova.

Nag-utwas ang problema sang mga alagad ni Jehova sa United States wala madugay sa tapos napatay si Charles Taze Russell. Ang ila problema amo kon paano dumalahan ang hilikuton sang mga alagad ni Jehova. Sang 1884, ginparehistro ni Brother Russell ang Zion’s Watch Tower Tract Society kag nangin presidente sining legal nga korporasyon tubtob sa iya kamatayon sang Oktubre 1916. Sang nagbulos si Joseph F. Rutherford sa pagdumala, ang pila ka kilala nga lalaki sa organisasyon, lakip ang apat ka miembro sang board of directors, nagpakita sing ambisyuso nga panimuot.

Ining apat ka direktor kag iban pa wala nanamian sa paagi sang pagdumala ni Brother Rutherford. Ang isa sini amo ang parte sa hilikuton ni Paul S. L. Johnson nga nag-alagad subong pilgrim, ukon nagalakbay nga manugtatap.

Antes napatay si Brother Russell, naghimo sia sing kahimusan nga ipadala si Johnson sa England bilang isa sa nagalakbay nga tiglawas sang organisasyon. Didto, magabantala si Johnson sang maayong balita, magabisita sa mga kongregasyon, kag magareport parte sa hilikuton sa sina nga teritoryo. Sang nag-abot sia sa England sang Nobiembre 1916, gin-abiabi gid sia sang kauturan. Pero bangod sining pinasahi nga atension nga iya nabaton, makapasubo nga nangin bugalon sia kag kumbinsido nga sia ang dapat magabulos kay Brother Russell.

Bisan indi awtorisado, ginpahalin niya ang pila ka miembro sang pamilya Bethel sa England nga batok sa iya. Gintinguhaan man niya nga kontrolon ang bank account sang organisasyon sa London, gani ginpabalik sia ni Brother Rutherford sa United States.

Nagbalik si Johnson sa Brooklyn, pero sa baylo nga batunon ang pagtadlong, sulitsulit niya nga ginkumbinsi si Brother Rutherford nga pabalikon sia sa England para padayunon ang iya hilikuton didto. Bangod wala sia ginpahanugutan, gintinguhaan ni Johnson nga impluwensiahan ang board of directors, kag apat sa ila ang nagdampig sa iya.

 Nahantop ni Brother Rutherford nga tinguhaan sining apat ka lalaki nga kontrolon ang pondo sang organisasyon sa United States, pareho sang ginhimo ni Johnson sa England, gani nanghikot sia para pahalinon sila subong miembro sang board. Ginapatuman sang kasuguan sa United States nga ang pagpili sang kada miembro sang board of directors dapat botohan sang mga miembro sang korporasyon kada tuig. Apang sang Enero 6, 1917, sa tuigan nga miting sang korporasyon, tatlo lang ka miembro sang board ang ginboto. Si Joseph F. Rutherford ang napili nga presidente, si Andrew N. Pierson ang bise presidente, kag si William E. Van Amburgh ang secretary-treasurer. Wala sing pagpili sa nabilin nga apat ka posisyon para sa board. Bangod ang apat ka nagapamatok ginpili nga miembro sang board sang nagligad nga tinuig, abi sang pila ka miembro sang korporasyon, amo na sina ang ila posisyon tubtob buhi sila. Pero bangod wala sila ginpili sa miting sang korporasyon sang 1917, indi na sila legal nga miembro sang board! Gani sang Hulyo 1917, paagi sa iya kinamatarong subong presidente, nagtangdo si Brother Rutherford sang apat ka matutom nga lalaki nga magapungko sa bakante nga posisyon sa board.

Naakig gid ang apat ka ginpahalin nga direktor kag gintinguhaan nila nga bawion ang ila posisyon. Pero napaslawan sila. Ang pila ka Estudyante sang Biblia nagdampig sa ila kag nagtukod sang iban nga organisasyon, pero ang kalabanan nga Estudyante sang Biblia nagpabilin nga matutom, kag wala gid nabawi sining apat ka ginpahalin ang ila posisyon.

Sa sina nga tion, nagpadayon sa pagtrabaho si Brother Rutherford upod ang matutom nga kauturan sa Bethel para sa pagpauswag sang intereses sang Ginharian. Gindugangan ang nagalakbay nga manugtatap nga ginatawag anay nga mga pilgrim, halin sa 69 nahimo ini nga 93. Nagdugang man ang kadamuon sang mga colporteur ukon regular payunir, halin sa 372 naglab-ot ini sa 461. Dugang pa, sa una nga tion, nagtangdo sang mga espesyal colporteur nga pareho sa auxiliary  payunir sa aton tion subong. Ang pila ka kongregasyon may mga 100 sining makugi nga mga manugbantala.

Sang Hulyo 17, 1917, ginpagua ang bag-o nga libro nga The Finished Mystery. Sa hingapusan sina nga tuig naubos ang suplay sang libro, gani 850,000 pa ka kopya sini ang gin-order sa kompanya nga nagaimprinta sang aton mga literatura. *

Sang 1917, nakompleto ang pag-organisar liwat sang trabaho sa Bethel nga ginsugdan ni Brother Russell sang 1916. Sang Disiembre 1917, nagsiling ang The Watch Tower: “Nakompleto ang pag-organisar liwat sa trabaho sang kauturan sa Bethel . . . kag karon maayo kag epektibo na ang trabaho, mga palatandaan ini sang nadumalahan sing maayo nga institusyon . . . Narealisar sang kauturan sa Bethel nga isa ka pribilehiyo kag indi kinamatarong ang pag-alagad diri.”

Sang Septiembre 1917, nagsiling ang The Watch Tower: “Kada bulan sugod sang Enero 1, may pag-uswag [sa kadamuon sang literatura nga napagua] kon ikumparar sa amo man nga binulan sang 1916 . . . Maathag nga ginapakamaayo gid sang Ginuo ang hilikuton diri sa Brooklyn.”

Ginpahalin sa organisasyon ang mga nagapamatok, kag ang resulta sang plebisito sa mga kongregasyon nga ginbalhag sa The Watch Tower maathag nga nagpakita nga ang kalabanan nga kauturan nagsuportar kay Brother Rutherford kag sa matutom nga mga lalaki sa Bethel. Pero wala pa natapos ang pagtilaw sa sini nga mga lalaki. Bisan pa maayo ang umpisa sang 1918, nangin panugod ini sang pinakamabudlay nga tion sang moderno nga kasaysayan sang katawhan ni Jehova.