Ginapaabot ni Jehova nga magpabilin nga matutom ang mag-asawa sa ila sinumpaan sa kasal. Sang ginhiusa sang Dios ang una nga lalaki kag babayi sa pag-asawahay, si Jehova nagsiling: “Magahiusa [ang lalaki] sa iya asawa, kag sila mangin isa ka unod.” Sang ulihi, ginsulit ini ni Jesucristo kag nagdugang: “Gani, ang gintingob sang Dios, indi pagbulagon sang tawo.” (Genesis 2:24; Mateo 19:3-6) Gani ginatamod ni Jehova kag ni Jesus ang pag-asawahay subong isa ka tubtob-buhi nga relasyon nga matapos lamang kon mapatay ang isa ka tiayon. (1 Corinto 7:39) Bangod ang pag-asawahay sagrado nga kahimusan, dapat  tamdon sing serioso ang pagdiborsio. Ang matuod, ginadumtan ni Jehova ang pagdiborsio nga wala sing Makasulatanhon nga basihan.—Malaquias 2:15, 16.

Ano ang Makasulatanhon nga basihan sa pagdiborsio? Ginadumtan ni Jehova ang pagpakighilahi kag seksuwal nga imoralidad. (Genesis 39:9; 2 Samuel 11:26, 27; Salmo 51:4) Nangil-ad gid sia sa seksuwal nga imoralidad amo nga gintugutan niya nga mangin basihan ini sang pagdiborsio. (Para sa pagbinagbinag kon ano ang nalakip sa seksuwal nga imoralidad, tan-awa ang Kapitulo 9, parapo 7, diin ginapaathag ang seksuwal nga imoralidad.) Ginhatagan ni Jehova sing kinamatarong ang inosente nga tiayon nga magdesisyon kon bala magbulag sia ukon indi sa nakasala niya nga tiayon. (Mateo 19:9) Gani kon mamat-od gid man ang inosente nga tiayon nga magdiborsio, wala ginadumtan ni Jehova ang iya pagahimuon. Apang, wala ginapalig-on sang Cristianong kongregasyon ang pagdiborsio. Ang matuod, may pila ka kahimtangan nga mahimo magpahulag sa inosente nga tiayon nga indi pagbulagan ang iya nakasala nga tiayon, ilabi na kon mahinulsulon gid ini. Gani kon ang isa may Makasulatanhon nga rason sa pagdiborsio, sia mismo ang dapat magdesisyon kag batunon niya ang ano man nga resulta sang iya desisyon.—Galacia 6:5.

Sa pila ka grabe nga kahimtangan, ang iban nga Cristiano namat-od sa pagbulag ukon sa pagdiborsio sa ila tiayon bisan pa wala sia nakahimo sing seksuwal nga imoralidad. Kon amo ini ang desisyon sang isa, ang Biblia nagsiling nga “dapat magpabilin sia nga indi minyo ukon magbalik” sa iya tiayon. (1 Corinto 7:11) Gani ina nga Cristiano indi hilway sa pagpangaluyag sa iban agod magminyo liwat. (Mateo 5:32) Binagbinaga ang pila ka grabe nga kahimtangan nga ginakabig sang iban nga mangin basihan sang pagbulagay.

Hungod nga indi pagsuporta. Mahimo mamigado gid ang pamilya bangod wala ginasustentuhan sang bana ang ila kinahanglanon bisan pa may ikasarang sia sa paghimo sini. Ang Biblia nagasiling: “Ang bisan sin-o nga wala nagaaman . . . sa mga katapo sang iya panimalay, nagapanghiwala sang pagtuo kag malain pa sa tawo nga wala sing pagtuo.” (1 Timoteo 5:8) Kon indi sia magbag-o, mahimo binagbinagon sang asawa kon bala  kinahanglan niya amligan ang kaayuhan nila sang iya kabataan paagi sa pagbulag sa iya bana. Siempre pa, dapat usisaon sing maayo sang Cristianong mga gulang ang akusasyon nga ginapabay-an sang isa ka Cristiano ang iya pamilya. Mahimo pa gani ma-disfellowship ang isa nga hungod nga nagapabaya sa iya pamilya.

Pisikal nga pagpanakit. Mahimo mabutang sa katalagman ang kapagros kag ang kabuhi pa gani sang isa kon ang iya tiayon tuman kapintas. Kon ang mapintas nga tiayon isa ka Cristiano, dapat usisaon sang mga gulang kon bala matuod gid man ang panumbungon. Ang pagsilabo sa kaakig kag ang padayon nga kapintas mahimo magresulta sa pag-disfellowship.—Galacia 5:19-21.

Nabutang sa katalagman ang espirituwalidad. Mahimo nga pirme ginaupangan sang isa ang iya tiayon sa pagsimba sa Dios ukon ginapilit pa gani sia nga lapason ang pila ka sugo sang Dios. Sa sini nga kahimtangan, mahimo magdesisyon ang tiayon nga ang espirituwalidad nabutang sa katalagman kon bala ang paagi lamang agod ‘matuman niya ang Dios subong manuggahom sa baylo sang mga tawo’ amo ang pagbulag.—Binuhatan 5:29.

Sa mga kaso nga nagadalahig sa grabe nga mga kahimtangan subong sang nabinagbinag na, wala sing dapat magkumbinsi sa isa nga inosente nga bulagan ukon indi ang iya tiayon. Bisan pa ang hamtong sa espirituwal nga mga abyan kag mga gulang maghatag sing bulig kag laygay base sa Biblia, wala nila mahibaluan ang tanan nga detalye kon ano gid ang nagakatabo sa mag-asawa. Si Jehova lamang ang nakahibalo sina. Siempre pa, kon ginapasobrahan sing sugid sang Cristianong mag-asawa ang ila problema agod lamang magbulagay sila, wala nila ginapadunggan ang kahimusan sang pag-asawahay. Nahibaluan ni Jehova ang bisan ano nga pahito sa pagbulagay, bisan pa taguon ini sang isa. Ang matuod, “ang tanan nga butang hublas kag dayag gid sa iya mga mata, kag manabat kita sa iya.” (Hebreo 4:13) Apang, kon padayon nga nabutang sa daku nga katalagman ang isa ka Cristiano, kag wala na sia sing mahimo pa kundi magbulag, indi sia dapat pagpakalainon. Ano man ang kahimtangan, “kita tanan magatindog sa atubangan sang lingkuran nga hukmanan sang Dios.”—Roma 14:10-12.