Sa 1 Corinto 6:1-8, ginsambit ni apostol Pablo ang mga pag-asuntuhanay sang mga masigkatumuluo. Ginpabutyag niya ang iya kasubo kay ang pila ka Cristiano sa Corinto ‘nangahas nga magkadto sa hukmanan sa atubangan sang indi matarong nga mga tawo.’ (Bersikulo 1) Ginhatag ni Pablo ang mabakod nga mga rason kon ngaa indi nagakaigo nga mag-asuntuhanay sa korte ang mga Cristiano, kundi dapat husayon ang problema sa sulod sang kongregasyon. Binagbinagon naton ang pila ka rason kon ngaa ginhatag ini nga laygay sang Biblia kag dayon binagbinagon naton ang pila ka kahimtangan nga wala nalakip sa sini nga laygay.

Kon mag-utwas ang indi paghangpanay sa negosyo upod sa aton masigkatumuluo, dapat naton ini husayon indi sa aton paagi, kundi suno sa dalanon ni Jehova. (Hulubaton 14:12) Subong sang ginpakita ni Jesus, maayo gid kon husayon naton gilayon ang indi paghangpanay antes ini magdaku. (Mateo 5:23-26) Apang, makapasubo nga ang iban nga mga Cristiano nangin sobra ka maawayon, kag ginpasaka pa gani nila sa mga korte ang indi nila paghangpanay. Si Pablo nagsiling: “Ang inyo pag-asuntuhanay isa na ka kalutusan sa inyo.” Ngaa? Ang panguna nga rason amo nga ina nga mga bista nagaguba sa maayo nga reputasyon sang kongregasyon kag sang Dios nga aton ginasimba. Gani dapat naton binagbinagon sing maayo ang pamangkot ni Pablo: “Ngaa indi na lang ninyo pagbatason kon himuan kamo sing sayop?”—Bersikulo 7.

Ginpaathag pa gid ni Pablo nga ang Dios may maayo nga kahimusan sa kongregasyon sa paghusay sang indi paghangpanay. Ang mga gulang mga Cristianong lalaki nga nangin maalam bangod sang ila ihibalo sa kamatuoran sang Kasulatan, kag suno kay Pablo ‘makasarang sila maghukom sa mga kauturan’ kon tuhoy sa “mga butang sini nga kabuhi.” (Bersikulo 3-5) Suno kay Jesus, ang indi paghangpanay nga nagadalahig sa mabug-at nga mga sala, subong sang pasipala kag pagpangdaya, dapat husayon paagi sa tatlo ka tikang: una, tinguhaan sang mga nadalahig nga husayon ang problema nga silahanon lang; ikaduha, kon wala ini mahusay  sa una nga tikang, magdala sing isa ukon duha ka saksi; kag ikatlo, kon wala pa gid ini mahusayan, isugid ini sa kongregasyon, nga ginarepresentar sang mga gulang.—Mateo 18:15-17.

Siempre pa, ang Cristianong mga gulang indi kinahanglan nga mangin mga abogado ukon mga negosyante kag indi sila maglaygay nga daw mga abogado ukon negosyante sila. Indi sila maghimo sing mga kondisyon sa pagsolbar sang indi paghangpanay sang mga utod sa negosyo. Sa baylo, ginatinguhaan nila nga buligan ang mga nadalahig nga iaplikar ang Kasulatan kag magsugtanay sa mahidaiton nga solusyon. Kon komplikado ang kaso, mahimo sila mamangkot sa manugtatap sang sirkito ukon sa sanga talatapan sang mga Saksi ni Jehova. Apang, may mga kahimtangan nga wala nalakip sa laygay ni Pablo. Ano ini?

Sa pila ka kahimtangan, ang pagkadto sa hukmanan mahimo nga pormalidad lang ukon amo ini ang legal nga kinahanglanon para masolbar ang problema sing patas kag mahidaiton. Halimbawa, ang pagkadto sa hukmanan amo lamang ang pamaagi agod makakuha sing diborsio, matigayon ang kinamatarong sa pag-atipan sa bata, makakuha sing sustento para sa pamilya, makakuha sing benepisyo sa insurance, mapamatud-an nga isa ikaw sa mga gin-utangan sang isa ka negosyo nga naputo, kag mapamatud-an ang mga testamento sang palanublion. May mga kahimtangan nga mahimo magpasaka man sing kaso ang isa ka utod nga gin-akusar agod amligan ang iya kaugalingon. *

Kon ini nga mga asunto ginahimo nga wala ang espiritu sang pagkamaawayon, mahimo nga wala sini ginalapas ang prinsipio sang laygay ni Pablo. * Apang ang pinakaimportante sa isa ka Cristiano amo ang pagpakabalaan sa ngalan ni Jehova kag ang paghidait kag paghiusa sang kongregasyon. Ang panguna nga palatandaan sang mga sumulunod sang Cristo amo ang ila gugma, kag ‘ang gugma wala nagapangita sang kaugalingon nga kaayuhan.’—1 Corinto 13:4, 5; Juan 13:34, 35.