Ang maayong balita nga ang mga tawo mabuhi sing wala katubtuban sa duta nasulat sa Biblia. (Salmo 37:29) Ang Biblia ginahuman sang 66 ka magagmay nga libro. Ginpasulat ini sang Dios sa mga 40 ka matutom nga lalaki. Ang una nga lima ka libro ginsulat ni Moises mga 3,500 ka tuig na ang nagligad. Ang pinakaulihi nga libro ginsulat ni apostol Juan sing sobra 1,900 ka tuig na ang nagligad. Kay sin-o ideya ang ginsulat sang mga manunulat sang Biblia? Nakig-angot ang Dios sa mga manunulat sang Biblia paagi sa iya balaan nga espiritu. (2 Samuel 23:2) Ginsulat nila ang panghunahuna sang Dios, indi ang ila panghunahuna. Gani si Jehova ang Awtor sang Biblia.​—Basaha ang 2 Timoteo 3:16; 2 Pedro 1:20, 21.

Tan-awa ang video nga Sin-o ang Awtor sang Biblia?

Nahibaluan naton nga ang Biblia halin sa Dios kay detalyado kag eksakto ang ginasiling sini parte sa palaabuton. Wala sing tawo nga makahimo sini. (Josue 23:14) Ang Labing Gamhanan nga Dios lamang ang makahibalo sing eksakto parte sa palaabuton sang katawhan.​—Basaha ang Isaias 42:9; 46:10.

Mapaabot naton nga dapat pinasahi gid ang libro nga halin sa Dios, kag amo gid ini ang Biblia. Binilyon na ka kopya sang Biblia ang napanagtag sa ginatos ka lenguahe. Bisan pa dumaan na ang Biblia, nahisanto ini sa napamatud-an sang siensia. Isa pa, nagahisantuanay ang sinulatan sang 40 ka manunulat sini. * Dugang pa, ang Biblia pamatuod gid sang gugma sang Dios, kag may gahom gihapon ini sa pagbag-o sang kabuhi sang mga tawo. Ini nga kamatuoran nagkumbinsi sa minilyon nga ang Biblia Pulong sang Dios.​—Basaha ang 1 Tesalonica 2:13.

Tan-awa ang video nga Ngaa Makasiguro Kita nga Husto ang Ginasiling sang Biblia?

Ginasugid sa aton sang Biblia ang maayong balita parte sa mahigugmaon nga katuyuan sang Dios para sa katawhan. Ginapaathag sang Kasulatan kon paano nadula sang tawo ang kahigayunan nga mabuhi sa paraiso sa duta kag kon paano ipasag-uli ang paraiso.​—Basaha ang Bugna 21:4, 5.

Mabasa man sa Pulong sang Dios ang mga kasuguan, prinsipio, kag mga laygay. Dugang pa, nasulat sa Biblia ang kasaysayan sang pagpakig-angot sang Dios sa katawhan, nga nagasugid sa aton sang personalidad sang Dios. Gani ang Biblia makabulig sa imo nga makilala ang Dios. Ginasugid sini kon paano mo sia mangin abyan.​—Basaha ang Salmo 19:7, 11; Santiago 2:23; 4:8.

Ini nga brosyur makabulig sa imo nga maintiendihan ang Biblia paagi sa pagsunod sa pamaagi ni Jesus. Nagsambit sia sang mga teksto sa Biblia kag ginpaathag niya “ang kahulugan sang Kasulatan.”​—Basaha ang Lucas 24:27, 45.

Wala na sing mas makalilipay pa sa maayong balita nga naghalin sa Dios. Apang ang pila ka tawo indi interesado sa sini, kag ang iban naugot pa gani. Pero indi maluyahan sing buot. Ang imo paglaum nga makatigayon sang kabuhi nga wala sing katapusan nagadepende sa imo pagkilala sa Dios.​—Basaha ang Juan 17:3.