Sigurado gid nga ining panguna nga mga panudlo sa Biblia nga natun-an mo nagpabakod sang imo gugma kay Jehova. Ini nga gugma dapat padayon nga palambuon. (1 Pedro 2:2) Ang imo paglaum nga mabuhi sing wala katapusan nagadepende sa imo padayon nga pagpakigsuod sa Dios paagi sa pagtuon sang iya Pulong.​—Basaha ang Juan 17:3; Judas 21.

Samtang nagadugang ang imo ihibalo sa Dios, nagabakod man ang imo pagtuo. Ang pagtuo makabulig sa imo nga pahamut-an ang Dios. (Hebreo 11:1, 6) Magapahulag ini sa imo nga maghinulsol kag maghimo sing mga pagbag-o sa imo kabuhi.​—Basaha ang Binuhatan 3:19.

Nalipay gid kita magsugid sang maayo nga balita, gani natural lang nga gusto mo isugid sa iban ang imo mga natun-an. Samtang padayon ka nga nagatuon sa Biblia, matun-an mo kon paano gamiton ang Biblia sa pagpaathag sang imo pagtuo kay Jehova kag pagsugid sang maayong balita.​—Basaha ang Roma 10:13-15.

Ang una nga ginasugiran sang kalabanan nga tawo sang maayong balita amo ang ila mga abyan ukon mga paryente. Mangin mataktikanhon. Sa baylo nga hambalan sila nga butig ang ila relihion, isugid sa ila ang mga saad sang Dios. Dumduma man nga mas nanamian ang mga tawo sa imo maayo nga pamatasan sangsa imo ginahambal.​—Basaha ang 2 Timoteo 2:24, 25.

Ang pagtuon sa Pulong sang Dios makabulig sa imo nga mag-uswag sa espirituwal. Sa ulihi, matigayon mo ang pinasahi gid nga kaangtanan kay Jehova. Ang matuod, puede ka gani mangin miembro sang iya pamilya.​—Basaha ang 2 Corinto 6:18.

Magauswag ka sa espirituwal paagi sa padayon nga pagtuon sa Pulong sang Dios. (Hebreo 5:13, 14) Pangabaya ang isa sa mga Saksi ni Jehova nga tun-an ninyo ang Biblia nga ginagamit ang libro nga Ano Gid ang Ginatudlo sang Biblia? Samtang nagadamo ang imo matun-an sa Pulong sang Dios, labi nga mangin madinalag-on ka sa imo kabuhi.​—Basaha ang Salmo 1:1-3; 73:27, 28.

Ang maayong balita halin kay Jehova, ang malipayon nga Dios. Magasuod ka pa gid sa iya paagi sa pagpakigsuod sa iya katawhan. (Hebreo 10:24, 25) Paagi sa imo padayon nga panikasog nga pahamut-an si Jehova, nagatinguha ka nga matigayon ang matuod nga kabuhi—ang kabuhi nga wala sing katapusan. Ang pagpakigsuod sa Dios amo gid ang pinakamaayo nga butang nga mahimo mo.​—Basaha ang 1 Timoteo 1:11; 6:19.