Pagbantay sa Kalibutan

▪ Sang nagligad nga anom ka tuig, “malapit sa 100,000 ka tawo . . . ang ginpatay sa Estados Unidos.”​—THE NEW YORK TIMES, U.S.A.

▪ Ginpanas sang isa ka Web site para sa pagpangita sing mga abyan ang mga profile sang 29,000 ka tawo nga nakahimo sing krimen sa sekso nga naggamit sang ila serbisyo. “Ang makakulugmat nga paglapnag sang mga profile sang mga nagahimo sing krimen sa sekso [sa sini nga website] nagakinahanglan sing madasig nga solusyon,” siling ni Richard Blumenthal, Abogado Heneral sang Connecticut.​—REUTERS NEWS SERVICE, U.S.A.

▪ “Nabudlayan gid ang China sa kakulang sa ngalan. . . . Ang isa ka surbe sa bug-os nga pungsod sang 2006 nagpakita [nga] malapit sa 85 porsiento . . . sang 1.4 ka bilyon nga pumuluyo ang may yara lamang 100 ka apelyido.”​—CHINA DAILY, CHINA.

▪ Sa tagsa ka kilometro nga pagmaneho, ‘kapin sa 32 ka beses nga madali mapatay sa aksidente sa trapiko ang mga nagamotorsiklo’ sangsa mga nagasakay sa salakyan.​—UC BERKELEY WELLNESS LETTER, U.S.A.

Mga Saksi ni Jehova Narehistro na sa Turkey

Sang Hulyo 31, 2007, ang mga Saksi ni Jehova sa Turkey nakabaton sing opisyal nga pahibalo nga narehistro na sila subong isa ka legal nga relihion. Ini nga pagrehistro nagapahanugot sa ila nga magbakal kag magpanag-iya sing propiedad, mag-arkila sing mga duog tilipunan, magbaton sing mga donasyon, kag magpangapin sang ila legal nga mga kinamatarong sa korte kon kinahanglanon.

Ang Internet “Nagadula sang Pagpugong sa Kaugalingon”

Suno sa isa ka balita, ang isa ka Web site sa Alemanya nga gintuyo agod patigayunon ang pagpanghilahi nagpabugal nga may 310,000 sila ka miembro kag may 1,000 nga nagaparehistro kada adlaw. Ginpabugal sining ahensia nga ang ila pagpatigayon sa pagpanghilahi may “100 porsiento nga garantiya nga mahinago ang identidad.” Ang isa sa mga direktor sini nagsiling: “Ang paghinago sang identidad sa Internet nagadula sang pagpugong sa kaugalingon” kag “mas mahapos makig-angot sing prangka kag direkta sa iban.” Ang isa pa gid ka direktor nagsiling nga ang Internet labi nga magapasanyog sang pagluib.

Ginabaisan nga mga Tul-an

Masami nga ginalaragway sang mga sientipiko ang katapusan nga “hugna” sang “ebolusyon sang tawo” subong nagapaagisod halin sa Homo habilis pakadto sa Homo erectus tubtob sa “moderno nga tawo,” ang Homo sapiens. Apang, may nasapwan sa Kenya nga duha ka tul-an nga indi man gid maglayuay ang distansia sa isa kag isa kag ginhangop sang iban nga mga sientipiko nga ining duha ka espesyi, ang Homo habilis kag ang Homo erectus, nga ginpatihan katigulangan sang mga tawo, nagkabuhi sing dungan. “Ang ila dungan nga pagluntad nagapakita nga indi mahimo nga ang Homo erectus naghalin sa Homo habilis,” siling ni Meave Leakey, isa sa mga awtor sang report.

Mas Malain nga Paniempo sa Talipuspusan sang Semana?

Daw natalupangdan sang madamo nga mga taga-Alemanya nga mas malain ang paniempo sa talipuspusan sang semana sangsa ordinaryo nga mga adlaw. Ang pagbinagbinag sang mga impormasyon nga nagatuptop sa 15 ka tuig nga kahimtangan sang panahon gikan sa nanuhaytuhay nga bahin sang Alemanya mahimo magapamatuod sini, report sang Der Spiegel. Pinakamainit ang Mierkoles nga adlaw, kag pinakabugnaw ang Sabado. Kada Sabado 15 porsiento nga mas madamol ang ulan kag 10 porsiento nga mas maulanon sangsa Lunes nga amo naman ang adlaw nga halos wala nagaulan. Mas malawig sing 15 minutos ang silak sang adlaw kon Martes sangsa Sabado. Ginahangop sang mga nagapanalawsaw nga ang polusyon nga tuga sang mga tawo sa sulod sang semana nagasupot sa talipuspusan sang semana, ginabalabagan sini ang silak sang adlaw kag nagabulig nga maporma ang mga panganod nga nagaresulta sa pag-ulan.