“INDI kamo mag-untat sa pagpangamuyo.” (1 Tesalonica 5:17) “Magpadayon sa pagpangamuyo.” (Roma 12:12) “Ipahibalo sa Dios ang inyo mga pangabay.” (Filipos 4:6) Kon isa ikaw ka Cristiano, mahimo nga nahibaluan mo gid ini nga mga bersikulo. Mahimo nga nahangpan mo man nga ang pangamuyo isa ka tumalagsahon nga sahi sang komunikasyon. Hunahunaa lamang, mahimo kita makapakigsugilanon sa Labing Gamhanan nga Dios sa bisan ano man nga tion! Kag ang Biblia nagsiling: “Nagapamati sia sa aton.” *​—1 Juan 5:14.

Apang kaangay sang pamatan-on nga ginsambit kaina, mahimo nabudlayan ka man mangamuyo. Ano ang dapat mo himuon kon amo ini ang imo ginabatyag? Buligan ka sini nga artikulo nga (1) mahibaluan ang mga problema, (2) maghimo sing tulumuron tuhoy sa imo pangamuyo, kag (3) mabuksan ang “puertahan” agod malab-ot ang imo tulumuron.

Una, hibaluon naton kon ano ang problema. Ano ang kinahanglan mo pauswagon sa imo pangamuyo?

Ikaduha, maghimo ka sing isa ka tulumuron. Sa idalom, markahi ang tulumuron nga luyag mo malab-ot, ukon isulat ini sa linya nga “Iban pa.”

• Luyag ko mangamuyo pirme.

• Gusto ko indi sulit-sulit ang akon mga pangamuyo.

• Gusto ko nga mas hanuot ang akon pangamuyo.

• Iban pa

Ang pangamuyo daw isa ka puertahan nga puede mo buksan bisan ano nga oras. Apang, madamo nga pamatan-on karon ang nagasiling nga wala nila pirme ginabuksan ini nga puertahan. Kon amo sini ang imo nga problema, indi mangampo! Nahibaluan mo na ang problema, kag may tulumuron ka na. Kinahanglan mo na lang ang yabi ukon solusyon agod mabuksan ini nga puertahan. Binagbinaga ang pila ka problema nga mahimo mo maatubang, kag ang mga panugda agod malandas ini nga mga problema.

  Ang Problema: PAGPABAYA.

“Bangod sa akon kasakuon, kon kaisa nagakalipat na ako mangamuyo.”​—Preeti, 20 anyos, Britanya.

Ang Solusyon: “Padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo, nga ginabakal ang nagakaigo nga tion para sa inyo kaugalingon, bangod ang mga adlaw malaut.”​—Efeso 5:15, 16.

Ang Panugda: Planuha na nga daan kon san-o ka puede makapangamuyo kada adlaw. Mahimo pa gani nga isulat mo ini kaangay sang pahanumdom para sa isa ka transaksion. “Kon indi gani ako magbutang sing espesipiko nga iskedyul para makapangamuyo, nagakaubos lang ang akon tion sa iban nga butang,” siling ni Yoshiko, 18 anyos nga taga-Japan.

Ang Problema: TUBLAG.

“Indi ako makakonsentrar kag daw nagalagaw ang pensar ko.”​—Pamela, 17 anyos, Mexico.

Ang Solusyon: “Gikan sa kabuganaan sang tagipusuon nagahambal ang baba.”​—Mateo 12:34.

Ang Panugda: Kon nagalagaw gihapon ang imo pensar kon nagapangamuyo ka, tilawi nga palip-uton ini tubtob nga makakonsentrar ka na sing maayo. Ang isa pa ka panugda: Ipangamuyo kon ano gid ang imo mga ginakabalak-an. “Sang nangin tin-edyer na ako,” siling sang 14 anyos nga si Marina nga taga-Rusya, “nahangpan ko nga ang pangamuyo aktual nga pagpakigsugilanon sa Dios. Nagpahulag ini sa akon nga ipabutyag sa iya kon ano ang yara sa akon tagipusuon.”

Ang Problema: SULITSULIT.

“Ginasulitsulit ko lang ang akon pangamuyo.”​—Dupe, 17 anyos, Benin.

Ang Solusyon: “Pamalandongon ko man ang tanan mong binuhatan, kag painoinohon ang imo hinimoan.”​—Salmo 77:12.

Ang Panugda: Kon amo lang pirme ang ginapangamuyo mo, isulat kada adlaw ang isa ka pagpakamaayo nga nabaton mo. Nian, pasalamati si Jehova para sa sini. Himua ini sa sulod sang isa ka semana, kag may pito ka na ka pangamuyo nga may lainlain nga topiko. Himua man ini sa mga nagakatabo sa imo kada adlaw. “Kon mangamuyo ako, ginatinguhaan ko nga isentro ang akon panghunahuna sa kon ano ang natabo sa sina nga adlaw,” siling sang 21-anyos nga si Bruno nga taga-Brazil. Amo man sini ang ginhimo ni Samantha, 18 anyos nga taga-Estados Unidos. “Ginapamensar ko ang tanan nga natabo sa akon subong nga adlaw nga tuhay sangsa nagligad nga mga inadlaw, kag amo ini ang ginapangamuyo ko,” siling niya. “Nakabulig ini sa akon nga malikawan ang pagsulit-sulit sang akon pangamuyo.” *

Ang Problema: PANGDUHADUHA.

“Sang ginpangamuyo ko ang akon problema sa eskwelahan, wala man ini nasolbar. Nadugangan pa gid gani. Naghunahuna ako: ‘Ngaa mangamuyo pa ako kay wala man ko gihapon ginapamatian ni Jehova!’”​—Minori, 15 anyos, Japan.

Ang Solusyon: “Kon mag-abot ang pagsulay magahimo man [si Jehova] sang lulutsan agod mabatas ninyo ini.”​—1 Corinto 10:13.

Ang Panugda: Isa ka butang ang mapat-od naton: Si Jehova mismo amo ang “nagapamati sang mga pangamuyo.” (Salmo 65:2) Gani sa tapos makapangamuyo, tinguhai nga hangpon ang bug-os nga kahimtangan. Sa baylo nga maghulat sa ginapaabot mo nga sabat, tan-awa basi nasabat na ini sa iban nga paagi. Ang katunayan nga nagabatas ka bilang Cristiano nagapahangop nga ayhan ginsabat gid man ni Jehova ang imo pangamuyo, indi paagi sa pagdula sang problema kundi paagi sa paghatag sa imo sing kusog agod mabatas ini.​—Filipos 4:13.

Ang Problema: KAHUYA.

“Nahuya ako mangamuyo antes manyaga kay basi ano ang isiling sang akon mga kaeskwela.”​—Hikaru, 17 anyos, Japan.

Ang Solusyon: ‘Sa tagsa ka butang may nagakaigo nga tion para sa luyag naton himuon.’​—Manugwali 3:1, Beck.

Ang Panugda: Bisan pa mahimo may manamian kon makita nila nga nagapangamuyo ka, indi  kinahanglan nga ipakita mo gid ini sa iban. Halimbawa, ang malip-ot nga pangamuyo sang matutom nga si Nehemias maathag nga mahipos, kay bisan gani yara sia sa atubangan ni Hari Artajerjes wala sing rekord nga nagapakita nga natalupangdan sia sang hari nga nagapangamuyo. (Nehemias 2:1-5) Puede ka man makapangamuyo kay Jehova nga indi matalupangdan sang iban.​—Filipos 4:5.

Ang Problema: PAGBATYAG NGA INDI TAKUS.

“Kabalo naman si Jehova sang akon mga problema. Kon ako gani daw mangampo na, pamatyag ko amo man sia! Kon kaisa nagabatyag ako nga indi takus nga mangamuyo sa iya.”​—Elizabeth, 20 anyos, Ireland.

Ang Solusyon: ‘Itugyan ninyo sa Dios ang tanan ninyo nga kabalaka, bangod nagaulikid sia sa inyo.’​—1 Pedro 5:7.

Ang Panugda: Sa imo personal nga pagtuon, panalawsawi kag pamalandungi ang masunod: Lucas 12:6, 7; Juan 6:44; Hebreo 4:16; 6:10; 2 Pedro 3:9. Ini nga mga teksto makabulig sa imo nga mahangpan nga luyag ni Jehova mamati sa imo, kag indi kinahanglan nga mangin pinasahi ka nga Cristiano agod pamatian niya ang imo pangamuyo. Ang salmista nga si David, nga nakaeksperiensia man sang kabalaka kag kasubo, nagpabutyag sing pagsalig nga “ang GINOO malapit sa mga boong sing tagiposoon, kag nagaluwas sang mga mahinulsulon sa espiritu.” *​—Salmo 34:18.

Ang katunayan nga si Jehova mismo ang nagapamati sang imo pangamuyo, nagapakita nga interesado gid sia sa imo. “Wala ginhatag ni Jehova sa mga anghel ang katungdanan sa pagpamati sa aton mga pangamuyo,” siling sang 17 anyos nga si Nicole nga taga-Italya. “Bangod sia mismo ang nagapamati sang aton pangamuyo, importante gid ini sa iya.”