Ang Relihion Bala Makapaluntad sang Paghidait?

PARA sa pila ka tawo, ang pinakabalaan nga simbahan sang Cristiandad amo ang Church of the Holy Sepulchre sa Jerusalem. Pero ini nga simbahan nangin simbulo man sang pag-ilinaway sang mga relihion. Suno sa tradisyon, ang ginatindugan sang simbahan amo ang lugar diin “ginapatihan nga ginlubong si Cristo kag ginbanhaw.” Pero sa sining ginapakabalaan nga lugar, pirme lang may nagainaway. Ang mga monghe kag pari sang anom ka lainlain nga “Cristiano” nga sekta nagailinaway kon sin-o ang magamit sang simbahan. Naglala pa gid ini sang nagliligad lang nga tinuig. Gani, nagpasilabot na ang mga pulis kag sila na anay ang nagkontrol sa simbahan.

Mapintas nga Kasaysayan

Indi na bag-o ang natabo sa Church of the Holy Sepulchre. Halin pa sang una, madamo ang nagapamintas kag nagapinatyanay bangod sa relihion. Sang ginbinagbinag ang pag-ilinaway sining karon lang sa lainlain nga bahin sang kalibutan, ang libro nga Violence in God’s Name nagsiling: “Halin sa Indonesia asta sa Northern Ireland, sa Middle East asta sa Kashmir, sa India asta sa Nigeria, sa Balkans asta sa Sri Lanka, nagasiling ang mga Cristiano, Budhista, Judiyo, Hindu, Muslim kag Sikh nga nagapamintas sila kay gusto nila proteksionan ang ila relihion.”

Pero ginatudlo sang kalabanan nga relihion nga importante ang paghidait kag paghiusa. Halin pa sang una, ginatudlo sang relihion ang mga prinsipio pareho sang gugma sa isigkatawo kag pagkasagrado sang kabuhi sang tawo. Gani, indi bala nga dapat ang relihion ang manguna sa pagpaluntad sang paghidait? Ini nga pamangkot, dapat pamensaran sing maayo sang sinsero nga mga sumilimba.