SI Rustam nga taga-Rusya masako pirme. Sang una, may mga bisyo sia. Pero narealisar niya nga may malain ini nga epekto. Gani gin-untatan niya ang pagpanigarilyo kag pagpahubog. Pero daw kaluya gihapon sa iya kay ang iya obra, pungko lang pirme sa atubangan sang kompyuter.

Bisan alas otso sang aga ang obra ni Rustam, daw ginatuyo sia gihapon asta mag-alas dies. Pirme man sia nagamasakit. Gani naghimo sia sing mga pagbag-o sa iya kaugalingon. Bangod sini, “sang nagligad nga pito ka tuig, mga duha lang ka adlaw kada tuig ako nga nagamasakit,” siling niya. “Kanami gid sang pamatyag ko, kapagsik na sa akon!”

Si Ram, upod sa iya asawa kag duha ka bata nagaistar sa Nepal. Mahigko ang ila palibot kag madamo sing lamok kag langaw sa ila lugar. Sang una, pirme lang sila may balatian sa baga kag nagakaimpeksion ang ila mata. Gani naghimo man sila sing mga pagbag-o kag nag-ayo gid ang ila panglawas.

Manggaranon man ukon imol, wala marealisar sang madamo nga may epekto ang ila ginahimo sa ila panglawas. Para sa ila, may mga tawo gid ya nga may maayo nga panglawas kag wala na sila sing mahimo sa sini. Gani, madamo ang wala na nagatinguha nga mapaayo pa ang ila panglawas kag kabuhi.

Ang matuod, manggaranon ka man ukon imol, may mahimo ka para maproteksionan kag mag-ayo pa gid ang imo panglawas kag sang imo pamilya. Kon panikasugan mo ini, mangin maayo kag maglawig ang imo kabuhi.

Paagi sa pagtudlo kag halimbawa, mabuligan sang mga ginikanan ang ila kabataan para mangin maayo ang panglawas. Kon himuon nila ini, mabuhinan ang pag-antos ukon ang gasto bangod sa balatian kag malikawan man ang pag-uyang sing tion. Amo gani nga pirme naton mabatian, mas maayo ang paghalong sangsa pagpabulong.

Binagbinagon sang masunod nga mga artikulo ang lima ka paagi nga nakabulig kay Rustam, Ram, kag iban pa. Ini nga mga paagi makabulig man sa imo!