Pito ka Maalamon nga Laygay

ANG masunod nga praktikal nga mga laygay makita sa dumaan nga libro. Hunahunaa kon paano ini makabulig sa imo pagbadyet.

1. “Ang nagahigugma sang pilak indi mabusug sing pilak; bisan ang nagahigugma sang kabuganaan, sing patubas.” (Manugwali 5:10) Ang naghambal sini amo si Hari Solomon sang Israel. Indi sia imol kag wala sia nahisa. Ang matuod, isa sia sa pinakamanggaranon nga tawo kag base ini sa iya eksperiensia kag obserbasyon. Amo man sini ang ginasiling sang mga manggaranon nga mga tawo subong.

2. “Kon kita may kalan-on kag mga bayo, makontento na kita sa sini. Ang mga luyag magmanggaranon nagakahulog sa pagsulay.” (1 Timoteo 6:8, 9, BKK) Ang nagsulat sini amo si apostol Pablo. Gintalikdan niya ang iya propesyon kag nangin sumulunod ni Jesucristo. Indi kaangay sang lider sang mga relihion subong, ginlikawan gid ni Pablo ang pagpangayo sing kuarta sa iya mga estudyante ukon kaupdanan. Sa baylo, sia nagsiling: “Wala ako maghamkon sa pilak ukon bulawan ukon panapton sang bisan sin-o nga tawo. Nahibaluan ninyo mismo nga ini nga mga kamot nag-atipan sa akon mga kinahanglanon kag sa ila sang akon mga kaupod.”—Binuhatan 20:33, 34.

 3. “Sin-o sa inyo nga luyag magtukod sang torre ang wala anay nagalingkod kag nagasuma sang kagastuhanan, agod mahibaluan kon bala may bastante sia nga inugpahuman sa sini?” (Lucas 14:28) Ini nga ilustrasyon ni Jesus mahimo mo maaplikar. Halimbawa, kon nagabakal ka, ilabi na kon nagagamit sing credit card, mapataka ka na lang bala bakal ukon tan-awon mo anay ang presyo? Kinahanglan mo gid bala ini, kag mabayaran mo?

4. “Ang nagahulam ulipon sang nagapahulam.” (Hulobaton 22:7, BKK) Ang krisis sa ekonomiya sining karon lang sa kalibutan nagapakita sang kabuangan sa paggamit sing credit card kag pagpangutang. “Kinaandan na nga ang mga tawo karon may aberids nga utang nga sobra sa $9,000 sa ila apat ka credit card ukon kapin pa,” siling ni Michael Wagner sa iya libro nga Your Money, Day One sang 2009.

5. “Ang malauton nagahulam, kag wala nagabayad, apang ang matarung nagahikalooy kag nagahatag.” (Salmo 37:21) Ginahunahuna sang iban nga ang pinakamahapos nga paagi nga mapalagyuhan ang ila utang amo ang pagdeklarar sang pagkaputo. Sa pihak nga bahin, ang nagapabalor sa ila maayo nga kaangtanan sa Dios wala lamang nagabayad sang ila utang kundi maalwan man.

6. “Nanginpamatan-on ako, kag karon tigulang na; apang wala ako makakita nga ang matarung ginpabayaan ukon ang iya kaliwat nga nagapakilimos sing kalan-on.” (Salmo 37:25) Ginsulat ini ni David, isa ka tawo nga nag-antos sing inhustisya. Pila ka tuig sia nga nalagyo, kon kaisa nagaistar sa mga kueba kag kon kaisa nagadangop sa iban nga pungsod. Sang ulihi, nangin hari sia sang dumaan nga Israel. Naeksperiensiahan gid ni David nga matuod ang iya ginsiling.

7. “May kapin nga kalipay sa paghatag sangsa pagbaton.” (Binuhatan 20:35) Ginpamulong ini sang pinakabantog nga tawo nga nagkabuhi. “Tungod sa kalipay nga ginbutang sa iya atubangan,” gingamit ni Jesus ang iya kabuhi diri sa duta para mag-alagad sa iban. Sa karon, isa na sia ka imortal nga espiritu nga persona sa langit sa tuo nga kamot “sang malipayon nga Dios” nga si Jehova.—Hebreo 12:2; 1 Timoteo 1:11.

Kon ilugon naton si Jesus paagi sa paghimo sang aton labing masarangan sa pagbulig sa iban, mangin mapuslanon gid ang aton kabuhi. Mahimo magaugyon ka gid nga mas maayo nga magsupot, sangsa maggasto para may ihatag ka man sa iban.