Ang kapintas sa mga babayi nangin “lapnag katama nga problema sa kapagros sa bilog nga kalibutan,” suno sa World Health Organization (WHO). “Mga 35% sang tanan nga babayi ang makaeksperiensia sang kapintas sa ila bana ukon ginapuyopuyo, ukon sa iban nga tawo,” siling sang WHO. “Ang pagpamintas sang mga bana ukon ginapuyopuyo amo ang pinakakinaandan . . . , nga nagaapektar sa 30% sang mga babayi sa bilog nga kalibutan.”

Sang ginsurbe ang 64,303 ka tawo, 79 porsiento ang nagsiling nga “relihion ang kabangdanan sang pag-antos kag ginamo sa kalibutan subong.” Nasapwan man sa 2011 nga sensus sa England kag Wales nga 59 porsiento lang sang populasyon sini ang nagapangangkon nga Cristiano, nagnubo halin sa 72 porsiento sang 2001. Sina man nga tion, nagtaas sa 25 halin sa 15 porsiento ang nagsiling nga wala sila sing relihion.

Suno sa mga report, ginapatuman sang bag-o lang naamiendahan nga kasuguan nga indi lang nga duawon pirme sang hamtong na nga mga kabataan ang ila nagatigulang nga mga ginikanan kundi dapat atipanon man nila ang ila “emosyonal nga kinahanglanon.” Ang kasuguan “wala sing bisan ano nga silot” sa mga kabataan nga indi magtuman sini.

Ginapeke subong sang mga sindikato ang mga produkto pareho sang kosmetiko, habon panglaba, kag bisan ang pagkaon. “Bisan ang mga baratuhon nga mga produkto ginapeke basta makuartahan lang,” siling sang presidente sang isa ka kompanya nga nagabantay sang seguridad sang mga pagkaon. Ginabulubanta sang isa ka eksperto nga 10 porsiento sang mga pagkaon nga mabakal sa manggaranon nga mga pungsod ang may simbog na.