1. Pag-asawahay

Sarisari ang pagtan-aw sang mga tawo sa pag-asawahay kag kon paano mangin malipayon ang pag-asawahay.

ANG BUOT SILINGON: Ang Dios ang nag-umpisa sang pag-asawahay, gani nakahibalo sia kon ano ang kinahanglanon para mangin malipayon ang mag-asawa. (Marcos 10:​6-9) Mangin malipayon ang mag-asawa kon indi sila magpokus sa ila makuha, kundi sa kon ano ang mahatag nila para magbakod ang ila pag-asawahay. Mapakita sang bana nga palangga niya ang iya asawa paagi sa pagtratar kag pag-atipan sa iya sing maayo. Mapakita sang asawa nga ginarespeto niya ang iya bana paagi sa pagsuporta kag paghambal sing mainayuhon sa iya bana.

MAKABULIG GID ANG GIYA SANG BIBLIA: Sanday Quang kag Thi, nga taga-Vietnam, nagapati nga indi gid sila mangin malipayon sa ila pag-asawahay. Masami nga indi mainayuhon si Quang. Nagsiling sia: “Wala ako sang labot sa ginabatyag ni Thi kag pirme ko sia ginapakahuy-an.” Gusto ni Thi nga mag-divorce sila. Nagsiling sia: “Pamatyag ko wala na ako sing salig kag respeto sa akon bana.”

Sang ulihi, natun-an ni Quang kag ni Thi ang ginatudlo sang Biblia kag ginsunod nila sa ila pag-asawahay ang Efeso 5:33. “Natun-an ko sa sini nga teksto nga dapat ako mangin mainayuhon,” siling ni Quang, “kag ipabatyag kay Thi nga palangga ko sia kag atipanon ang iya materyal, pisikal, kag emosyonal nga kinahanglanon. Kon himuon ko ini, palanggaon niya pa gid ako kag respetuhon.” Kag nagsiling si Thi, “Sang ginsunod ko pa gid ang Efeso 5:33 kag ginrespeto ang akon bana, mas ginpalangga niya pa gid ako, ginproteksionan, kag nakabatyag ako sing kalinong.”

 2. Kon Paano Trataron ang Iban

Sa masami, malain ang pagtratar sang mga tawo sa iban bangod sa ila rasa, nasyonalidad, hitsura, relihion, ukon bangod homoseksuwal sila.

ANG BUOT SILINGON: Wala kita ginatudluan sang Biblia nga dumtan ang mga tawo bangod lain ang ila rasa, nasyonalidad, ukon bangod kay homoseksuwal sila. Kundi ginatudluan kita sini nga respetuhon ang tanan nga tawo ano man ang ila rasa, nasyonalidad, manggaranon man sila ukon pigado. (Binuhatan 10:34) Bisan pa indi naton gusto ang ginapatihan ukon ginahimo sang iban, ginapakitaan naton sila gihapon sing kaayo kag respeto.​—Mateo 7:12.

MAKABULIG GID ANG GIYA SANG BIBLIA: Gintudluan si Daniel nga ang mga tawo halin sa Asia puede makapanghalit sa iya pungsod. Ginadumtan niya ang bisan sin-o nga halin sa Asia kag pirme niya sila ginainsulto bisan sa madamo nga tawo. “Abi ko ginasuportahan ko ang akon pungsod,” siling ni Daniel. “Wala ko gid ginpensar nga sala gali ang akon ginahunahuna kag ginahimo.”

Sang ulihi, natun-an ni Daniel ang ginatudlo sang Biblia. “Dapat ko gid bag-uhon ang akon panghunahuna,” siling ni Daniel. “Kinahanglan ko tan-awon ang mga tawo pareho sa pagtan-aw sa ila sang Dios, kay palareho lang kita tanan bisan diin man kita naghalin.” Ginasugid ni Daniel kon ano ang iya ginabatyag kon may makilala sia nga mga tawo subong. Siling niya: “Sa masami wala ko na ginapensar kon diin sila halin. Subong, palangga ko na ang tanan nga klase sang tawo kag may suod na ako nga mga abyan sa bilog nga kalibutan.”

 3. Paggamit sang Kuarta

Madamo nga tawo ang nagatinguha nga magmanggaranon para mangin malipayon kag may maayo nga palaabuton.

ANG BUOT SILINGON: Kinahanglan naton ang kuarta, pero indi sini masigurado nga mangin malipayon kita ukon may maayo nga palaabuton. (Hulubaton 18:11; 23:​4, 5) Ang matuod nga kalipay kag maayo nga palaabuton nagadepende sa pagsunod sa kaalam sang Dios nga makita sa Biblia.​—1 Timoteo 6:​17-19.

MAKABULIG GID ANG GIYA SANG BIBLIA: Si Cardo, nga taga-Indonesia, nagatinguha gid nga magmanggaranon. “Ara na sa akon ang tanan nga ginahandum sang kalabanan nga tawo,” siling niya. “Makabakasyon ako, kag makabakal sang malahalon nga mga butang, mga salakyan, kag mga balay.” Pero ini tanan wala nagdugay. “Gintunto ako, kag ang tanan nga kuarta nga ginpangabudlayan ko sa madamo nga tuig, nadula lang sa isa ka pisok,” siling ni Cardo. “Tinuig ako nga nagpangabudlay para magmanggaranon pero napaslawan lang ako, kay wala na sang nabilin sa akon kag pamatyag ko wala ako sing pulos.”

Ginsunod ni Cardo ang laygay sang Biblia parte sa kuarta. Wala na niya ginaubos ang iya kusog para magmanggaranon kundi ginpasimple niya ang iya kabuhi. “Pamatyag ko matuod na ako nga manggaranon subong, kay maayo ang akon relasyon sa Dios,” siling niya. “Kanami gid sang tulog ko kada gab-i, kag malipayon na gid ako.”

 4. Pagpakig-sex

Sarisari ang opinyon sang mga tawo kon ano ang insakto parte sa sex.

ANG BUOT SILINGON: Ginalimitahan sang Biblia kon paano naton ipabutyag ang aton mga handum sa sex. Ang ekspresyon nga “seksuwal nga imoralidad” nagalakip sang pagpakighilahi, prostitusyon, pagpakig-sex sang indi kasal, homoseksuwalidad, kag bestialidad. (1 Corinto 6:​9, 10) Ang pagpakig-sex regalo sang Dios para lang sa lalaki kag babayi nga nakasal sa isa kag isa.​—Hulubaton 5:​18, 19.

MAKABULIG GID ANG GIYA SANG BIBLIA: Ang isa ka babayi sa Australia nga si Kylie nagsiling: “Sang single ako, abi ko kon makig-sex ako, makabatyag ako sang pagpalangga kag kasiguruhan. Pero kabaliskaran ang natabo. Nangin insecure ako kag nasakitan.”

Sang ulihi, natun-an kag ginsunod ni Kylie ang ginatudlo sang Biblia parte sa sex. “Natun-an ko nga ang mga sugo sang Dios makabulig gid nga malikawan ang kasakit,” siling niya. “Subong, ginahimo ko ang mga butang sa paagi nga gusto ni Jehova. May bana na ako subong kag nakabatyag na ako sing kasiguruhan kag pagpalangga. Ang pagsunod sa giya sang Biblia nakabulig sa akon nga malikawan ang grabe nga kasakit!”