1. Ano ang ginasiling sang isa ka anghel, kag ano dapat ang epekto sini sa aton?

 KON istoryahon ka sang isa ka anghel, pamatian mo bala sia? Subong, may ginasiling ang isa ka anghel “sa tagsa ka pungsod kag tribo kag hambal kag katawhan.” Ano ang iya ginasiling? “Kahadluki ninyo ang Dios kag himayaa sia . . . Simbaha ninyo ang Isa nga naghimo sang langit [kag] duta.” (Bug. 14:6, 7) Si Jehova lamang ang matuod nga Dios nga dapat simbahon sang tanan. Nagapasalamat gid kita kay ginhatagan niya kita sang pinasahi nga pribilehiyo nga masimba sia sa iya daku nga espirituwal nga templo.

2. Ano ang espirituwal nga templo ni Jehova? (Tan-awa man ang kahon nga “ Mga Indi Espirituwal nga Templo.”)

² Ano ang espirituwal nga templo, kag diin naton makita ang mga detalye nga nagapaathag sa sini? Ang espirituwal nga templo indi isa ka literal nga bilding. Kahimusan ini ni Jehova para masimba naton sia sa husto nga paagi base sa halad-gawad ni Jesus. Ginpaathag ni apostol Pablo ini nga kahimusan, kag mabasa ini sa iya sulat para sa Hebreo nga mga Cristiano sa Judea sang unang siglo. b

3-4. Ngaa nabalaka si Pablo sa Hebreo nga mga Cristiano sa Judea, kag paano niya sila ginbuligan?

³ Ngaa ginsulatan ni Pablo ang Hebreo nga mga Cristiano sa Judea? Posible nga may duha ka rason. Una, para palig-unon sila. Ginasunod sang kalabanan sa ila ang relihion sang mga Judiyo antes sila nangin Cristiano. Posible nga ginhikayan sila sang mga lider sang relihion nga ginhalinan nila. Ngaa? Bangod wala sang templo ang mga Cristiano para gamiton sa ila pagsimba, wala sila  sang halaran para makahalad sila sa Dios, kag wala sila sang mga saserdote para mag-alagad sa ila. Posible nga nagpaluya ini sang ila buot kag sang ila pagtuo. (Heb. 2:1; 3:12, 14) Posible pa gani nga nahunahuna sang pila sa ila nga magbalik sa Judaismo.

⁴ Ikaduha, ginpatalupangod ni Pablo sa Hebreo nga mga Cristiano nga wala sila nagapanikasog nga mahangpan ang bag-o ukon madalom nga mga panudlo sa Pulong sang Dios. Gintawag ni Pablo ini nga mga panudlo nga “matig-a nga pagkaon.” (Heb. 5:11-14) Maathag nga ginasunod gihapon sang pila sa ila ang Mosaikong Kasuguan. Pero ginpaathag ni Pablo nga indi makapatawad sing bug-os ang mga halad nga ginpatuman sang Kasuguan. Bangod sini, “gindula” ang Kasuguan. Dayon gintudluan sila ni Pablo sang pila ka madalom nga mga kamatuoran. Ginpahanumdom niya sa iya mga kauturan nga “ang mas maayo nga paglaum” nga nabase sa halad-gawad ni Jesus amo ang makabulig sa ila nga ‘makapalapit sa Dios.’​—Heb. 7:18, 19.

5. Ano ang ginatudlo sa libro sa Biblia nga Hebreo nga dapat naton mahangpan, kag ngaa?

⁵ Ginpaathag ni Pablo sa iya Hebreo nga mga kauturan nga mas labaw ang ila paagi sang pagsimba kay Jehova subong kon ikumparar sa ila paagi sang pagsimba sa Iya sadto. Ang paagi sang pagsimba sang mga Judiyo nga ginpatuman sang Kasuguan “landong [lang] sang mga butang nga magaabot, apang ang katunayan amo ang Cristo.” (Col. 2:17) Paagi sa landong sang isa ka butang, mahatagan kita sang ideya kon ano ang hitsura ukon porma sini. Daw pareho sa sini ang paagi sang mga Judiyo sa pagsimba sa Dios sadto. Landong lang ini sang mas labaw nga paagi sang pagsimba kay Jehova. Gani dapat naton mahangpan ining bag-o nga paagi sang pagsimba sa iya. Kay man, ginpaposible sini ang kapatawaran sang aton mga sala para masimba naton sia sa paagi nga gusto niya. Base sa paathag sa libro sang Hebreo, ikumparar naton ang “landong” (ang paagi sang pagsimba kay Jehova sadto) kag “ang katunayan” (ang paagi sang pagsimba kay Jehova subong). Paagi sa sini, mas mahangpan naton sing maayo ang espirituwal nga templo kag kon ngaa dapat kita mangin interesado sa sini.

6. Para sa ano ang tabernakulo?

⁶ Ang paagi sang pagsimba kay Jehova sadto. Sa sulat ni Pablo, ginpatuhuyan niya ang tabernakulo nga ginhimo ni Moises sang 1512 B.C.E. para ipaathag ang iya punto. (Tan-awa ang tsart  nga “Ang Paagi sang Pagsimba kay Jehova Sadto​—Ang Paagi sang Pagsimba kay Jehova Subong.”) Ang hitsura sang tabernakulo daw pareho sa isa ka tolda. Ginadala sang mga Israelinhon ang tabernakulo kon nagasaylosaylo sila sang lugar. Gingamit nila ini sa sulod sang halos 500 ka tuig asta nga napatindog ang templo sa Jerusalem. (Ex. 25:8, 9; Num. 9:22) Ining “tolda nga tilipunan” amo ang ginagamit sang mga Israelinhon para magdangop sa Dios, para maghalad, kag para magsimba. (Ex. 29:43-46) Pero, may ginarepresentar man ang tabernakulo nga isa ka mas labaw nga kahimusan para sa mga Cristiano sa ulihi.

7. San-o nangin katunayan ang espirituwal nga templo?

⁷ Ang paagi sang pagsimba kay Jehova subong. Ang tabernakulo sang una “nagalandong sang langitnon nga mga butang,” kag nagarepresentar ini sa daku nga espirituwal nga templo ni Jehova. Nagsiling si Pablo nga “ini nga tolda [ukon, tabernakulo] isa ka ilustrasyon sang mga butang nga nagakahanabo sa sini nga tion.” (Heb. 8:5; 9:9) Gani sang tion nga ginsulatan niya ang mga Hebreo, ara na ang espirituwal nga templo para sa mga Cristiano. Nangin isa ini ka katunayan sang 29 C.E. Sadto nga tuig, nabawtismuhan si Jesus, ginhaplasan sia sang balaan nga espiritu, kag nag-umpisa sia sa pag-alagad bilang ‘daku kag mataas nga saserdote’ ni Jehova sa espirituwal nga templo. c​—Heb. 4:14; Binu. 10:37, 38.

8-9. Suno sa Hebreo 7:23-27, ano ang kinalain sang mataas nga mga saserdote sang Israel kag sang Mataas nga Saserdote nga si Jesucristo?

⁸ Ang paagi sang pagsimba kay Jehova sadto. Ang mataas nga saserdote amo ang nagaatubang sa Dios para sa katawhan. Si Aaron ang pinakauna nga mataas nga saserdote sang Israel, kag gintangdo sia ni Jehova sang gin-inagurahan ang tabernakulo. Pero, nagsiling si Pablo nga “bangod indi makapadayon ang mga saserdote sa ila pag-alagad kay nagakapatay sila, ginabuslan sila sang iban.” d (Basaha ang Hebreo 7:23-27.) Kag bangod indi perpekto ang mga saserdote, dapat sila maghalad para sa ila mga sala. Amo ini ang kinalain sang mataas nga mga saserdote sang Israel kag sang Mataas nga Saserdote nga si Jesucristo.

⁹ Ang paagi sang pagsimba kay Jehova subong. Bilang aton Mataas nga Saserdote, si Jesucristo “isa ka alagad . . . sa matuod nga tolda, nga ginpatindog ni Jehova, kag indi sang tawo.” (Heb. 8:1, 2) Ginpaathag ni Pablo nga “bangod nagakabuhi [si Jesus] sing dayon, wala sing nagabulos sa iya pagkasaserdote.” Nagsiling pa si Pablo nga si Jesus “wala sing dagta, indi kaangay sa mga makasasala.” Kag indi pareho sa mataas nga mga saserdote sang Israel, “indi niya kinahanglan nga magdulot sang mga halad kada adlaw” para sa iya mga sala. Binagbinagon naman naton ang mga halaran kag ang mga halad, kag kon ano ang kinalain sini sa paagi sang pagsimba kay Jehova subong.

10. Ano ang ginarepresentar sang mga halad sa saway nga halaran?

¹⁰ Ang paagi sang pagsimba kay Jehova sadto. Sa gua sang puertahan sang tabernakulo, may ara saway nga halaran. Diri nagahalad sang mga sapat para kay Jehova. (Ex. 27:1, 2; 40:29) Pero, ini nga mga halad indi makapatawad sing bug-os sa mga sala sang mga tawo. (Heb. 10:1-4) Ang paghalad sang mga sapat sa tabernakulo nagarepresentar sa isa ka halad nga makatumbas sing bug-os sa mga sala sang katawhan.

11. Sa diin nga halaran ginhalad ni Jesus ang iya kaugalingon? (Hebreo 10:5-7, 10)

 ¹¹ Ang paagi sang pagsimba kay Jehova subong. Kabalo si Jesus nga ginpadala sia ni Jehova sa duta para ihatag ang iya kabuhi para gawaron ang katawhan. (Mat. 20:28) Gani sang ginbawtismuhan si Jesus, ginpresentar niya ang iya kaugalingon para himuon ang kabubut-on ni Jehova. (Juan 6:38; Gal. 1:4) Ginhalad ni Jesus ang iya kaugalingon sa malaragwayon nga halaran nga nagarepresentar sa “kabubut-on” sang Dios. Kabubut-on ni Jehova nga ihalad sang iya Anak ang iya perpekto nga kabuhi bilang tawo. Ginhalad ni Jesus ang iya kabuhi “sing makaisa gid lang” para tumbasan, ukon permanente nga tabunan, ang mga sala sang tanan nga nagatuo sa Cristo. (Basaha ang Hebreo 10:5-7, 10.) Binagbinagon naman naton ang mga ara sa sulod sang tabernakulo, kag kon ano ang mga ginarepresentar sini.

12. Sin-o ang makasulod sa kada hulot sang tabernakulo?

¹² Ang paagi sang pagsimba kay Jehova sadto. Pareho ang sulod sang tabernakulo kag ang sulod sang mga templo nga ginpatindog sa Jerusalem sang ulihi. May ara ini duha ka hulot nga ginatawag “ang Balaan nga Lugar” kag “ang Labing Balaan,” kag may kurtina nga may burda nga nagaseparar sa sining duha ka hulot. (Heb. 9:2-5; Ex. 26:31-33) Ara sa Balaan nga hulot ang bulawan nga kandelero, ang halaran nga sunugan sing incienso, kag ang lamesa nga ginabutangan sang dulot nga tinapay. “Ang hinaplas nga mga saserdote” lang ang puede makasulod sa Balaan nga hulot para himuon ang ila mga obligasyon. (Num. 3:3, 7, 10) Ara sa Labing Balaan nga hulot ang bulawan nga kaban sang katipan nga nagarepresentar sa presensia ni Jehova.  (Ex. 25:21, 22) Ang mataas nga saserdote lang ang puede makaagi sa kurtina kag makasulod sa Labing Balaan nga hulot. Ginahimo niya ini sing makaisa kada tuig sa tion sang Adlaw sang Pagtumbas Para sa Sala. (Lev. 16:2, 17) Kada tuig, nagasulod sia sa Labing Balaan nga hulot kag may dala sia nga dugo sang mga sapat para tumbasan ang iya mga sala kag ang mga sala sang bilog nga pungsod. Sang ulihi, gin-athag ni Jehova paagi sa iya balaan nga espiritu kon ano ang mga ginarepresentar sini nga mga bahin sang tabernakulo.​—Heb. 9:6-8. e

13. Ano ang ginarepresentar sang Balaan kag sang Labing Balaan nga mga hulot sang tabernakulo?

¹³ Ang paagi sang pagsimba kay Jehova subong. Ginhaplasan sang balaan nga espiritu ang limitado nga kadamuon sang mga disipulo sang Cristo, kag may pinasahi sila nga kaangtanan kay Jehova. Ining 144,000 magaalagad bilang mga saserdote sa langit kaupod ni Jesus. (Bug. 1:6; 14:1) Samtang ari sila sa duta, ginhaplasan sila sang Dios sang iya espiritu kag gin-adoptar niya sila bilang iya mga anak. Ining pinasahi nila nga kaangtanan sa Dios amo ang ginarepresentar sang Balaan nga hulot sang tabernakulo. (Roma 8:15-17) Ang Labing Balaan nga hulot sang tabernakulo nagarepresentar sa langit nga ginapuy-an ni Jehova. Ang “kurtina” nga nagaseparar sa Balaan kag Labing Balaan nagarepresentar sa lawas ni Jesus bilang tawo. Samtang may lawas sia bilang tawo, indi sia makasulod sa langit bilang daku nga Mataas nga Saserdote sa espirituwal nga templo. Paagi sa pagsakripisyo ni Jesus sang iya lawas bilang halad para sa katawhan, ginpaposible niya ang kabuhi sa langit para sa tanan nga hinaplas nga mga Cristiano. Dapat man nila isakripisyo ang ila lawas para mabaton nila ang ila padya sa langit. (Heb. 10:19, 20; 1 Cor. 15:50) Pagkatapos ginbanhaw si Jesus, nagsulod sia sa Labing Balaan sang espirituwal nga templo, kag makaupod niya diri ang tanan nga hinaplas.

14. Suno sa Hebreo 9:12, 24-26, ngaa mas labaw ang paagi sang pagsimba kay Jehova sa espirituwal nga templo?

¹⁴ Labaw gid ang kahimusan nga ginhimo ni Jehova para masimba naton sia sa husto nga paagi. Nabase ini sa halad-gawad, kag si Jesucristo amo ang mataas nga saserdote. Ang mataas nga saserdote sang Israel nagsulod sa Labing Balaan nga hulot nga ginhimo sang tawo kag may dala sia nga dugo sang ginhalad nga mga sapat, pero si Jesus nagsulod sa pinakabalaan nga lugar nga amo ang “langit mismo” para mag-atubang kay Jehova. Ginpresentar niya didto ang balor sang iya perpekto nga kabuhi bilang tawo para sa aton “agod dulaon ang sala paagi sa paghalad sang iya kaugalingon.” (Basaha ang Hebreo 9:12, 24-26.) Ang halad ni Jesus amo ang nagpaposible para mapatawad sing bug-os ang aton mga sala. Sa langit man ukon sa duta ang aton paglaum, masimba naton si Jehova sa iya espirituwal nga templo. Binagbinagon naton ang parte sa sini.

15. Sin-o ang nagaalagad sa luwang sang tabernakulo?

¹⁵ Ang paagi sang pagsimba kay Jehova sadto. Ang tabernakulo may ara isa ka luwang. Malapad ini nga lugar nga may kudal sa palibot, kag diri ginahimo sang mga saserdote ang ila mga obligasyon. Makita sa luwang ang daku nga saway nga halaran para sa dulot nga sinunog, pati ang saway nga labador nga may tubig nga ginahinawan sang mga saserdote antes nila himuon ang ila sagrado nga pag-alagad. (Ex. 30:17-20; 40:6-8) Pero ang mga templo nga ginpatindog sang ulihi may ara pa gid nagua nga luwang. Puede makasulod sa sini nga luwang ang mga indi saserdote para magsimba sa Dios.

16. Sin-o ang nagaalagad sa nasulod kag nagua nga mga luwang sang espirituwal nga templo?

 ¹⁶ Ang paagi sang pagsimba kay Jehova subong. Antes magpalangit ang mga hinaplas nga ari pa sa duta para mag-alagad bilang mga saserdote kaupod ni Jesus, nagaalagad sila sing matutom sa nasulod nga luwang sang espirituwal nga templo. Ang daku nga labador nga may tubig nagapahanumdom sa mga hinaplas kag sa tanan nga Cristiano nga dapat sila magpabilin nga matinlo sa moral kag espirituwal. Ti, diin naman nagaalagad kay Jehova ang “daku nga kadam-an” nga mainunungon nga nagasuporta sa hinaplas nga mga utod sang Cristo? Nakita sila ni apostol Juan nga “nagatindog sa atubangan sang trono,” kag “nagahimo sila sang sagrado nga pag-alagad sa [Dios] sa adlaw kag gab-i sa iya templo.” Ginahimo ini sang daku nga kadam-an diri sa duta sa nagua nga luwang sang espirituwal nga templo. (Bug. 7:9, 13-15) Nagapasalamat gid kita kay Jehova kay ginhatagan niya kita sang pribilehiyo nga masimba sia sa iya daku nga espirituwal nga templo.

17. Ano ang puede naton ihalad kay Jehova?

¹⁷ Subong, may pribilehiyo ang tanan nga Cristiano nga maghalad kay Jehova paagi sa paggamit sang ila tion, kusog, kag materyal nga mga butang sa pag-alagad sa iya. Suno sa ginsiling ni apostol Pablo sa Hebreo nga mga Cristiano, “[makadulot] kita pirme sa Dios sang halad sang pagdayaw, nga amo ang bunga sang aton mga bibig nga dayag nga nagapahayag sang iya ngalan.” (Heb. 13:15) Mapakita naton nga ginapabaloran naton ang aton pribilehiyo nga masimba si Jehova paagi sa paghimo sang aton pinakamaayo sa pag-alagad sa iya.

18. Suno sa Hebreo 10:22-25, ano ang indi gid naton dapat pagbalewalaon kag ano ang indi gid naton dapat pagkalimtan?

¹⁸ Basaha ang Hebreo 10:22-25. Ginsambit ni Pablo sa iya sulat para sa mga Hebreo ang aton mga hilikuton sa pag-alagad kay Jehova nga indi gid naton dapat pagbalewalaon. Mabasa ini malapit sa katapusan nga bahin sang iya sulat. Nalakip sa sini ang pagpangamuyo kay Jehova, ang pagbantala, ang pagtipon bilang isa ka kongregasyon, kag ang pagpalig-unay sa isa kag isa ‘labi na gid samtang nakita naton nga malapit na ang adlaw ni Jehova.’ Sa libro sang Bugna, nagsiling ang anghel ni Jehova: “Simbaha ang Dios!” (Bug. 19:10; 22:9) Duha ka beses niya ini nga ginsiling para ipakita nga importante gid ini. Kabay pa nga indi gid naton pagkalimtan ining madalom nga kamatuoran parte sa daku nga espirituwal nga templo ni Jehova, pati ang aton pinasahi nga pribilehiyo nga masimba sia.