SUNO sa Kasuguan, ginabaton ni Jehova bilang halad ang tukmo kag ang pating. Sa mga kasuguan parte sa paghalad, magkaupod pirme nga ginasambit ining duha ka pispis. Puede ihalad ang bisan diin man sa sini nga mga pispis. (Lev. 1:14; 12:8; 14:30) Paano nakabenepisyo sa sini nga sugo ang mga Israelinhon? Nakabenepisyo sila kay may mga bulan nga wala sing makita nga mga tukmo sa Israel. Ngaa wala sing tukmo?

Sa mga bulan nga mainit ang panahon, may makita nga mga tukmo sa bilog nga Israel. Pero kada Oktubre, nagalupad sila pabagatnan pakadto sa mga pungsod nga mainit ang panahon. (Amb. 2:11, 12; Jer. 8:7) Gani sang panahon sang Biblia, mabudlayan ang mga Israelinhon kon tukmo ang ila ihalad sa tion sang tigtulugnaw.

Kon parte naman sa mga pating, wala ini nagasaylo sa iban nga lugar. Gani may makita nga mga pating sa Israel sa bilog nga tuig. Puede man saguron ang mga pating. (Ipaanggid ang Juan 2:14, 16.) Suno sa libro nga Bible Plants and Animals, “ang tanan nga baryo kag banwa sa Palestina may ginasagod nga mga pating. Ang kada balay may buho sa dingding nga puede istaran sang mga pating.”​—Ipaanggid ang Isaias 60:8.

Ginpakita ni Jehova nga mahigugmaon sia kag makatarunganon kay ginabaton niya bilang halad ang mga pispis nga makita sa Israel sa bilog nga tuig.