Nakita Nila ang Gugma sang mga Kauturan
NAGAISTAR si Yomara sa isa ka gamay nga baryo sa Guatemala upod ang iya mga manghod nga lalaki nga si Marcelo kag si Hiver. Nag-Bible study si Yomara upod sa mga Saksi, kag sang ulihi nag-upod man sa study ang iya mga manghod. Pero, indi ini mahapos. Kay man, bulag sila nga tatlo kag indi sila kabalo magbasa sang braille. Gani, kinahanglan basahon sang naga-study sa ila ang mga parapo kag mga teksto kon naga-Bible study sila.
Indi man mahapos para sa ila kon mag-attend sa mga miting sang kongregasyon. Kay kon sila lang, mabudlayan gid sila makakadto sa pinakamalapit nga Kingdom Hall kay kinahanglan pa nila magbiyahe sang 40 ka minuto. Gani, ginabuligan sila sang mga kauturan para maka-attend sila sa tanan nga miting. Sang ulihi, ginbahinan na sila sa midweek miting. Ginabuligan sila sang mga kauturan para masaulo nila ang ila mga bahin.
Sang Mayo 2019, ginsugdan na ang mga miting sang kongregasyon sa ila baryo. Sadto nga tion, may mag-asawa nga regular payunir nga nagsaylo sa ila baryo. Indi sila kabalo sang braille, pero gusto nila tudluan sang braille ang tatlo ka mag-utod. Gani, nagkadto sila sa library kag gintun-an nila ang parte sa braille kag kon paano nila ini itudlo sa iban.
Nagakomento si Marcelo sa isa ka miting sang kongregasyon
Pagligad sang pila ka bulan, sagad na sa braille ang tatlo ka mag-utod. a Bangod sini, mas nangin suod pa gid sila kay Jehova. Subong, regular payunir na sanday Yomara, Marcelo, kag Hiver. Kag isa na ka ministeryal nga alagad si Marcelo. Mapisan gid sila sa ila pag-alagad kay Jehova kag sa ila pagbantala kada semana. Bangod sini, napalig-on gid ang mga kauturan nga mangin mapisan man sa ila pag-alagad kay Jehova.
Nagapasalamat gid ang tatlo ka mag-utod sa gugma kag sa bulig sang mga kauturan. Nagsiling si Yomara, “Halin sang nakilala namon ang mga Saksi, nabatyagan gid namon nga matuod gid ang ila gugma sa amon.” Nagsiling man si Marcelo, “Madamo kami sang mga abyan sa amon nga kongregasyon, kag pamilya na namon ang mga kauturan sa bilog nga kalibutan nga may gugma sa isa kag isa.” Excited na gid si Yomara kag ang iya mga utod sa tion nga himuon ni Jehova ang duta nga isa ka paraiso.—Sal. 37:10, 11; Isa. 35:5.
a Ginagamit ang brosyur nga Learn to Read Braille para mabuligan ang isa ka bulag nga matun-an ang braille.
Basi Manamian Ka Man
KON PAANO GINAGAMIT ANG IMO MGA DONASYON
Mga Dot nga Nagapabag-o sang Kabuhi
Indi lang paghimo sang braille nga mga publikasyon ang nalakip sa aton hilikuton, kundi ginatudluan man naton ang mga tawo kon paano magbasa sang braille.
