ANG GINASILING SANG IBAN

Ginpatay sang mga Romano si Jesus paagi sa pagbitay sa iya sa krus nga ginhimo sa duha ka kahoy.

ANG GINASILING SANG BIBLIA

Si Jesus ginpatay “paagi sa pagbitay sa kahoy.” (Binuhatan 5:30, Ang Biblia sang Philippine Bible Society) Ang mga tinaga nga gingamit sang mga manunulat sang Biblia sa paglaragway sang instrumento sa pagpatay kay Jesus nagapakita nga isa lang ini ka kahoy, indi duha. Ang Griegong tinaga nga stau·rosʹ, suno sa Crucifixion in Antiquity, “simple nga nagakahulugan sing poste. Indi ini katumbas sa ‘krus.’” Ang tinaga naman nga xyʹlon nga gingamit sa Binuhatan 5:30, “isa lamang ka nagatindog nga poste ukon usok diin ginalansang sang mga Romano ang ila mga palatyon.” *

Gin-angot man sang Biblia ang pamaagi sa pagpatay kay Jesus sa isa ka kasuguan sang Israel sang una. Ini nagasiling: “Kon ang isa ka tawo makasala kag takus sa silot nga kamatayon kag ginpatay sia kag ginbitay sa usok, indi pag-ibilin ang iya bangkay sa usok sa bug-os nga gab-i. Kundi ilubong ninyo sia sa sina nga adlaw, bangod ginpakamalaut sang Dios ang isa nga ginbitay sa usok.” (Deuteronomio 21:22, 23) Nagapatuhoy sa sini nga kasuguan, ang Cristiano nga si apostol Pablo nagsulat nga si Jesus “ginpakamalaut sa baylo nga kita, kay nasulat na: ‘Ginpakamalaut ang isa nga ginbutang sa usok [xyʹlon].’” (Galacia 3:13) Gani ginpakita ni Pablo nga napatay si Jesus sa usok, nga isa lang ka kahoy.

“Sia ginpatay nila paagi sa pagbitay sa kahoy.”—Binuhatan 10:39, Ang Biblia sang Philippine Bible Society.

ANG GINASILING SANG BIBLIA

Indi mabasa sa Biblia nga naggamit sang krus ang una nga mga Cristiano bilang simbulo sang ila relihion. Sa baylo, ang mga Romano sa sina nga panahon amo ang naggamit sang krus bilang simbulo sang ila mga dios. Pagligad sang mga 300 ka tuig sa tapos sang kamatayon ni Jesus, gingamit sang Romano nga si Emperador Constantine ang krus bilang simbulo sang iya mga hangaway, kag sang ulihi gingamit ini sa simbahan sang “Cristiano.”

Bangod mga pagano ang naggamit sang krus sa pagsimba sa ila mga dios, gamiton bala ini sang mga disipulo ni Jesus sa ila pagsimba sa matuod nga Dios? Indi gid! Kay nahibaluan nila nga madugay na nga wala ginabaton sang Dios ang pagsimba nga nagagamit “sang bisan ano nga dagway [ukon simbulo],” kag ang mga Cristiano dapat “indi . . . magsimba sa mga diosdios.” (Deuteronomio 4:15-19; 1 Corinto 10:14) “Ang Dios Espiritu,” nga indi makita sang tawo. Gani ang mga Cristiano sang una wala naggamit sang makita nga mga butang kag simbulo para buligan sila nga mangin suod sa Dios. Sa baylo, ginasimba nila sia “sa espiritu,” nga natuytuyan sang iya indi makita nga balaan nga espiritu, kag sa “kamatuoran,” nga nahisuno sa kabubut-on sang Dios nga mabasa sa Kasulatan.—Juan 4:24.

“Ang matuod nga mga sumilimba magsimba sa Amay sa espiritu kag kamatuoran.”—Juan 4:23.

ANG GINASILING SANG MGA TAWO

“Normal lang kag nagakaigo nga ang mga instrumento nga ginagamit para sa kaluwasan dapat gid tahuron kag simbahon. . . . Sia nga nagatahod sa mga imahen, nagatahod sa persona nga ginarepresentar sini.”—New Catholic Encyclopedia.

ANG GINASILING SANG BIBLIA

Ang mga Cristiano may utang nga kabalaslan kay Jesus, kay paagi sa iya kamatayon mapatawad ang ila mga sala, makapalapit sila sa Dios, kag makabaton sila sang kabuhi nga dayon. (Juan 3:16; Hebreo 10:19-22) Wala sila ginsilingan nga ipakita nila ang ila pagrespeto sa sina nga regalo paagi sa paggamit sang mga simbulo nga nagarepresentar kay Jesus ukon pagsiling lang nga nagatuo sila sa iya. Kay man, “ang pagtuo, kon wala ini sing mga buhat, patay ini.” (Santiago 2:17) Dapat ipakita sang mga Cristiano ang ila pagtuo kay Jesus. Paano?

“Ang gugma sang Cristo nagapahulag sa amon,” siling sang Biblia, “bangod amo ini ang amon ginhinakop, nga ang isa ka tawo napatay para sa tanan . . . Agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Corinto 5:14, 15) Bangod sa dalayawon nga gugma nga ginpakita sang Cristo, napahulag ang mga Cristiano nga sundon ang iya halimbawa. Paagi sini, ginapadunggan nila si Jesus sa mas nagakaigo nga paagi sangsa paggamit sing simbulo.

“Amo ini ang kabubut-on sang akon Amay, nga ang tanan nga nagakilala sa Anak kag nagatuo sa iya makatigayon sang kabuhi nga wala sing katapusan.”—Juan 6:40.