Pagpalig-on “Gikan sa Baba sang mga Bata”
Sang Disiembre 2009, ginsakdag sang Russian Supreme Court ang desisyon nga dulaon ang relihioso nga organisasyon sang mga Saksi ni Jehova sa Taganrog, Rusya, kompiskahon ang ila Kingdom Hall, kag ideklarar nga batok sa gobierno ang 34 naton ka publikasyon. Ini nga hitabo ginbutang sa Web site sang mga Saksi ni Jehova lakip ang mga piktyur sang mga Saksi nga naapektuhan sang desisyon, pati na ang mga bata.
Mga kabataan sa Australia
Pila ka bulan sang ulihi, ang Administrative Center sang mga Saksi ni Jehova sa Rusya nakabaton sing kahon kag sulat halin sa isa ka pamilya sa Queensland, Australia, nga nakakita sang report parte sa desisyon sang Korte. Ang sulat nagsiling: “Pinalangga nga mga Kauturan, Ang amon mga bata nga sanday Cody kag Larissa natandog gid sa pagtuo kag pagtilaw sang mga kaabyanan sa Rusya. Naghimo sila sing mga kard kag mga sulat, kag naghimos kami sing gamay nga mga regalo nga gusto namon ipadala sa mga kabataan sa Taganrog, para ipahibalo sa ila nga gikan sa malayo nga lugar, may mga kabataan nga matutom man nga nagaalagad kay Jehova kag nagahunahuna sa ila. Gusto nila ipadala ang ila mga hakos kag gugma.”
Sang mabaton ini sang mga kabataan sa Taganrog, ginpadalhan nila sing mga sulat nga may mga drowing ang pamilya sa Australia para pasalamatan. Natandog gid ang isa ka Saksi nga nagaalagad sa sanga sa Rusya sa pagpalig-on “gikan sa baba sang mga bata.” Gani ginsulatan niya sanday Cody kag Larissa: “Masakit gid para sa mga kabataan kag mga adulto nga silutan sila nga wala sing sala. Ang aton mga kauturan sa Taganrog wala sing sala, pero ginkuha ang ila Kingdom Hall. Nasubuan sila sa sini. Mapalig-on gid sila kon mahibaluan nila nga ginadumdom sila sa iban nga bahin sang kalibutan. Madamo gid nga salamat sa inyo pagpalangga kag kaalwan!”—Sal. 8:2.
Ang mga kabataan sa Rusya nga nakabaton sing mga regalo halin sa mga kabataan sa Australia
Bahin kita sang bug-os kalibutan nga paghiliutod, kag ang aton gugma sa isa kag isa nagabulig sa aton nga maatubang ang mga pagtilaw kag mga kabudlayan. Samtang ginadebatihan sa korte kon bala ang mga publikasyon sang mga Saksi ni Jehova nagapasanyog sang pagdumtanay, ang aton mga kabataan nagapakita sang pag-ulikid sa isa kag isa, ano man ang ila rasa kag kultura kag nagatuman sang ginsiling ni Jesus: “Paagi sa sini ang tanan makahibalo nga kamo mga disipulo ko, kon nagahigugmaanay kamo.”—Juan 13:35.
