Dies anyos ako sang 1985 sang nag-abot sa amon eskwelahan sa Columbus, Ohio, U.S.A. ang mga kabataan halin sa Cambodia. May isa ka bata nga lalaki nga nakahibalo sing pila ka tinaga sa Ingles. Paagi sa mga piktyur, ginsugid niya sa akon ang grabe nga pagpaantos, pagpamatay, kag pagpalagyo sang mga tawo. Nagahibi ako sa gab-i kon madumduman ko ini nga mga kabataan. Gusto ko sila sugiran parte sa paglaum nga Paraiso kag pagkabanhaw, pero indi sila makaintiende sang amon lenguahe. Bisan bata pa ako, nagdesisyon ako nga magtuon sing Cambodian para masugiran ko ang akon mga kaeskwela parte kay Jehova. Wala ko pa marealisar sadto kon paano ini nga desisyon makaapektar sa akon palaabuton.

Mabudlay magtuon sing Cambodian. Duha ka beses nga nagdesisyon ako nga mag-untat, pero ginpalig-on ako ni Jehova paagi sa akon mga ginikanan. Sang ulihi, ang akon mga manunudlo kag ang iban nga estudyante nag-engganyo sa akon nga tinguhaan ang daku sing sueldo nga trabaho. Pero gusto ko magpayunir, kag ginpili ko ang mga subject sa hayskul nga makabulig sa akon nga makakita sing part-time nga trabaho agod malab-ot ang akon tulumuron. Sa tapos sang klase, nagaupod ako sa pila ka payunir sa pagministeryo. Nagboluntaryo man ako sa pagtudlo sa mga estudyante nga nagatuon sing Ingles subong ila ikaduha nga lenguahe—isa ka desisyon nga nakabulig gid sa akon sang ulihi.

Sang 16 anyos ako, nabalitaan ko nga may isa ka grupo sang Cambodian sa Long Beach, California, U.S.A. Nagkadto ako didto kag nagtuon sa pagbasa sing Cambodian. Pagkagradweyt ko, nagpayunir ako kag nagpadayon sa pagbantala sa mga Cambodian nga malapit sa amon balay. Sang 18 anyos ako, nagpamensar ako nga masaylo sa Cambodia. Delikado gihapon ini nga lugar, pero nahibaluan ko nga pila lang sa napulo ka milyon ka tawo sa Cambodia ang nakabati sang maayong balita sang Ginharian. Sadto nga tion, isa lamang ang kongregasyon nga may 13 ka manugbantala sa bilog nga pungsod. Disinuebe anyos ako sa una ko nga pagkadto sa Cambodia. Pagligad sang duha ka tuig, nagdesisyon ako nga magbalik kag mag-istar didto. Para masuportahan ang akon ministeryo, nakakita ako sing part-time nga trabaho nga pagbadbad kag pagtudlo sing Ingles. Sang ulihi, nakapangasawa ako sing isa nga pareho ko sing tulumuron. Nalipay kami magbulig sa madamo nga tawo sa Cambodia nga madedikar ang ila kabuhi sa Dios.

Ginhatag ni Jehova ang ‘mga handum sang akon tagiposoon.’ (Sal. 37:4) Ang paghimo sing disipulo amo ang pinakamakalilipay nga propesyon. Sa sulod sang 16 ka tuig nga pagtener ko sa Cambodia, yadtong gamay nga kongregasyon sang 13 ka alagad ni Jehova nagdamo kag nangin 12 ka kongregasyon!—Panugiron ni Jason Blackwell.