Makilala Mo Gid Bala ang Dios?

Isa gid ka kadungganan nga maistorya mo ang isa ka prominente nga tawo kag tawgon sia sa iya ngalan. Ang dungganon nga mga tawo masami nga ginatawag naton sa ila mga titulo pareho sang “Mahal nga Presidente,” “Pinalangga nga Mayor,” ukon “Your Honor.” Gani kon hambalon ka nila, “Tawga lang ‘ko sa akon ngalan,” indi bala nga isa gid ini ka daku nga pribilehiyo?

SA Biblia, ang matuod nga Dios nagsiling sa aton: “Ako amo si Jehoba [Jehova, NW]: amo ini ang akon ngalan.” (Isaias 42:8, Mga Balaan nga Kasulatan, MBK) Bisan pa madamo sing titulo ang Dios pareho sang “Manunuga,” “Labing Gamhanan,” kag “Soberanong Ginuo,” ginhatagan niya ang iya mga alagad sing pribilehiyo nga tawgon sia sa iya personal nga ngalan.

Halimbawa, nakitluoy si propeta Moises sa Dios: “Pasayluha ako, Jehova.” (Exodo 4:10, NW) Sang gindedikar ang templo sa Jerusalem, ang una nga mga tinaga sang pangamuyo ni Hari Solomon nagasiling: “O Jehoba.” (1 Hari 8:22, 23, MBK) Sang nangabay si propeta Isaias sa Dios para sa mga taga-Israel, nagsiling sia: “Ikaw, O Jehoba, ikaw amo ang amon amay.” (Isaias 63:16, MBK) Ginapakita sini nga gusto sang aton Amay sa langit nga tawgon naton sia sa iya ngalan.

Importante nga tawgon naton si Jehova sa iya ngalan pero, indi lang amo sini ang kinahanglan para makilala gid naton sia. Ginpromisahan ni Jehova ang nagahigugma kag nagasalig sa iya: “Pagaapinan ko ang nagakilala sang akon ngalan.” (Salmo 91:14, Biblia sang Katilingban sang mga Kristiano, BKK) Bangod pangapinan ukon proteksionan ni Jehova ang nagakilala sa iya ngalan, maathag nga dapat gid naton usisaon kon ano ang buot silingon sa pagkilala sa iya ngalan. Kon amo, ano ang dapat mo himuon para makilala mo gid ang ngalan sang Dios?