Nagdaku ako sa Warialda, gamay nga banwa sa New South Wales. Ang palangabuhian didto amo ang pagsagod sang karnero, baka, kag pagpanguma. Matinlo ini kag diutay lang ang krimen.

Ako ang subang sa pulo ka kabataan. Sa edad nga 13, nagabulig na ako sa pagsagod sang amon pamilya. Bangod diutay lang ang akon ineskwelahan, nag-obra ako sa uma. Sang 15 anyos ako, nangin bakero ako sang mga kabayo.

Ang pag-obra sa uma may bentaha kag disbentaha. Ang isa ka bentaha amo nga nanamian ako sang obra sa uma, subong man sa palibot. Nagapungko ako sa dabok kon gab-i kag nagatan-aw sa bulan kag sa mga bituon samtang nagadapya ang maamyon nga hangin halin sa kakahuyan. Nahunahuna ko nga may Isa nga nagtuga sining matahom nga mga butang. Ang disbentaha amo nga naimpluwensiahan ako sang indi maayo nga mga paggawi. Pirme ko mabatian ang mga pamuyayaw, kag kahapos lang magpanigarilyo. Sang ulihi, nangin bisyo ko na ini.

Sang 18 anyos ako, nagsaylo ako sa Sydney. Maaplay tani ako sa army pero wala ako nabaton kay diutay lang ang akon ineskwelahan. Nakaobra ako sing isa ka tuig didto kag nakilala ko ang mga Saksi ni Jehova. Ginbaton ko ang ila pangagda nga magtambong sa mga miting, kag nahibaluan ko dayon nga ang ila panudlo amo ang kamatuoran.

Pero wala madugay pagkatapos sadto, nag-istar ako liwat sa uma sa Goondiwindi, Queensland. Didto ako nag-obra, nagpangasawa, kag ang malain pa kay nagsugod ako sa pag-inom.

Nangin duha ang amon bata. Sang may bata na kami, nagpalibog ako kon diin pakadto ang akon kabuhi. Nadumduman ko ang akon nabatian sa miting sang mga Saksi sa Sydney kag namat-od nga sundon ini.

 Nakakita ako sang daan nga isyu sang Ang Lalantawan, kag nakita ko diri ang adres sang sanga talatapan sang mga Saksi ni Jehova sa Australia. Nagpadala ako sing sulat para mangayo sing bulig. Bilang sabat, ginkadtuan ako sang mabuot kag mahigugmaon nga Saksi. Sang ulihi, nagtuon ako sa Biblia.

Sang ginatun-an ko ang Biblia, narealisar ko nga kinahanglan ko magbag-o. Ang isa ka teksto nga nagpahulag sa akon amo ang 2 Corinto 7:1. Nagasiling ini nga “tinluan naton ang aton kaugalingon gikan sa tanan nga dagta sang unod.”

Nagdesisyon ako nga untatan ang pagpanigarilyo kag pagpahubog. Indi ini mahapos kay madugay ko na ini nga mga bisyo. Pero determinado ako nga magkabuhi nga nagapahalipay sa Dios. Daku gid ang nabulig sa akon sang prinsipio sa Roma 12:2: “Untati ninyo ang pagpauyon sa sining sistema sang mga butang, kundi magbalhin kamo paagi sa pagbag-o sang inyo hunahuna.” Narealisar ko nga agod mauntat ang akon mga bisyo, dapat ko bag-uhon ang akon panghunahuna kag kabigon nga makahalalit ang akon bisyo pareho sang pagkabig sang Dios sa sini. Sa bulig sang Dios, nauntat ko ang pagpanigarilyo kag pagpahubog.

Pero ang pinakamabudlay amo ang pag-untat sa pagpamuyayaw. Nahibaluan ko ang laygay sa Efeso 4:29: “Indi maggua ang dunot nga pinamulong gikan sa inyo baba.” Pero, nabudlayan ako nga untatan ang pagpamuyayaw. Nakabulig sa akon ang Isaias 40:26. Parte sa mga bituon sa langit, ini nagasiling: “Itangla ang inyo mga mata sa hitaas kag tan-awa: sin-o bala ang nagtuga sini sa ila? Sia nga nagapagowa sang ila kasoldadosan sa isip, ginatawag niya sila tanan sa ngalan; paagi sa kadaku sang iya gahum, kag bangud nga makusug sia sa gahum wala sing isa nga nakulang.” Nakahunahuna ako, kon may gahom ang Dios sa pagtuga sang uniberso, nga nanamian ko gid tan-awon, makahatag man sia sing kusog sa akon para magbag-o kag mapahalipay sia. Sa bulig sang pangamuyo kag pagpanikasog, nakontrol ko gid man ang akon baba.

Subong bakero, indi ako pirme makapakighambal sa mga tawo, kay diutay lang ang mga tawo sa uma nga ginaubrahan ko. Pero, paagi sa mga paghanas sa mga miting sang mga Saksi ni Jehova, nakahibalo na ako magpakig-istorya. Labaw sa tanan, nakatuon man ako magpakig-istorya sa iban parte sa maayong balita sang Ginharian sang Dios.—Mateo 6:9, 10; 24:14.

Tinuig na ako nga gulang sa amon kongregasyon. Isa gid ka pribilehiyo nga himuon ang akon masarangan para buligan ang akon mga kaupod sa kongregasyon. Isa man ka daku nga pagpakamaayo nga makaupod sa pag-alagad kay Jehova ang akon asawa kag kabataan.

Ginapasalamatan ko gid si Jehova nga bisan diutay lang ang akon ineskwelahan, gintudluan niya ako. (Isaias 54:13) Nagaugyon gid ako sa ginasiling sang Hulubaton 10:22: “Ang pagpakamaayo sang GINOO nagapamanggad.” Nalangkag gid ako kag ang akon pamilya nga magtuon sing dugang pa parte kay Jehova kag mag-alagad sa iya sing wala katapusan.