“Nagapati ka bala nga indi naton kinahanglan ang Dios? Minilyon ang nagapati sini.” Amo ini ang mabasahan sa isa ka billboard nga ginbayaran sang isa ka grupo sang atiesta. Nagapati gid sila nga indi nila kinahanglan ang Dios.

Pero madamo man nga nagapangangkon nga nagapati sa Dios ang nagagawi nga daw wala sia nagaluntad. Ang isa ka Katoliko nga arsobispo nga si Salvatore Fisichella nagsiling sa iya mga miembro: “Kon tan-awon kita subong wala gid sing makasiling nga Cristiano kita bangod ang aton pagkabuhi pareho lang sa mga indi tumuluo.”

Ang iban wala na sing panahon sa Dios. Ginakabig nila nga tuman sia kalayo ukon indi mapalapitan amo nga indi sia makapasilabot sa ila pagkabuhi. Madumduman lang nila ang Dios kon may problema ukon may kinahanglan sila—nga daw pareho lang sia sang ila suluguon.

Ang iban wala nagasunod sa panudlo sang ila relihion, mahimo nga bangod ginahunahuna nila nga indi ini importante. Halimbawa, 76 porsiento sang mga Katoliko sa Germany ang nagapati nga wala sing malain kon magpuyopuyo ang lalaki kag babayi—ang pagtamod nga nagasumpakil sa panudlo sang ila simbahan kag sang Biblia. (1 Corinto 6:18; Hebreo 13:4) Siempre, indi lang mga Katoliko ang nakarealisar nga lain ang paagi sang ila pagkabuhi sa ginatudlo sang ila relihion. Ang lider sang madamo nga relihion nagapangasubo bangod ang ila mga miembro nagagawi nga daw “mga atiesta.”

Bangod sini nga mga halimbawa, mahimo kita mamangkot: Kinahanglan gid bala naton ang Dios? Indi ini bag-o nga pamangkot. Ginpamangkot na ini sa una nga mga pahina sang Biblia. Agod masabat ini, binagbinagon naton ang pila ka isyu nga ginbangon sa libro sa Biblia nga Genesis.