Sang tuig 33 C.E., napatay si Jesus, ginbanhaw, kag nagkayab sa langit. Sang ulihi, ginhatagan sia sang awtoridad nga maggahom subong Hari. (Daniel 7:13, 14) Sa palaabuton, manghikot sia subong Hari agod paluntaron ang paghidait sa kalibutan kag dulaon ang kaimulon.—Basaha ang Salmo 72:7, 8, 13.

Mahimo si Jesus sang makatilingala nga mga butang subong Manuggahom sang katawhan. Gamiton niya ang gahom nga ginhatag sang iya Amay para ipasag-uli ang mga tawo sa pagkaperpekto. Mabuhi sila nga malipayon sa duta nga indi na magtigulang kag mapatay.—Basaha ang Juan 5:26-29; 1 Corinto 15:25, 26.

Ginagiyahan ni Jesus ang iya mga sumulunod sa ila pagwali nga hilikuton sa kalibutan subong. Ginabisitahan nila ang mga tawo para ipahibalo sa ila ang ginasiling sang Biblia parte sa Ginharian sang Dios. Nagsiling si Jesus nga padayon niya nga suportahan ang hilikuton sang iya mga disipulo tubtob tapuson na sang Ginharian sang Dios ang pagginahom sang mga tawo.—Basaha ang Mateo 24:14; 28:19, 20.

Paagi sa matuod nga Cristiano nga kongregasyon, ginagiyahan ni Jesus ang mga tawo sa mas maayo nga dalanon sang kabuhi. Padayon niya sila nga giyahan sa tion sang kalaglagan sini nga sistema sang mga butang pakadto sa ginsaad sang Dios nga bag-ong kalibutan.—Basaha ang 2 Pedro 3:7, 13; Bugna 7:17.