Nagapati ang madamo nga ang Dios ang nagagahom sa kalibutan. Pero kon matuod ini, ngaa napuno ang kalibutan sang pag-antos? (Deuteronomio 32:4, 5) Suno sa Biblia, ang kalibutan yara sa idalom sang paggahom sang isa nga malauton.—Basaha ang 1 Juan 5:19.

Paano nakontrol sang isa nga malauton ang katawhan? Sa pagsugod sang kasaysayan sang katawhan, ang isa ka anghel nagrebelde sa Dios kag ginhaylo ang una nga mag-asawa nga magrebelde man. (Genesis 3:1-6) Ginsunod sang mag-asawa ang rebelde nga anghel, si Satanas, amo nga nangin manuggahom nila sia. Ang Labing Gamhanan nga Dios lamang ang may kinamatarong nga mangin Manuggahom, pero luyag niya nga pilion sang mga tawo ang iya paggahom bangod ginahigugma nila sia. (Deuteronomio 6:6; 30:16, 19) Makapasubo nga madamo ang naghimo sang sayop nga desisyon nga pareho sa ginhimo sang una nga mag-asawa.—Basaha ang Bugna 12:9.

Tugutan bala sang Dios nga magpadayon ang malaut nga paggahom ni Satanas? Indi! Gamiton sang Dios si Jesus agod tapuson ang kalautan nga ginhimo ni Satanas.—Basaha ang 1 Juan 3:8.

Bangod ginhatagan sang gahom sang Dios si Jesus, laglagon niya si Satanas. (Roma 16:20) Dayon, gamhan sang Dios ang katawhan kag ibalik ang orihinal nga kahimtangan sang mga tawo nga mangin malipayon kag mahidaiton.—Basaha ang Bugna 21:3-5.