Antes mo sugdan ang bisan ano nga hilikuton, natural lang nga mamensar ka, ‘Ano ang benepisyo ko sa sini?’ Apang maiyaiyahon bala kon mamangkot ka sini parte sa pangamuyo? Indi gid man. Natural lang nga luyag naton mahibaluan kon bala may kaayuhan ini. Bisan ang maayo nga tawo nga si Job namangkot: “Kon manawag ako sa iya, sabton niya ayhan ako?”—Job 9:16.

Sang nagligad nga mga artikulo, ginbinagbinag naton ang pamatuod nga ang pangamuyo indi lang isa ka rutina ukon paagi nga magnami ang aton pamatyag. Nagapamati gid ang matuod nga Dios sa aton pangamuyo. Kon mangamuyo kita sa husto nga paagi kag sa nagakaigo nga mga butang, pamatian niya kita. Ang matuod, ginapalig-on niya kita nga magpalapit sa iya. (Santiago 4:8) Gani ano ang mapaabot naton kon mangin bahin na sang aton kabuhi ang pangamuyo? Tan-awon naton ang pila lang sa mga benepisyo.

Kon may mga problema ka kag mga kabudlayan, nagabatyag ka bala sing sobra nga kabalaka? Sa sini nga tion, ginapalig-on kita sang Biblia nga ‘padayon nga magpangamuyo’ kag ‘ipahibalo sa Dios ang aton mga pangabay.’ (1 Tesalonica 5:17; Filipos 4:6) Ginapasalig kita sang Biblia nga kon mangamuyo kita sa Dios, “ang paghidait sang Dios nga labaw sa tanan nga paghangop magabantay sang [aton] tagipusuon kag ikasarang sa paghunahuna.” (Filipos 4:7) Makatigayon kita sing kalinong kon ipangamuyo naton sa aton langitnon nga Amay ang aton mga kabalaka. Ang matuod, ginapalig-on niya kita nga himuon ini. “Itugyan ang imo lulan kay Jehova, kag sia magaalay-ay sa imo,” siling sang Salmo 55:22.

Madamo nga tawo sa bilog nga kalibutan ang nakatigayon sini nga kalinong. Si Hee Ran nga taga-South Korea, nagsiling: “Bisan pa mabug-at ang akon mga problema, kon ipangamuyo ko ini, nagahaganhagan  ang akon pamatyag kag daw may kusog ako nga mabatas ini.” Si Cecilia nga taga-Pilipinas, nagsiling: “Subong iloy, nabalaka gid ako parte sa akon mga bata nga babayi, kag sa akon iloy nga indi na makakilala sa akon. Pero bangod sang pangamuyo, nahimo ko ang akon mga buluhaton kada adlaw nga wala nagakabalaka sing daku. Nahibaluan ko nga buligan ako ni Jehova sa pag-atipan sa ila.”

Nagaatubang ka bala sang grabe nga kabudlayan, ayhan makatalagam ukon masubo gid nga mga kahimtangan? Ang pagpangamuyo sa “Dios nga nagahatag sang tanan nga sahi sang lugpay” nagahatag sing daku nga paumpaw. Ang Biblia nagasiling nga sia “nagalugpay sa aton sa tanan naton nga mga pagtilaw.” (2 Corinto 1:3, 4) Halimbawa, sang nagbatyag si Jesus sing daku nga kasakit, “nagluhod sia kag nagpangamuyo.” Ano ang resulta? “Nagpakita sa iya  ang isa ka anghel halin sa langit kag ginpabakod sia.” (Lucas 22:41, 43) Ang matutom nga si Nehemias ginpahog sang malain nga mga tawo nga nagtinguha sa pagpauntat sa iya sa paghimo sang buluhaton sang Dios. Nangamuyo sia: “Karon nagapangamuyo ako, pabakura ang akon mga kamot.” Ang masunod nga mga hitabo nagapakita nga ginbuligan gid sia sang Dios agod mabatuan ang iya kahadlok kag agod magmadinalag-on sa iya hilikuton. (Nehemias 6:9-16) Si Reginald nga taga-Ghana, nagsugid sang iya eksperiensia parte sa pangamuyo: “Kon nagapangamuyo ako, ilabi na sa tion sang grabe nga mga kabudlayan, nagahaganhagan ang akon pamatyag nga masugid ang akon problema sa isa nga makasarang sa pagbulig sa akon kag nagapasalig sa akon nga wala ako sing kabalak-an.” Huo, malugpayan kita sang Dios kon mangamuyo kita sa iya.

Ang pila naton ka desisyon mahimo nga may permanente nga epekto sa aton kag sa aton mga pinalangga. Paano kita makahimo sang maalamon nga mga desisyon? Nagasiling ang Biblia: “Kon may isa sa inyo nga kulang sang kaalam [ilabi na sa tion sang mga pagtilaw], padayon sia nga magpangayo sa Dios kag ihatag ini sa iya, kay maalwan Sia nga nagahatag sa tanan kag wala nagapangtamay.” (Santiago 1:5) Kon mangamuyo kita sing kaalam, gamiton sang Dios ang iya balaan nga espiritu agod maggiya sa aton sa paghimo sing maalamon nga mga desisyon. Ang matuod, espesipiko kita nga makapangayo sang balaan nga espiritu bangod si Jesus nagapasalig sa aton nga “ihatag gid [sang Amay sa langit] ang balaan nga espiritu sa mga nagapangayo sa iya!”—Lucas 11:13.

Bisan si Jesus nagbatyag nga dapat sia mangayo sing bulig sa iya Amay sa paghimo sing importante nga mga desisyon. Ginasugiran kita sang Biblia nga sang nagpili sia sang 12 ka lalaki agod mangin iya apostoles, “nagpangamuyo sia sa Dios sa bug-os nga gab-i.”—Lucas 6:12.

Pareho kay Jesus, madamo karon ang napalig-on sang makita nila kon paano sila ginabuligan sang Dios sa paghimo sing maalamon nga mga desisyon. Si Regina, nga taga-Pilipinas, nagsugid sang iya madamo nga problema, pareho sang pagsakdag sa iya kaugalingon kag sa iya pamilya sang napatay ang iya bana, pagkadula sang iya obra, kag sang kabudlayan sa pagpadaku sa iya kabataan. Ano ang nakabulig sa iya nga maghimo sing maalamon nga mga desisyon? Nagsiling sia, “Nangamuyo ako nga buligan ako ni Jehova.” Si Kwabena, nga taga-Ghana, nagsiling kon ngaa nangayo sia sing bulig sa Dios, “Nadulaan ako sing obra sa konstruksion diin may daku ako nga sueldo.” Sang ginabinagbinag niya kon ano ang iya himuon, nagsiling sia, “Padayon ako nga nangamuyo kay Jehova nga giyahan niya ako sa paghimo sing husto nga desisyon.” Nagdugang sia, “Nabatyagan ko gid nga ginbuligan ako ni Jehova nga makapili sing obra agod maatipan ko ang akon espirituwal kag pisikal nga mga kinahanglanon.” Maeksperiensiahan mo man ang panuytoy sang Dios kon ipangamuyo mo ang mga butang nga makaapektar sa imo kaangtanan sa iya.

Ginbinagbinag naton ang pila lang sa mga benepisyo sang pangamuyo sa imo. (Para sa dugang nga mga halimbawa, tan-awa ang kahon nga “ Mga Benepisyo sang Pangamuyo.”) Apang agod matigayon mo ini nga mga benepisyo, dapat makilala mo anay ang Dios kag mahibaluan ang iya kabubut-on. Kon luyag mo ini, ginapalig-on ka namon nga pangabayon ang mga Saksi ni Jehova nga buligan ka sa pagtuon sa Biblia. * Amo ini ang una mo nga himuon agod mangin suod ka sa “Manugpamati sang pangamuyo.”—Salmo 65:2.