“Ang problema sa mental health sang mga tin-edyer malala na gid kag ang social media ang isa sa panguna nga rason sini.”—Dr. Vivek Murthy, U.S. surgeon general, New York Times, Hunyo 17, 2024.

 Paano maproteksionan sang mga ginikanan ang ila kabataan sa malain nga epekto sing social media? May praktikal nga laygay ang Biblia.

 Binagbinaga ining mga prinsipio sa Biblia.

 “Ang tawo nga maalamon nagabinagbinag sang tagsa niya ka tikang.”—Hulubaton 14:15.

 Mahimo may malain nga epekto ang social media sa imo bata. Gani indi magpensar nga dapat mo sia pasugtan nga maggamit sing social media bisan pa nga daw halos tanan nagagamit sini. Antes mo pasugtan ang imo bata nga maggamit sing social media, siguraduha nga mature na sia kag kabalo na sia magkontrol sang oras nga ginagamit niya sa sini, magpakig-abyan sa maayo nga mga tawo, kag maglikaw sa indi maayo nga mga content.

•   Para sa dugang nga impormasyon, basaha ang mga artikulo nga “Dapat Bala nga Maggamit sing Social Media ang Akon Bata?” kag “Pagtudlo sa Imo Tin-edyer Kon Paano Mangin Safe sa Paggamit sing Social Media.”

 ‘Gamita sing maayo ang inyo tion.’—Efeso 5:16.

 Kon pasugtan mo ang imo bata nga maggamit sing social media, maghimo sang mga rules kon paano niya ini gamiton, kag ipaathag kon paano ini makabulig sa iya nga mangin safe. Mangin alisto sa bisan ano nga batasan sang imo bata nga mahimo senyales nga dapat mo limitahan ang iya paggamit sing social media.

•   Gamita ang whiteboard animation nga Mangin Maalamon sa Paggamit sang Social-Network para mabuligan ang imo bata nga maintiendihan kon ngaa kinahanglan may limitasyon ang paggamit sing social media.

 Ginasiling sang Biblia nga nagakabuhi na kita sa “makahalanguyos nga mga tion nga mabudlay atubangon.” (2 Timoteo 3:1-5) Pero may ginahatag man ini nga praktikal nga mga laygay nga makabulig sa aton. Sa artikulo parte sa mental health sang mga tin-edyer may listahan sang sobra 20 ka base sa Biblia nga mga topiko nga makabulig sa mga ginikanan kag sa ila kabataan.