Pagkatapos mabawtismuhan subong isa sa mga Saksi ni Jehova, nagpauli si Zarina sa Central Asia halin sa Russia, kag gusto niya tudluan sing kamatuoran ang iya duha ka bata nga babayi. Bangod indi sia makasarang mangabuhi, nag-istar sia upod sa iya mga ginikanan kag sa iya manghod nga lalaki kag sa asawa sini sa isa lang ka kuarto nga apartment. Ginsilingan sia sang iya ginikanan nga indi pagtudluan sang Biblia ang iya kabataan. Ginsugo man nila ang iya mga bata nga indi mag-istorya sa ila iloy parte sa Biblia.

 Ginpamensaran gid sing maayo ni Zarina kon paano niya mabuligan ang iya mga bata nga magtuon parte kay Jehova. (Hulubaton 1:8) Hanuot sia nga nangamuyo sa iya, nga nagapangayo sing giya kag kaalam. Nanghikot man si Zarina suno sa iya pangamuyo paagi sa paglagawlagaw sa iya mga bata kag ginaistorya sila parte sa pagkadalayawon sang mga tinuga. Ini nga paglagawlagaw nakabulig sa iya mga bata nga mangin suod sa Manunuga.

 Dason, nangita sing paagi si Zarina nga matudluan ang iya mga bata sang libro nga Ano Gid ang Ginatudlo sang Biblia? a Ginsulat niya ang mga parapo kag mga pamangkot sa mga papel. Gindugangan man niya ini sang pila ka paathag para maintiendihan pa gid sang iya mga bata ang leksion. Dayon ginatago niya ining mga sulat, pati ang lapis, sa idalom sang washing machine sa banyo. Kon ara sa banyo ang mga bata, ginabasa nila ang mga parapo kag ginasulat ang ila mga sabat.

 Paagi sa sini, natudlo ni Zarina ang duha ka kapitulo sang Ginatudlo sang Biblia nga libro sa iya mga bata asta nga nakakita sila sang iban nga lugar nga maistaran. Didto, natudluan na niya ang iya mga bata nga wala sing balagbag. Sang Oktubre 2016, nabawtismuhan ang duha ka bata, kag nagapasalamat gid sila nga nagpakita sing kaalam kag nangita sing paagi ang ila iloy sa pagtudlo sa ila sang Biblia.