Si Virginia nga isa sa mga Saksi ni Jehova, nagaantos sang balatian nga ginatawag locked-in syndrome. Paralisado ang bilog niya nga lawas. Makakita sia kag makabati, mamuklat niya kag mapiyong ang iya mga mata, kag mahulag niya gamay ang iya ulo. Indi niya masarangan maghambal ukon magkaon. Sadto, mapagros sia kag mapagsik. Pero isa ka aga sang 1997, gulpi lang sia nakabatyag sang grabe nga kasakit sa likod sang iya ulo kag sigesige ini. Gani gindala sia sang iya bana sa ospital. Sina nga gab-i, na-comatose sia. Pagligad sang duha ka semana sa intensive care unit, nakabugtaw sia nga paralisado na kag naka-connect sa ventilator. Sa sulod sang pila ka adlaw, wala sia sing madumduman kag indi niya gani matandaan kon sin-o sia.

 Ginsaysay ni Virginia kon ano dayon ang natabo. “Amat-amat nga may madumduman ako. Nangamuyo gid ako sing hugot. Indi ko gusto nga mapatay kag indi ko gusto nga magdaku ang akon bata nga wala sing nanay. Para indi magluya ang akon buot, gintinguhaan ko nga madumduman ang mga teksto sa Biblia nga akon nabal-an.

 “Sang ulihi ginpagua ako sang mga doktor sa ICU. Pagligad sang anom ka bulan sa sarisari nga ospital kag sa rehabilitation center, nakapauli gid man ako sa balay. Pero paralisado gihapon ang akon bilog nga lawas kag kinahanglan gid nga may magbulig sa akon. Nasubuan gid ako! Pamatyag ko wala ako sing pulos para sa iban kag para kay Jehova. Nabalaka man ako kay indi ko maatipan ang akon bata.

 “Ginbasa ko ang eksperiensia sang iban nga Saksi nga may malala man nga balatian pareho sa akon, kag nagdayaw gid ako sa ila nahimo para kay Jehova. Gani, gintinguhaan ko nga mangin positibo kag magpokus sa masarangan ko himuon. Sang wala pa ako nagmasakit, diutay lang ang akon tion sa pagtuon, pag-preaching, kag pagpangamuyo. Subong, mahimo ko na ini sa bilog nga adlaw, kag adlaw-adlaw pa. Gani imbes nga masubuan, nagpokus ako sa akon pag-alagad kay Jehova.

 “Gintun-an ko ang paggamit sang kompyuter. Naga-type ako paagi sa bulig sang isa ka software nga naga-react sa hulag sang akon ulo. Makakalapoy ini. Pero nakabulig ini sa akon nga matun-an ang Biblia kag masugid sa iban ang akon paglaum, paagi sa sulat kag sa e-mail. Para maistorya ko ang mga upod ko, nagagamit kami sing board nga may alphabet. Isaisa nila nga ginatudlo ang mga letra. Kon sala nga letra ang ila ginatudlo, nagapamudlo ako; kon insakto gani nagapiyong ako. Sulitsulit namon ini nga ginahimo asta nga makahuman kami sing mga tinaga kag mga sentence. Mapaktan na sang pila ka sister nga pirme nagaupod sa akon kon ano ang gusto ko ihambal. Kon kis-a, kon sala ang ila pakot, nagakadlaw na lang kami.

 “Nanamian gid ako nga makigbahin sa mga hilikuton sang kongregasyon. Pirme ako naga-tie in sa mga meeting, kag subong, paagi na sa videoconference. Gina-type ko ang akon mga komento kag mga sabat kag ginabasa ini sang iban para sa akon. Naga-tie ini man ako sa diutay nga mga grupo sang mga kauturan para magtan-aw sang JW Broadcasting nga programa kada bulan. a

 “Beinte-tres ka tuig na nga may locked-in syndrome ako. Kon kis-a nasubuan gihapon ako. Pero ginapakigbatuan ko ini paagi sa pagpangamuyo, pagpakig-upod sa mga kauturan, kag paagi sa masako nga pag-alagad kay Jehova. Ang matuod, paagi sa bulig sang kongregasyon, sobra na anom ka tuig nga auxiliary payunir ako. Gintinguhaan ko gid nga mangin maayo nga halimbawa sa akon bata nga si Alessandro. May asawa na sia subong kag isa na ka gulang. Pareho sila nga regular payunir sang iya asawa.

 “Pirme ko ginapamalandungan ang mga butang nga puede ko na himuon ko sa Paraiso. Ang una gid nga gusto ko himuon amo ang mag-istorya sa iban parte kay Jehova. Gusto ko man maglakatlakat sa kilid sang sapa kag magtan-aw sa matahom nga palibot. Bangod duha ka dekada na nga ginapakaon ako paagi sa tubo, gusto ko gid magpuksi sang mansanas kag kagton ini. Kag siempre kay Italian ako, eksayted na gid ako nga magluto kag magkaon sang paborito ko nga Italian nga mga pagkaon, pareho sang pizza!

 “Ang ‘paglaum nga kaluwasan’ nakabulig sa akon nga maproteksionan ang akon panghunahuna. (1 Tesalonica 5:8) Kon imadyinon ko nga ara ako sa bag-o nga kalibutan, nalipay ako bisan pa may pisikal ako nga mga limitasyon subong. Nagapati gid ako nga madali na lang madula ang mga balatian. Gusto ko na gid maeksperiensiahan ang ginapromisa ni Jehova nga ‘matuod nga kabuhi’ paagi sa iya Ginharian.”—1 Timoteo 6:19; Mateo 6:9, 10.