Si Osman upod sa iya asawa kag bata nga babayi nagapanaksi paagi sa literature cart sa gua sang isa ka patyo sa Chile. May nag-abot nga inuglubong nga patay nga may matunog nga banda kag madamo ang nagakumpanyar. Nasal-an sang pila sa mga nagakumpanyar nga si Osman ang ila pastor, gani ginpalapitan nila sia, ginhakos, kag ginsilingan, “Salamat gid Pastor kay ari ka na, ginapaabot ka gid namon!”

 Bisan pa gintinguhaan ni Osman nga magpaathag, indi sia mabatian kay kagahod sang palibot. Pila ka minutos nga nakasulod na sa patyo ang grupo, may nagbalik kay Osman kag ginsilingan sia, “Pastor, ginahulat ka namon sa sulod.”

 Pagkatapos nga maglinong ang palibot, ginpaathag ni Osman kon sin-o sia kag kon ngaa ara sia didto. Naakig ang mga tawo kay wala nag-abot ang ila pastor. Gani, ginpangabay nila si Osman, “Puede ka kakadto sa sulod kag sugiran mo ang mga nagkumpanyar parte sa Pulong sang Dios?” Nagsugot si Osman.

 Samtang nagapadulong sila sa lulubngan, namangkot si Osman parte sa napatay kag namensar sia sang pila ka teksto nga puede niya basahon. Pag-abot niya sa lulubngan, nagpakilala sia sa mga nagkumpanyar kag ginpaathag niya nga bangod Saksi sia ni Jehova, nagabantala sia sang maayong balita sa mga tawo.

 Ginbasa niya ang Bugna 21:3, 4 kag Juan 5:28, 29. Dayon ginpaathag niya nga indi tuyo sang Dios nga mapatay ang mga tawo. Sa baylo, banhawon sang Dios sa indi madugay ang mga patay, kag may paglaum sila nga mabuhi sing dayon sa duta. Sang makatapos hambal si Osman, madamo ang nalipay nga naghakos kag nagpasalamat sa iya parte sa “mensahe ni Jehova sang maayong balita.” Nagbalik sia dayon sa literature cart.

 Pagkatapos sang lubong, may pila ka nagkumpanyar nga nagkadto sa cart kag namangkot kay Osman kag sa iya pamilya parte sa Biblia. Malawig ang ila pag-istoryahanay, kag sang naglakat na ang mga nagkumpanyar, halos naubos nila kuha ang mga publikasyon sa cart.